1 Samueli 21 - U TIENU MAAMA TILI 2013

¹ Lanwani, Davidi den fii ki ban yaa caa, Jonatan mo den guani ki kua u dogu nni.

Davidi sani ki gedi Nobi dogu

² Davidi den gedi Nobi dogu, o kopadiciamo Ahimeleki kani. O kopadiciamo yeni den jie hali boncianla ki sani ki tuogi Davidi, ki yedi o: «Be n teni ke a ye a bebe kaa pia yegininlieba?»

³ Davidi den guani ki yedi o kopadiciamo Ahimeleki: «O bado soani nni u tondu ki yedi nni ke oba kuli n da bandi wan soani nni yaa tondu leni wan teni nni yaa ñoamabonli. N bili mini leni n jawaaba n baa kadi naankani.

⁴ Moala a pia be a kani? Ŋan pa nni dupen bonbimuu, bi ŋan pia a kani yaala kuli.»

⁵ O kopadiciamo den guani ki yedi Davidi: «Mii pia dupenfano n kani, se yaa dupen n gagidi U Tienu po bebe, li yaa tie ke a jawaaba gagidi bi yula kaa taani leni puoba.»

⁶ Davidi den guani ki yedi o kopadiciamo: «Yeni de! Bi kuani ti tin da sii pua nani lan yen tie maama ti yaa caa toabu kuli. N jawaaba kuli gagidi. Ba li naa cenli yàá bi gagidi, dinla po wani, li tie yaali n gagidi.»

⁷ Lanwani, o kopadiciamo den taa o dupengagidika ki teni o, kelima dupenfano naa den ye likani, se yaa dupen n gagidi U Tienu po bebe, ban yen ñani yua o Diedo nintuali, ki lebidi ki bili dupenpaano landaali goga.

⁸ Li den sua ke Sayuli naacemo yendo ye likani landaali o Diedo nintuali. O den tie nilamo ki tie Edomi diema yua, ki yi Doyegi ki tie Sayuli yankpaaba yudaano.

⁹ Davidi den yedi Ahimeleki: «Ŋaa kubi a kani kpaanli, yaa ka jugisiega? Kelima o bado tondu n bua tontoni maama yaa po teni ke mii baa ki taa n jugisiega, bi jatiaguba kuli.»

¹⁰ O kopadiciamo den guani ki yedi o: «Diidi ki le Filisiti yua Goliati, ŋan den kpa yua telebinti tiidi n ye yaa joaloangu nni, o yaa jugisiega ye ne ki fini li cabili nni ki ye li cabilakaali puoli po. A yaa bua kani, ŋan taa, kelima jugisietoaga naa go ye ne.» Davidi den yedi: «Kaa pia ki lie, taa ka ki cuani ne!»

Davidi gedi Filisiti yaaba po

¹¹ Landaali liga Davidi den suagi liiga leni o nuama ki tiini ki foagidi leni Sayuli, ki gedi Filisiti yaaba dogu Gati yaa bado Akisi kani.

¹² Akisi badibaanba den yedi: «Wani Davidi, Isidayeli diema bado ka? Baa den yiini wani ka ki jeli ki tua: ‹Sayuli den kpa tudili tudili, Ke Davidi mo kpa tudipiiga piiga?› »

¹³ Davidi den kpaagi laa maama po ki jie Gati bado Akisi boncianla.

¹⁴ Lani, o den tieni nani o gaadi yeni ki tuuni li gaadituonli bi siiga. O den dangi a buliñoana po, ki cedi ke ti ñinsandi wuliti o langbiadi po.

¹⁵ Lani, Akisi den yedi o koanbala: «Yi nua ke o joa ne gaadi, be yaa po ke yi cuani o n kani?

¹⁶ Naani n luo a gaada yo ke yi cuani one n kani, ke min yaa nua o tuonyuogidi? One n kua n diegu nni?»