1 Korenti 16 - U TIENU MAAMA TILI 2013

Poli jaga leni i fuondijuodike 16 Mi todima bi nigagidiŋanba po

¹ Yaala n tie mi ligitaanma bi nigagidiŋanba todima po, yimoko n tieni nani min den bili Kilisiti Nitaana, ya n ye Galati diema nni po maama.

² Aŋada daali kuli, yi siiga yuakuli n yen bili o denpo wan fidi yaala nani o bonpiakaala n pundi maama, ki da guudi n cuama yogunu ki tieni mi ligitaanma.

³ N yaa cua, n baa diani a tila Jerusalemi yaaba po, ki teni yin gandi yaa nidugikaaba, ki soani ba ban gedini yi paabu Jerusalemi.

⁴ Li yaa pundi mini n ba n gedi, bi baa yegi leni nni.

Poli n jagi ke o baa gedi yaa kaani

⁵ N yaa poandi Maseduani diema nni, n baa cua yi kani. N jagi ke n baa poandi Maseduani nni.

⁶ Daalinba n baa waagi leni yi, li fidi min pundi ti wadi yogunu, ke yin todi nni leni n cenli, min baa gedi naankani kuli.

⁷ Mii bua ki le yi moala ki pendi tontoni, ama o Diedo yaa tuo, n sugini ki waagi leni yi waamu.

⁸ Ama n da baa yaa ye Efesi na, hali Pantekoti jaanma n pundi,

⁹ kelima u sanu luodi n tuonli po, ama yibalinba yabi.

¹⁰ Li yaa tie ke Timote cua yi kani, yin gaa o cangu bonŋanla ke wan da bangi liba yi siiga, kelima o tuuni o Diedo tuonli nani mini yeni.

¹¹ Oba kuli n da fali o. Yin todi o o cenli nni, ki cabi o leni mi yanduanma, wan guani ki cua n kani. N guu wan taani leni ti kpiiba ki cua.

¹² Ti kpiilo Apolosi yaa maama po, n den tigini o ke wani leni ti kpiiba n yegi ki gedi yi kani, ama waa bua ki cua yi kani moala. O yaa ti baa u sanu, o baa cua.

I tundijuodike leni i fuondi

¹³ Yin yaa guu mani, ki yaa se ke li pa li dandanli nni. Tua mani jaba, ki paagi mani yiba.

¹⁴ Yi siiga, li bonla kuli n yaa tiendi leni mi buama.

¹⁵ N kpiiba, n go pia mayenma. Yi bani ke Sitefana leni o deni yaaba kuli tie yaaba n den kpa daani Jesu Akayi diema nni. Yi go bani ke bi puni bi yula, ki todi bi nigagidiŋanba.

¹⁶ Yin miini yi yula laa nibuolu kani leni yaaba n kuani bi yama ki tuuni o Diedo tuonli kuli kani.

¹⁷ Sitefana, Fortunatusi leni Akayikusi cuama mangi n pali. Bi tieni n po yin bi baa tieni n po yaala kuli.

¹⁸ Bi duani n yama, ki mangi n pali ki go tieni yeni yimoko yaa po. Yin pagi mani laa nibuolu.

¹⁹ Kilisiti Nitaana Asi diema nni kuli fuondi yi. Akilasi, Prisili leni Kilisiti Nitaanli, yaali n taandi bi diegu nni, fuondi yi o Diedo nni.

²⁰ Ti kpiiba yaaba n ye nekanba kuli fuondi yi. Fuondi mani yiyaba, ki gobini yiyaba leni mi buamoanma.

²¹ Mini Poli, n diani n fuondi na leni n nuceli.

²² Yua n kaa bua o Diedo kuli, wan tua ti solindi yua. Ti Diedo, ŋan cua!

²³ O Diedo Jesu yaa ŋanbili n yaa ye leni yi.

²⁴ N bua yikuli Jesu Kilisiti nni.