1 Samueli 14 - U TIENU MAAMA TILI 2013

Jonatan baa Filisiti yaaba toanagili

¹ Dayenli Sayuli bijua Jonatan den yedi yaa jawaalo n tugi o toatiadi: «Cua na tin suagi ki pundi Filisiti yaaba toanagibiga yaaga n ye ti nintuali.» Ama waa den waani o baa.

² Wani Sayuli den ye Gibeya tinbianu, naankani n yi Migron, ki kaa grenadie tibu tinga. Yaa toatieba n den ye leni o den tie nani jaba kobiluoba.

³ Ahitubi bijua Ahiya moko den ye leni o. Ahitubi yeni den tie Ikabodi kpelo, ki go tie Fineya bijua. Fineya mo den tie Eli bijua, yua n den tie U Tienu kopadiciamo Silo dogu nni. Ahiya den la bi kopadicianba bado n yen la yaa liadibiga. Bi toatieba naa den bani ke Jonatan fii ki gedi.

⁴ Jonatan n den bua ki mabidi naani ki pundi Filisiti yaaba toanagibiga kani den pia tanfoagalie. Tanfoagiyenli den ye jienu, line mo ganu. Yenli den yi Botisesi, li lieli mo Sene.

⁵ Tanfoagiyenli den ye jienu po ki tiegi Mikimasi, yenli mo den ye ganu po ki tiegi Geba.

⁶ Jonatan den yedi yaa jawaalo n tugi o toatiadi: «Cua tin suagi ki pundi a jifola yeni toanagibiga. Daalinba o Diedo baa todi ti, kelima liba kuli kan yie ke o Diedo kan teni tin paadi, ti yaa yabi bi ti yaa wa.»

⁷ Yua n tugi o toatiadi den yedi o: «Tieni a yama n bua yaala kuli, nani ŋan jagi maama a pali nni. Ŋan yedi tin gedi naani kuli n ye.»

⁸ Jonatan den yedi: «Lanwani daa, tin suagi ki pundi bi toatieba yeni kani ki doagidi ban le ti.

⁹ Bi yaa yedi ti: ‹Sedi mani hali tin cua ne›, ti baa yaa se tin ye naani, ti kan do ki gedi bi po.

¹⁰ Ama bi yaa yedi ti: ‹Do mani ki cua ne›, lani ti baa do ki gedi, kelima li baa yaa tie sinankeeni ke o Diedo taa ba ki tieni ti nuu nni.»

¹¹ Lanwani, bani nibilie den doagidi ke Filisiti toanagibiga yaaba laa ba. Filisiti yaaba den yedi: «Diidi ki le mani, Hebilu yaaba ña ban bi wuo yaa fali nni.»

¹² Lani, bi den yedi Jonatan leni yua n tugi o toatiadi: «Do mani ki cua ti kani ne, ti baa waani yi bonla.» Lane Jonatan den yedi yua n tugi o toatiadi: «Do ki yaa ŋua n puoli ne, kelima o Diedo taa ba ki tieni tinba Isidayeli yaaba nuu nni.»

¹³ Lanwani, Jonatan den gobindi o nii leni o taana ki do. Yua n tugi o toatiadi mo den ŋua o. Jonatan den muudi ki guliti Filisiti yaaba, yua n tugi o toatiadi mo den ŋua o puoli ki dudi ba.

¹⁴ Laa paadima nni Jonatan leni yua n den tugi o toatiadi n den kpa yaaba den pundi nani jaba piilie. Bi den kpa ba yaa fanma n ki fuu siiga.

¹⁵ Lane ti jawaandi den cuo yaaba n den ye Filisiti yaaba toanagili nni, a dobila nni leni bi toatieba kuli. Li toanagili yaaba leni yaaba n den goadi ki fenli kuli den digibi leni ti jawaandi, ki tinga mo den digibi. U Tienu n den teni ke laa jawaanciandi cuo ba.

Isidayeli yaaba paadi Filisiti yaaba

¹⁶ Sayuli doguudiba yaaba n den ye Gibeya, Benjamen diema nni, den laa ke Filisiti yaaba yadi ki tiini i kaani kuli.

¹⁷ Lanwani, Sayuli den yedi yaaba n ye leni o: «Yini mani bi toatieba ki le yua n ñani ti siiga ki gedi.» Bi den yini ki sua ke Jonatan leni yua n tugi o toatiadi ki ye likani.

¹⁸ Lane Sayuli den yedi Ahiya: «Cuani U Tienu kpaku ne.» Landaali li den sua ke U Tienu kpaku ye Isidayeli yaaba siiga.

¹⁹ Sayuli n den maadi leni o kopadiciamo yaa yogunu, ku fuugu den yabidi ki pugidi Filisiti yaaba toanagicianli nni. Sayuli den yedi o kopadiciamo: «Fuadi a nuu.»

²⁰ Lanwani, Sayuli leni yaaba n den ye leni o kuli den taani ki gedi bu toabu po. Bi den sua ke Filisiti yaaba muudi bi ŋmiali nni, ki kpaani biyaba, kelima mi gangima den yabidi bi siiga.

²¹ Li den sua ke Hebilu yaaba bi tianba ye Filisiti yaaba siiga ke li waagi ki ciani ba bu toabu. Bi den lebidi ki ŋaa Filisiti yaaba ki goa ki taani leni Isidayeli toatieba, yaaba n den ye leni Sayuli leni Jonatan.

²² Isidayeli yaaba siiga, yaaba mo n den wuoni Efrayimi juana kuli nni n den gbadi ke Filisiti yaaba tiini ki bua ki cia, bimoko den fii ki ŋua ki deli ba ki pua ba.

²³ Lani n tie o Diedo n den faabi Isidayeli yaaba maama landaali. Bu toabu den suagi hali ki pendi Beti-Afeni.

Isidayeli yaaba faabi Jonatan

²⁴ Landaali Isidayeli toatieba den coagi ki laa fala, kelima Sayuli den kuani ba li kuali ki poli ki yedi: «Yua n dini jiema ke u yienu daa baa, ke n daa guani n yibalinba bi panpaani, ti solindi n yaa ye leni o.» Lane ke bi toatieba siiga oba kuli ki den dini jiema.

²⁵ Bi toatieba kuli den pundi li fuali nni, ti siadi n dua naani.

²⁶ Ban den kua li fuali yeni niinni, bi den laa ke ti siadi cuudi. Ama oba kuli ki den tuo ki leni, kelima bi den jie Sayuli n den poli ki kuani ba yaa kuali.

²⁷ Ama Jonatan ki den bani o baa n kuani bi toatieba yaa kuali. Lane o den tandi wan kubi yaa gbiamu ki tuu ti siadi nni ki taa ki mabi. O nunbima den yendi.

²⁸ Bi toatieba siiga, yendo den yedi o: «A baa den poli ki kuani bi toatieba li kuali ki yedi: ‹Yua n dini jiema dinla kuli, U Tienu n pua o nufanu.› Lani n teni ke bi toatieba tadigi boncianla.»

²⁹ Jonatan den yedi: «N baa waani mi diema fala. Diidi ki le mani n nunbima n yendi maama, kelima n leni ti siadi na waamu.

³⁰ I moamoani, bi toatieba yaa bi dini ban fie ti yibalinba kani yaala dinla, tii bi baa paadi Filisiti yaaba ki cie tin paadi ba maama na te?»

³¹ Landaali bi den pua ki kpa Filisiti yaaba, ki cili Mikimasi ki pundi hali Ayaloni. Bi toatieba den coagi boncianla.

³² Lane bi den boagili ban den fie yaala. Bi den taa i pe, i ne leni a naabila ki kodi bikuli tiipo ki ŋmani leni mi soama.

³³ Lanwani, bi den waani Sayuli ki yedi: «Diidi ki le, bi toatieba tudi o Diedo po ki ŋmani ti nandi leni mi soama.» Sayuli den yedi: «Yi miidi U Tienu kuali. Lanwani, yin bindi mani moala moala li tancianli ki cuani li ne!»

³⁴ O go den yedi: «Yin gaani mani bi toatieba nni ki waani ba ke yuakuli n cuani o nua yaa ka o pia nekanba, ki kodi o ki ŋmani. Yeni yi kan go ŋmani leni mi soama ki tudi o Diedo po.» Lane yuakuli den dadi wan pia yaa yanga laa ñiagu ki cuani ki kodi ka li tancianli yeni po.

³⁵ Sayuli den maa li padibinbinli o Diedo po. Lini n tie wan den kpa maa yaali o Diedo po.

³⁶ Sayuli den yedi: «Tin fii mani yaa ñiagu n tie ne ki jiidi ki baa Filisiti yaaba, ki fagi ba hali lan ban faa. Tin da ŋaa bi siiga ba niyendo leni miali.» Bi toatieba den yedi: «Tieni ŋan bua maama kuli.» O kopadiciamo den yedi: «Cua mani ne tin buali U Tienu tin baa tieni yaala.»

³⁷ Lanwani, Sayuli den buali U Tienu: «Min fii ki jiidi ki baa Filisiti yaaba bi? A baa taa ba ki tieni tinba Isidayeli yaaba nuu nni?» Ama landaali U Tienu ki den guani o liba.

³⁸ Lane Sayuli den yini ki taani bi yudanba kuli ki yedi: «Lingi mani ki bandi yaa tagili n tieni dinla.

³⁹ Hali o Diedo yua n faabidi Isidayeli yaaba po, ba li yaa tie n bijua Jonatan n tieni laa tagili, o baa kpe.» Ama bi toatieba nni oba kuli ki den guani o liba.

⁴⁰ Lanwani, o den yedi Isidayeli yaaba kuli: «Yi kuli n taani mani poyendu, mini leni n bijua Jonatan mo baa sedi poyendu.» Bi toatieba den yedi Sayuli: «Tieni ŋan bua maama.»

⁴¹ Sayuli den yedi o Diedo: «Fini Isidayeli Tienu, teni tin bandi i moamoani.» Lani, tiatia den cuo Sayuli leni Jonatan, ke yaaba n sieni mo faabi.

⁴² Lanwani, Sayuli den yedi: «Go lu mani tiatia ki bandi mini leni n bijua Jonatan siiga lan tie yua.» Bi den luni ke li cuo Jonatan.

⁴³ Sayuli den yedi Jonatan: «Waani nni ŋan tieni yaala.» Jonatan den yedi o: «N bi tuu ti siadi leni min kubi yaa gbiamu ki leni waamu. Mini nna, n baa kpe.»

⁴⁴ Sayuli den guani ki yedi o: «Jonatan, a baa kpe. A yàá kpe, U Tienu n cuo nni o cuonbiadu.»

⁴⁵ Lane bi toatieba den yedi Sayuli: «Be? Jonatan kan kpe de! Wani yua n cuani tinba Isidayeli yaaba po laa faabicianma n kpe? Kalam! Hali o Diedo po, ba o yudi yuyengu kan baa tiipo, kelima o soani dinla leni U Tienu paalu yo.» Lani n tie bi toatieba n den faabi Jonatan maama, ke waa kpe.

⁴⁶ Lanwani, Sayuli den cedi ki naa go ŋoadi ki deli Filisiti yaaba. Bimo den kuni bi denpo bi diema nni.

⁴⁷ Sayuli n den dini li bali Isidayeli yaaba diema nni, o den caa i kaani kuli ki togidi leni o yibalinba kuli bu toabu, bani Moabi yaaba, Anmoni yaaba, Edomi yaaba, Tisoba badiba leni Filisiti yaaba kuli. Wan den gedi naankani kuli, o den paadi ba.

⁴⁸ O den koani mi jama ki paadi Amaleki yaaba ki faabi Isidayeli yaaba, yaaba n den fenli ba kuli nuu nni.

⁴⁹ Sayuli bijaba den tie Jonatan, Jisifi leni Malikisua. O den pia bisiabilie: o bisakpelo den yi Melabi, o lielo mo Mikali.

⁵⁰ Sayuli pua den tie Ahimaatisi bisalo ki yi Ahinoami. O guudikaaba yudaano den yi Abineri, o den tie Sayuli baa naataanu Neri bijua.

⁵¹ Sayuli baa Kisi leni Abineri yaa baa Neri den tie Abieli bijaba.

⁵² Sayuli bali bina kuli nni, o den togidi leni Filisiti yaaba bu toabu hali ke li bia. Sayuli yaa den laa gbanmandaano yua n pia papaali kuli, o yen taa o ki kuli o baa.