1 Korenti 15 - U TIENU MAAMA TILI 2013

Kilisiti fiima bi tinkpiba siiga

¹ N kpiiba, n bua ki go tiadi yi min den kpa waani yi yaa Laabaaliŋamo, yin den gaa yua, ki se lienni bonŋanla.

² Yi tindi kelima o Laabaaliŋamo yeni po, li yaa tie ke yi kubi o nani min den waani yi maama. Yeni yaa ka yi dandanli moko tie fanma fanma.

³ N den kpa waani yi mini n ba n den baa yaa bangima, lani n tie ke Kilisiti den kpe ti yaa tuonbiadi po nani i Diani n yedi maama.

⁴ Bi den piini o, li dataali daali o den fii bi tinkpiba siiga, nani i Diani n yedi maama.

⁵ O den doagidi o yuli Pieli po, ki go doagidi bi piiga n niliediba po.

⁶ Lani n pendi, o go den doagidi o yuli ti kpiiba yaaba n den taani ki cie niba kobimuu po. Bi siiga boncianla da ye, ama bi tianba wani kpe.

⁷ Lani n pendi, o den doagidi o yuli Jaki po, ki yuandi ki doagidi bi tondiba kuli po.

⁸ O den juodi ki doagidi o yuli mini mo yaa po, mini yua n tie nani ki bikaaga yeni.

⁹ Moamoani, n tie Jesu tondiba kuli siiga puoli yua, mii pundi ban yini nni Jesu tondo moko, kelima n den wangi U Tienu Nitaanli fala.

¹⁰ U Tienu ŋanbili po yo, ke n tua min tie yua na. O ŋanbili n po naa tua fanma, li teni ke n soani ki cie Jesu tondiba kuli. Laa tie mini n ba ka soani yeni, ama U Tienu ŋanbili n tuuni leni nni.

¹¹ Lanwani, lan tie mini, bi lan tie bani, tikuli wangi yi laa Laabaaliŋamo, yimo den tuo ki daani wane.

Bi tinkpiba fiima

¹² Lanwani, li yaa tie ke ti wangi ke Kilisiti fii bi tinkpiba siiga, li gaa lede ke yi siiga tianba nia ke bi tinkpiba fiima ki ye?

¹³ Bi tinkpiba fiima yàá ye, Kilisiti moko naa den fii bi tinkpiba siiga.

¹⁴ Kilisiti yàá den fii mo, ti mawangima tie fanma fanma, yi dandanli moko tie fanma fanma.

¹⁵ Li yaa tie ke bi tinkpiba kan fii, ti tie siedi-tuofaadanba U Tienu po, kelima ti tieni o po siedi ke o fiini Kilisiti bi tinkpiba siiga, ke o naa fiini o.

¹⁶ Bi tinkpiba yaa kan fii, Kilisiti moko naa den fii bi tinkpiba siiga.

¹⁷ Kilisiti mo yàá den fii bi tinkpiba siiga, yi dandanli tie fanma fanma, yi da ye yi tuonbiadi nni,

¹⁸ yaaba n daani Kilisiti ki kpe moko bodi.

¹⁹ Li yaa tie ke ti dugidi Kilisiti po tie o naa jamaano bebe po, ti yema pia mi ninñima ki cie bi niba kuli.

²⁰ Ama moamoani, Kilisiti fii bi tinkpiba siiga, ki tie o nikpialo ki tie siedi ke yaaba n kpe kuli baa fii.

²¹ Lanwani, kelima mi kuuma n den cua kelima o nisaalo yaa po, yeni moko bi tinkpiba fiima cua kelima niyendo yaa po.

²² Nani bi niba kuli n kpe kelima Adama po maama, yeni bi niba kuli go baa baa li miali kelima Kilisiti yaa po.

²³ Ama yuakuli o kaanu, Kilisiti o kpialo, li yaa puoli, wan cua yaa yogunu, yaaba n tie o yaaba baa fii.

²⁴ Li yaa puoli, mi juodima yogunu baa cua. Kilisiti baa paadi ki bolini batoali kuli leni paato kuli leni paacianto kuli ki teni U Tienu yua n tie Baa mi diema kuli.

²⁵ Kelima li tie tiladi ke Kilisiti n yaa die hali U Tienu n teni wan ŋmaa o yibalinba o taana tiipo.

²⁶ Wan baa juodi ki bolini yaa yibali tie mi kuuma.

²⁷ Moamoani U Tienu den teni ke Kilisiti die li bonla kuli ki ŋmaa la ki diedi likuli. Ama lan yedi ke o teni ke Kilisiti die li bonla kuli yeni, li doagidi ke yua n teni ke o die li bonla kuli naa taa laa bonla nni.

²⁸ Li yaa tie ke Kilisiti diedi li bonla kuli yaa yogunu, wani U Tienu Bijua baa miini o yuli ki tuo ke yua n den teni ke o die likuli yeni n yaa die o, ke U Tienu n yaa tie likukuli li bonla kuli nni.

²⁹ Bi tinkpiba fiima yàá ye, ban batisi yaaba kelima yaa niba n kpe yaa po baa baa li po be? Li yaa tie moamoani ke bi tinkpiba kan fii, be yaa po ke nitoaba batisi bani yaaba n kpe po?

³⁰ Tinba mo, be yaa po ke ti ye mi yebiadima nni yogunu kuli?

³¹ N kpiiba, li tie moamoani ke n ye mi kuuma nni daali kuli, ama yinba n tie pamancianli ti Diedo Jesu Kilisiti kani.

³² Min den koani leni ti moayandi Efesi po yeni, li yaa tie ke bi niba n nua maama bebe po, n den baa be yaa ñuadi lienni? Li yaa tie ke bi tinkpiba kan go fii, lanwani: Tin je mani ki go ño, kelima saala ti baa kpe.

³³ Lan da boani yi: “U yeginbiadu n baa biidi li yantiaŋanli.”

³⁴ Yin go baa mani li yantiaŋanli nani lan pundi maama, ki cedi ki da go tiendi tuonbiadi, kelima yi siiga tianba naa bani U Tienu. N maadi yeni, ke i fe n cuo yi li po.

Bi tinkpiba n baa fii leni yaa gbanandi

³⁵ Daalinba niloba baa buali: «Bi tinkpiba baa fii lede? Bi baa guani ki cua leni be yaa gbananbuolu?»

³⁶ Fini o yanpiidaano, ŋan buli yaala yàá kpe, li kan pudi.

³⁷ Ŋan buli yaala ke li tie bonbibu, bi dibima, bi bonbuotoe, laa tie ŋan go baa le yaala.

³⁸ U Tienu puuni bonbibu kuli wan bua yaa gbanandi buolu. O puuni bonbibu kuli bu gbanandi buba.

³⁹ Ti gbanandi buoli kuli naa tie yenma. Bi nisaaliba gbanandi ye tiba, ti yandi gbanandi ye tiba, ti bonyugiditi gbanandi ye tiba, i jami yaa gbanandi mo ye tiba.

⁴⁰ Tanpoli yaa gbanandi ye, ki tinga mo yaa gbanandi ye. Tanpoli yaa yaadi kpiagidi naa taa leni ki tinga yaadi yaa kpiagidi.

⁴¹ U yienu pia u kpiagidi uba, o ŋmaalo pia o kpiagidi oba, a ŋmabila pia a yaa kpiagidi aba. A ŋmabila moko naa taa kpiagidi buolu leni aya.

⁴² Bi tinkpiba fiima mo baa yaa tie yene. Bi buli ti gbanandi ke ti tie bonbedikaadi, ama ti go baa fii kaa go pia bedima.

⁴³ Bi buli ti ke ti gundi, ama ti baa guani ki fii ki pia ti kpiagidi. Bi buli ti ke ti tadi, ama ti baa guani ki fii ki pia u fidu.

⁴⁴ Bi buli ti ke ti tie nisaali-gbanandi, ama ti fii leni U Tienu Fuoma yaa miali. Li yaa tie ke ti nisaali-gbanandi ye, yaa gbanandi n pia U Tienu Fuoma miali moko ye.

⁴⁵ Li tie yeni ke li diani ki yedi: O nikpialo Adama den tua yaa miali n fo. Ama Adama juodika tie yaa Fuoma n puuni li miali.

⁴⁶ Laa tie tanpoli yua ka den kpia, ama ki tinga yua, ke tanpoli yua yuandi ki cua.

⁴⁷ O nikpialo den ñani ki tinga tama nni, ki tie ki tinga yua, o nilielo ñani tanpoli.

⁴⁸ Tinga nni yua n tie maama, tinga nni yaaba mo kuli tie yene. Tanpoli po yua n tie maama, tanpoli yaaba mo kuli tie yene.

⁴⁹ Nani tin pia ki tinga yua yaa nannanli maama, ti go baa baa tanpoli po yua yaa nannanli yene.

⁵⁰ N kpiiba, min yedi yaala tie ke ti gbanandi leni mi soama kan je li faali U Tienu diema nni, yaala n baa bedi mo kan je yaala n kan bedi faali.

⁵¹ Diidi mani, n baa doagidi yi po li bondoaginkaala. Tikuli ka baa kpe. Ama tikuli baa lebidi.

⁵² Li baa tieni yenma nani ku nungbangu kabima yeni, o kakaci-juodika yaa piebi yaa yogunu. Kakaci yaa piebi, yaaba n kpe baa fii, ki kaa go pia mi bedima, lani, timo baa lebidi.

⁵³ Li tie tiladi ti naa gbanandi yaadi n baa bedi, n lebidi ki tua yaadi n kan bedi. Li tie tiladi ti naa gbanandi yaadi n baa kpe, n lebidi ki tua yaadi n kan kpe.

⁵⁴ Lanwani, yaa gbanandi n baa bedi yaa lebidi ki tua yaadi n kan bedi, ke yaa gbanandi n baa kpe mo lebidi ki tua yaadi n kan kpe, lanyogunu yaa maama n diani na baa tieni ki dudi: Bi paadi mi kuuma ki bolini ma cain.

⁵⁵ Mi kuuma, a paalu ye le? Mi kuuma, a bonjunkaala go ye le?

⁵⁶ Mi kuuma bonjunkaala n tie ti tuonbiadi. Ti tuonbiadi paalu mo n tie li bali maama.

⁵⁷ Ama tin tuondi U Tienu yua n teni ke ti paani li bonla kuli, kelima ti Diedo Jesu Kilisiti po.

⁵⁸ Lanwani n kpibuadiba, yin yaa se mani bonŋanla ki da lengidi. Yin yaa suagi mani liiga o Diedo tuonli nni yaa yogunu kuli, ki bani ke yi tuonli o Diedo po kan tua fanma.