1 Korenti 7 - U TIENU MAAMA TILI 2013

Poli guani ba bi buali 7—15 Li ñiigili maama

¹ Moala n bua ki guani yi, yin den diani ki buali nni yaa maama. Li ŋani ke o joa n da taa pua.

² Ama nani mi conconma n yabi maama po yeni, li ŋani joa kuli n yaa pia o pua, pua mo kuli n yaa pia o calo.

³ O joa n yaa tiendi o pua po yaala n pundi, o pua moko n yaa tiendi o calo po yeni.

⁴ O pua ki die o gbanandi, o calo n die, o joa moko ki die o gbanandi, o pua n die.

⁵ Yin da yie mani yiyaba po, kali yikuli yaa juogi ki tuo ki bili u yogunu waamu i jaandi po. Lani yaa pendi, yin guani ki taani leni yiyaba ke Sutaani n da tulini yi, kelima yi gbali yi gbanandi kubima.

⁶ Min maadi yeni, laa tie ke n bili yi po yin baa yaa tiendi yaala ka, li tie sanbili yo.

⁷ N bi bua ke nilo kuli n yaa tie nani min tie maama na. Ama nilo kuli baa U Tienu kani yaa paabu n ki taa leni o lielo. Niyendo baa yaa paabu n baa fidi ki tieni line, nitoa mo line.

⁸ Moala n maadi yaaba n daa tieni ñiigili leni a kpepuona po. Li baa yaa ŋani bi po ban yaa ye yeni, ki tie nani min tie maama.

⁹ Ama bi yaa kan fidi ki kubi bi gbanandi, ban tieni li ñiigili, kelima bi yaa tieni li ñiigili, li ŋani ki cie bi gbanandi n yaa fiidi, ki juugi ba nani u mu yeni.

¹⁰ N bili mi naa maama yaaba n tieni li ñiigili po. Mini ka bili ma, o Diedo n bili ma. O pua n da ña o calo kani.

¹¹ O yaa ñani o kani, wan da go kuni jatoa, wan yaa ye obebe. Lani yaa ka, wan guani ki mangi leni o calo. Joa mo n da ñani o pua.

¹² Moala n maadi yaaba n sieni po, mini n maadi, o Diedo ka. Ti kpiilo yendo yaa pia yaa pua n ki daani, ama ki tuo ki ye leni o, wan da ñani o.

¹³ Yaa pua n pia o calo ke waa tuo ki daani, ama ki tuo ki baa yaa ye leni o, wan da ña o kani.

¹⁴ Yaa joa n ki daani baa mi gagidiŋanma kelima o pua po. Yaa pua n ki daani mo baa mi gagidiŋanma kelima o calo po. Lani yaa ka, yi bila bi baa yaa joagini. Ama lani n tie maama yeni, bi gagidi ki ŋani.

¹⁵ Die yua n ki daani yaa bua ki ña, ban cedi wan ña. O yaa ñani, ti kpiiba, lan tie joa bi pua, o faabi leni laa lolima, kelima U Tienu yini ti ke tin yaa ye leni mi yanduanme.

¹⁶ Fini o pua, a bani lede ke a baa faabi a calo? Fini o joa mo, a bani lede ke a baa faabi a pua?

Yuakuli n ye nani U Tienu n yini o maama

¹⁷ Lanwani, bonyenla bebe n ye, yuakuli n yaa ye nani o Diedo n puni o maama, ki ŋoadi wan den tie maama U Tienu n yini o yaa yogunu. Lani n tie min biliti yaala Kilisiti Nitaana nni, i kaani kuli po.

¹⁸ O nilo yaa den kua ku koanciagu U Tienu n yini o yaa yogunu, wan da lingi ki bolini ku koanciagu maalima. Yua n ki den kua U Tienu n yini o yaa yogunu mo, wan da kua.

¹⁹ O nilo yaa kua leni o yàá kua, laa tie puu, ama U Tienu mabilikaama kubima n tie likuli.

²⁰ Nilo kuli n yaa tie wan den tie maama, U Tienu n den yini o yaa yogunu.

²¹ A yaa den tie yonbo U Tienu n yini a yaa yogunu, lan da yagi a yama. Ama a yaa baa fidi ki faabi, ŋan moandi ki faabi a yuli.

²² Yua n tie yonbo o Diedo n yini o yaa yogunu, o Diedo faabi o ke o tua o yua. Yua n die o yuli mo U Tienu n yini o yaa yogunu, tua Kilisiti yonbo.

²³ U Tienu den daa yi yaa dunga n pa, lanwani da tua mani bi nisaaliba yonbi.

²⁴ N kpiiba, yuakuli n yaa tie U Tienu kani wan den tie maama, U Tienu n den yini o yaa yogunu.

Yaaba n ki ñiigi leni a kpepuona maama

²⁵ Yaala n tie yaaba n kaa tieni ñiigili nani yin den buali nni maama po, mii pia o Diedo mabilikaama laa maama po. Ama n baa waani yi min sua yaala, mini yua ke o Diedo teni ke n tua nidugika, kelima o ninñingbadima po.

²⁶ N sua ke li baa yaa ŋani, kelima yaa fala n kpendi po, o nilo n yaa tie wan tie maama.

²⁷ A yaa pia pua, ŋan da moandi ke a baa ñani o. A yàá pia pua, ŋan da lingi ki taa.

²⁸ Ama a yaa taa pua, ŋaa tieni tuonbiadi. O jafaano mo yaa kuni joa, waa tieni tuonbiadi. Ama yaaba n tieni li ñiigili baa yaa laadi fala o naa jamaano nni. Li tie lani yaa po ke n bua ki todi yi, yin da kua laa fala nni.

²⁹ N kpiiba, min bagi yaala tie ke yaa yogunu n sieni koabi. Lanwani, dinla liiga, yua n pia pua, n yaa ye nani waa pia yeni.

³⁰ Yaaba n buudi, n yaa ye nani baa buudi yeni. Yaaba n pia li pamancianli, n yaa ye nani baa pia yeni. Yaaba n daa bonla, n yaa ye nani baa die ban daa yaala.

³¹ Yaaba n pia i ŋantaadi leni ŋanduna bonla, n yaa ye nani laa bonla ki tie bi po tiladi, kelima ŋanduna yua n ye moala ne caa ki baa juodi.

³² N bua yin yaa ye ki da pia yanyagidi. Yua n ki pia pua kuandi o yama o Diedo ŋantaadi nni, ki lingi wan baa yaa mangidi o Diedo pali maama.

³³ Yua n pia pua mo kuandi o yama ŋanduna ŋantaadi nni, ki lingi wan yaa baa mangidi o pua pali maama.

³⁴ Lani n teni ke o puodaano yama boagidi kaanilie. O pua moko, yua n ki pia joa leni yua n daa bani joa, bimoko kuandi bi yama o Diedo ŋantaadi nni, ki moandi ki gagidi bi ki ŋanbi bi gbanandi leni bi yantiali nni. Yua n kuni o joa, kuandi o yama ŋanduna ŋantaadi nni, ki lingi ki baa yaa mangidi o calo pali.

³⁵ N maadi lani kuli ki bua ki todi yi. Laa tie ke n bua ki dia yi ku diagu ka. N bua yin yaa ŋua o Diedo nani lan dagidi maama, ki bua o, ki yaa taabi o leni payenli.

³⁶ O nilo yaa pia o toginaa ke o dagidi li calinkpenli, ke o sua ke o kan fidi ki juuni, wan tieni wan sua maama n dagidi. Ban taa biyaba. Bi yaa tieni yeni, baa tieni tuonbiadi.

³⁷ Ama yua n jagi ki bili o yama nni, ke o baa fidi ki juuni, ki kan sii o toginaa, o yaa sua ke o baa fidi ki tieni nani wan den jagi maama, o ŋanbi leni wan kan sii o toginaa.

³⁸ Lanwani, yua n taa o toginaa, o tieni yaala n ŋani. Ama yua n juuni kaa sii o toginaa, wani n tieni yaala n ŋani ki cie.

³⁹ O pua luo leni o calo, o calo n ye yaa yogunu, ama o calo yaa ti kpe, o pua yeni faabi leni yaala n bi luo o. O baa fidi ki kuni wan bua yua kuli. Die wan yaa tie Kilisiti nilo.

⁴⁰ Ama min sua ke yaala n baa yaa mani o po ki cie, n tie wan yaa ye o kpepuodi nni, ki da go kuni joa. N yedi yeni, kelima n tama ke nmoko pia U Tienu Fuoma.