1 Samueli 30 - U TIENU MAAMA TILI 2013

Davidi paadi Amaleki yaaba

^1-2 Davidi leni o toatieba n den pundi Tisikilagi li dataali daali, bi den sua ke Amaleki yaaba baa Filisiti yaaba diema ganu po leni Tisikilagi kuli. Bi den cuo bi puoba leni yaaba n den ye lienni kuli, a nikpela leni a bila kuli, ki mudi Tisikilagi ki juu u. Baa den kpa ba niyendo. Bi den cuo bikuli, ki guani ki taa bi sanu.

³ Davidi leni o toatieba den pundi u dogu nni ki sua ke u juu, ke bi cuo bi puoba, bi bonjala leni bi bonpola kuli ki gedini.

⁴ Lanwani, Davidi leni yaa niba n den ye leni o kuli den buudi buudi hali ke bi fidu kuli den gbeni, ke baa go fidi ki buudi.

⁵ Bi den cuo Davidi puoliediba ti yonbidi: Lani n tie Ahinoami yua n ñani Yisireyeli leni Nabali yua ñani Karimeli kpepuoli Abigayili.

⁶ Davidi den ye leni li paboancianli, kelima o toatieba den yedi ke bi baa lugidi o a tana. Yaala yaa po, bikuli pala den biidi kelima bi bijaba leni bi bisiaba po. Ama Davidi den guani ki paagi o pali, kelima o Diedo o Tienu po.

⁷ Davidi den yedi o kopadiciamo Ahimeleki bijua Abiatari: «Taa o kopadiciamo cabilakaali ki cuani ne.» Abiatari den taa li cabilakaali yeni ki cuani Davidi kani.

⁸ Davidi den buali o Diedo ki yedi: «Min ŋoadi li toagoli yeni bi? N baa nandi ba bi?» O Diedo den guani ki yedi o: «Ŋoadi ba kelima a baa nandi ba ki faabi yi niba.»

⁹ Lanwani, Davidi den taa u sanu, wani leni yaa nikobiluobidi n den ye leni o. Bi den pundi Besori kpenu ke yaaba n den ŋua puoli den sedi lankani.

¹⁰ Davidi leni jaba kobinaa den suagi liiga ki ŋoadi bi yibalinba. Jaba kobilie mo den sedi, kelima bi den coagi ki kan fidi ki duodi Besori kpenu yeni.

¹¹ Bi den laa Ejipiti yua li fuali nni ki cuani o Davidi kani. Bi den puni o dupen ke o dini ki go puni o mi ñima ke o ñuni.

¹² Bi go den puni o a kankankuoma bonkoncabili leni duventiidi bonluonkaala joanalie. Li den sua ke waa dini puu, waa ñuni liba hali danataa leni ñiaditaa. Lanwani, wan den dini, o den guani ki baa u fidu.

¹³ Davidi den buali o: «Ŋme die ŋa? A ñani le?» O den guani ki yedi: «N tie Ejipiti yaa jawaalo ki tie Amaleki yua yaa yonbo. Dinla danataa nne ke n canbaa ŋaa nni kelima n den yia.

¹⁴ Ti den baa Filisiti buolu Keleti yaaba diema ganu po, Juda diema nni leni Kalebi diema ganu po. Ti go den juu Tisikilagi dogu.»

¹⁵ Davidi den yedi o: «A baa tuo ki ciani nni min gedi li toagoli yeni po bi?» O den guani ki yedi: «Ŋan poli U Tienu po ke a kan kpa nni, ke a kan go taa nni ki teni n canbaa mo, lanwani n baa ciani a li toagoli yeni po.»

¹⁶ O den ciani o ke bi pundi. Amaleki yaaba den yadi ki gbie i kaani kuli ki ji ñu ki jeli ki ciaga, kelima ban den baa yaa fagiciandi Filisiti yaaba leni Juda yaaba diema nni kuli yaa po.

¹⁷ Davidi den pua ki kpaani ba, ki cili ku tiŋaapanpangu ki yaa caa hali saala yaa yenjuagu. Oba kuli ki den ciadi, li yàá tie yaa jawaaba kobinaa bebe n den jagini ti yuoyuodi ki sani yaa ka.

¹⁸ Davidi den gaa Amaleki yaaba n den fie yaala kuli. O den gaa o puoliediba moko.

¹⁹ Oba kuli ki den poadi a bila leni a nikpela siiga, bi a bonjala leni a bonpola siiga. Ti fagidi moko yaa siiga, liba kuli ki den poadi. Davidi den guani li kuli.

²⁰ Davidi go den gaa ti yanbidi leni a yangbenga kuli. Yaaba n den pigi li yangoli yeni den tua: «Davidi fagidi nne!»

²¹ Davidi den pundi yaa nikobiliedi n den coagi kaa fidi ki yegi leni ba, ban den ŋaa yaaba Besori kpenu kani yeni. Bi den fii ki tuogi Davidi leni yaaba n den yegi leni o. Davidi leni o toagoli den nagini ba ki buali ba bi yaa ye leni laafia.

²² Yaa nibiadiba leni yaa niyuogidi n den yegi leni Davidi den yedi: «Nani ban ki den yegi leni ti yeni, ti kan teni ba liba kuli tin fie yaala yeni siiga, li yàá tie yuakuli n gaa o pua leni o bila bebe yaa ka. Ban gaa bi ciba ki yaa caa.»

²³ Ama Davidi den yedi: «N kpiiba, da tieni mani yeni leni o Diedo n puni ti yaala, kelima wani n kubi ti. O den taa yaa toagoli n den baa ti ki teni ti.

²⁴ Ŋme n baa tuo yin yedi yaala ne? Yua n gedi bu toabu po leni yua n sedi ti tiadi kani kuli biini baa yaa da. Bi baa taani ki boagidi li kuli n yaa da.»

²⁵ Hali landaali, bi den tiendi yeni. Davidi den teni ke laa bontienkaala tua bali maama leni bogidili Isidayeli yaaba po hali dinla.

²⁶ Davidi n den guani Tisikilagi, o den boagidi o fagidi niinni ki soani ke bi ban puni o danlinba Juda nikpela, ki yedi ba: «Diidi ki le min ñani yi po yaa paabu tin fie o Diedo yibalinba kani yaala yaa niinni.»

²⁷ O den soani yeni Beteli, Ramoti dogu yuu n ye ganu po, Yatiri,

²⁸ Aroyeeri, Sifimoti,

²⁹ Esitemoa, Lakali, Jelaki-Meyeli leni Kena yaa dogi yaaba po.

³⁰ O go den soani Horima, Bori-Asani, Ataka,

³¹ Hebiron leni wani Davidi leni o niba n den gedi naani kuli yaaba po.