1 Samueli 8 - U TIENU MAAMA TILI 2013

Sayuli tua Isidayeli bado 8—15 Isidayeli yaaba mia ke bi bua o bado

¹ Samueli n den kpeligi, o den teni ke o bijaba tua Isidayeli yaaba gobidikaaba.

² O bijakpelo den yi Joeli, o bonlielo mo Abiya. Bi den ye Beri-Seba ki ja ti buudi.

³ Ama baa den ŋua bi baa Samueli fuuli, bi den bua mi piama boncianla ki gaani a suuna, ki saagi a moamoancakpiga.

⁴ Lane Isidayeli yaaba nikpela kuli den taani ki cua Rama, Samueli kani

⁵ ki yedi o: «Diidi, a kpeligi, a bijaba mo naa ŋua a fuuli ba waamu. Lanwani, ŋan dini ti po o bado wan yaa die ti, nani i nibuoli kuli n pia maama.»

⁶ Samueli pali den biidi leni ban mia o bado wan yaa die ba. Lanwani, Samueli den jaandi ki mia o Diedo.

⁷ O Diedo den yedi Samueli: «Cengi bi maama ki tieni ban yedi yaala kuli, kelima laa tie ke bi yie fini ka, bi yie mine, ke min da go die ba.

⁸ Bi tieni a nani ban tieni mini maama hali min ñani ba Ejipiti nni ki cuani ba ne, ki pundi hali moala. Bi ŋaa nni ki ŋoadi tientoe.

⁹ Lanwani, ŋan cengi bi maama, ama ŋan tuodi ki waani ba yaa bado n baa ti yaa die ba n baa yaa pia bipo yaa bali.»

¹⁰ Samueli den togidi Isidayeli yaaba, bani yaaba n den miadi o o bado yeni, o Diedo n yedi yaala kuli.

¹¹ O den yedi: «Diidi mani yaa bado n baa yaa die yi n baa yaa pia yi po yaa bali. O baa gaa yi bijaba ki teni bine n yaa gobidi o toateliti, bine n yaa jagi o toataami, bine mo n yaa tiini wani o ba yaa toateligu liiga.

¹² O baa teni bi tianba n yaa die toatieba tudili tudili, bi tianba mo n yaa die toatieba piimuu muu. O go baa teni bine n yaa ko o kuani ki yaa taagi o jiema, bine mo n yaa tagi o toatiadi leni o toateliti yaa tiadi.

¹³ O baa gaa yi bisiaba ki teni tianba n yaa ŋanbidi tulale, bine n yaa ŋanbidi mi jiema, bine mo n yaa pua dupen.

¹⁴ O baa fie yi kuani, yi duventiidi leni yi olivie tiidi kuli siiga yaala n ŋani ki cie, ki teni o naacenba.

¹⁵ O baa fie yi kpaandi leni yi duventiidi yaa diim, ki teni o moagilimu leni naacenba.

¹⁶ O baa gaa yi naacenba, yi puotuada, yi jawaaba leni yi ŋunbi ban yaa tuuni o tuona.

¹⁷ O baa gaa yi yandi yaa diim, yinba yi ba mo baa tua o yonbi.

¹⁸ Lanyogunu, yi baa yaa buudi ki yenbidi yi bado po, yin den gandi yua yinba yi ba yeni. Ama o Diedo kan cengi yi.»

¹⁹ Ba leni lani kuli, Isidayeli yaaba den yie baa den cengi Samueli maama. Bi den yedi: «Aa-a, ti li bua ki baa bado yo.

²⁰ Lani, timoko baa yaa naani leni i nibuoli kuli. Ti bado yeni baa yaa ja ti po ti buudi. O baa yaa ye ti liiga ki gobidi ti bu toabu nni.»

²¹ Samueli n den gbadi Isidayeli yaaba maama kuli, o den togidi ma o Diedo.

²² O Diedo den yedi Samueli: «Cengi ban yedi a yaala, ki dini bi po o bado.» Samueli den cabi Isidayeli yaaba ki yedi ba, yuakuli n guani o dogu po.