1 Korenti 14 - U TIENU MAAMA TILI 2013

U Tienu Fuoma Yua paabu leni bu tuonli

¹ Yin moandi ki yaa pia mi buama. Yin yaa lingi U Tienu Fuoma Yua paabu moko, ama yin yaa lingi mi mawangima yaa paabu ki cie.

² Yua n maadi mi malanma, waa maadi leni bi niba, o maadi leni U Tiene, kelima niloba kuli ki gba wan tua yaala. U Tienu Fuoma Yua paalu teni ke o maadi U Tienu bondoaginkaala.

³ Ama yua n wangi U Tienu n yedi o yaala maadi leni bi niba, ki todi ba ke bi suagi liiga, ki tundi ba ki paagidi bi pala, ki go baagidi ba.

⁴ Yua n maadi mi malanma todi o yuli bebe. Ama yua n wangi U Tienu n yedi o yaala todi Kilisiti Nitaanli kuli.

⁵ N bua ke yikuli n yaa maadi mi malanma, ama n bua yin yaa wangi U Tienu n yedi yaale ki cie. Yua n wangi U Tienu n yedi yaala cie yua n maadi mi malanma, li yàá tie ke o soagini wan yedi yaala ke Kilisiti Nitaanli n baa mi todima lienni yaa ka.

⁶ N kpiiba, li baa yaa pia yi po be yaa fuome n yaa cua yi kani ki maadi yi mi malanma, ki naa doagidi yi po bondoaginkaaliba, bi bandimiba, bi U Tienu n yedi yaala, yaa ka bangimiba?

⁷ Ba yaa bonla n kaa fo ki nan pia u nialu, nani ki yeliga leni ku gogidigu, li yaa tiendi yaa fuugu n ki pia gagidima, bi niba baa gaa lede ki bandi ban piebi yaala, bi ban pua yaala?

⁸ Yua n piebi kakaci yàá piebi ke li gagidi bu toabu po, ŋme n baa bandi ki bogini bu toabu po?

⁹ Likuli tie yenma leni yinba. Yi yaa maadi mi malanma kaa maadi ban baa fidi ki gbadi yaala, bi baa gbadi yin maadi yaala lede? Yi baa yaa maadi mi fawaama nni bebe.

¹⁰ Ba ke i mabuoli yabi ŋanduna nni, yaa maama n ki pia bundima ki ye.

¹¹ O nilo yaa maadi min kaa bani yaa mabuolu, n baa yaa tie o po nilamo, omoko baa yaa tie n po nilamo.

¹² Lanwani, yinba mo, nani yin lingi U Tienu Fuoma Yua paabu leni li yankuali yeni, lan yaa tie Kilisiti Nitaanli todima po yo ke yi lingi ki baa boncianla.

¹³ Lani yaa po, yua n maadi mi malanma, n mia U Tienu wan pa o wan fidi ki soagini wan yedi yaala.

¹⁴ N yaa jaandi ki maadi malanma, n pali ye i jaandi nni, ama n yantiali naa ye lienni.

¹⁵ Lanwani, n baa tieni lede? N baa jaandi leni U Tienu Fuoma, ama n baa yaa jaandi leni n yantiali mo. N baa yaa yiini leni U Tienu Fuoma, ama n baa yaa yiini leni n yantiali mo.

¹⁶ A yaa tuondi U Tienu a pali nni, yua n kua yi nitaanli nni ki naa bani laa bonla, baa gaa lede ki gaa “Amina”, kelima o naa bani ŋan tua yaala?

¹⁷ Moamoani, a tuondi U Tienu bonŋanla, ama laa todi a lielo wan suagi.

¹⁸ N tuondi U Tienu ke n maadi mi malanma ki cie yikuli.

¹⁹ Ama Kilisiti Nitaanli siiga, n yaa maadi maamimuu ke mi pia mi bundima, ki baa fidi ki bangi nitoaba, lani n cie n po min maadi malanma, maama tuda piiga (10 000).

²⁰ N kpiiba, da kpaagi mani nani a biwaala yeni. Li bonbiadila yaa po, yin yaa tie nani a canpanda yeni, ama yi kpaagili nni, yin yaa tie nikpela.

²¹ I Diani waani ke o Diedo yedi mi naa maama: «N baa soani nibuotoe n niba kani, Ki teni bi nilanba n maadi ba mi malanma, Ki yaa wangi ba n maama. Ba yeni, bi kan cengi n maama.»

²² Lanwani, mi malanma tie sinankeene yaaba n daa tuo ki daani po. Maa tie yaaba n daani yaa po, ama mi mawangima tie sinankeene yaaba n tuo ki daani po.

²³ Lanwani, Kilisiti Nitaanli kuli yaa taani ki maadi mi malanma, yaaba n kaa bani laa bonla leni yaaba n daa tuo ki daani yaa kua yi siiga, baa baa yedi ke yi gaadi ka?

²⁴ Ama li yaa tie ke bikuli wangi U Tienu maama, ke yua n ki tuo ki daani, bi yua n bani kua yi siiga, li baa doagidi o po ke o tie tuonbiadi daano, wan gbadi yaala mo n cuo o pali.

²⁵ Yaala n wuo o pali nni kuli baa wuodi. Lanwani, o baa labini U Tienu nintuali, ki kpiagi o, ki yedi ke U Tienu ye yi siiga moamoani.

Li taanli nni ŋamu

²⁶ N kpiiba, ti baa tieni lede? Yi yaa taani, one baa yaa pia bu yanbu, one mi bangima, one mi doagidima, one mi malanma, one mi malanma soaginma. Likuli n tieni ke Kilisiti Nitaanli n baa mi todima.

²⁷ Li yaa tie ke bi niba cili ki maadi mi malanma, nibilie, bi nibitaa, baa fidi ki maadi yendo yendo ki ŋoadi biyaba, niyendo mo n soagini.

²⁸ Li yàá pia yua n baa soagini, yua n bua ki maadi mi malanma n yaa ŋmini Kilisiti Nitaanli nni, ki maadi ma o yuceli po leni U Tienu po.

²⁹ U Tienu mawangikaaba moko, nibilie, yaa ka nibitaa, n yaa wangi U Tienu maama, yaaba n sieni n yaa biigidi ban maadi yaala.

³⁰ Yaaba n kaa ki cengi yeni siiga, niyendo yaa baa doagidima, yua n bi kpa maadi n ŋmini.

³¹ Yikuli baa fidi ki waani U Tienu maama yendo yendo ki ŋoadi yiyaba, ke yikuli n baa mi bangima leni i tundi U Tienu sanŋoadima nni.

³² Bi mawangikaaba n die bi yama,

³³ kelima U Tienu naa tie sisindi sindi Tienu ka, ama mi yanduanma Tienu. Nani lan tie maama bi nigagidiŋanba taana kuli nni,

³⁴ li pundi bi puoba n yaa ŋmini a taana nni, kelima baa pia sanu ki maadi lienni. Ama ban yaa miindi bi yula, nani li bali maama moko n bili maama.

³⁵ Bi yaa bua ki bandi bonliba, kali ban buali bi ciaba bi denpo, kelima laa pundi o pua n maadi Kilisiti Nitaanli siiga.

³⁶ U Tienu maama den ñani yi yaa kani yo? Bi mi den cua yinba bebe yaa kani yo?

³⁷ Niloba yaa tama ke o tie mawangika, bi ke U Tienu Fuoma ye o niinni, wan faami bonŋanla ke min diani yi po yaala na tie o Diedo ñoamabonle.

³⁸ O yaa yie kaa tuo, cedi o mani!

³⁹ Lanwani n kpiiba, yaa kuandi mani yi yama ki bua ki baa ki yaa wangi U Tienu maama. Yin da yie ban maadi malanma mo.

⁴⁰ Ama li bonla kuli n yaa tiendi ke li ŋua li fuuli, ki da cuoni sisindi sindi.