1 Korenti 12 - U TIENU MAAMA TILI 2013

U Tienu Fuoma paabu

¹ N kpiiba, yaala n tie U Tienu Fuoma paabu yaa po, mii bua lan yaa boani yi.

² Yi bani ke yin kaa den daani yaa yogunu, yi den tuodi ke bi dia ki caani yi i buli yii n ki maadi po.

³ Lanwani, n kadi ki waani yi ke U Tienu Fuoma Yua n gobidi yuakuli kan yedi: Jesu tie ti solindi yua, oba kuli mo kan yedi: «Jesu n tie o Diedo,» kali U Tienu Fuoma Yua n gobidi yua.

⁴ Bu paabu buoli yabi, ama Fuoyenma n puuni likuli.

⁵ I todibuoli moko yabi, ama o Diedo yua n die likuli tie yendo.

⁶ I tuonbuoli yabi, ama Tienyendu n tuuni laa tuona kuli bi niba kuli nni.

⁷ Yuakuli baa U Tienu Fuoma doagidima li nitaanli kuli todima po.

⁸ O Fuoma puni niyendo mi yanfuomaama. Mi Fuoyenma yeni go puni nitoa mi bancianma maama.

⁹ Mi Fuoyenma yeni n puni niyendo li dandanli, ki go puni nitoa mo wan yaa paagidi a yiama.

¹⁰ O puni niyendo ke o baa fidi ki yaa tiendi mi bancianma, ki go puni nitoa ke o baa fidi ki yaa wangi U Tienu maama, ki puni nitoa goga U Tienu Fuoma leni mu cicibiadimu gagidima paabu. O puni mi malanma paabu ki go puni nitoa mi malanma soaginma paabu.

¹¹ Laa Fuoyenma n tuuni laa tuonbuoli kuli, ki puuni nilo kuli oba, nani wani o ba n bua maama.

Gbananyendi leni ti buoli

¹² Nani ti gbanandi n tie yenma ki nan pia yaa gbananbuoli n yabi, tikuli taani ki tie gbananyendi, ba ke ti buoli yabi. Li tie yene leni Kilisiti.

¹³ Bi den batisi tikuli mi Fuoyenma yeni yaa niinni, ke tin tua gbananyendi. Tin tie Jufinba, nilanba, yonbi, bi yaaba n die bi yula, U Tienu puni tikuli ke ti baa ki ñuni Fuoyenma yaa kani.

¹⁴ Lani yaa po, ti gbanandi naa tie gbanan-buoyendu bebe ka, ama gbananbuoli boncianla.

¹⁵ Li yaa tie ke li taali yedi: «Min ki tie nuu yeni, mii taa ti gbanandi nni.» Lani kan teni ke li kaa taa ti gbanandi nni.

¹⁶ Li yaa tie ke li tubili mo yedi: «Min ki tie nunbu yeni, mii taa ti gbanandi nni.» Lani kan teni ke li kaa taa ti gbanandi nni.

¹⁷ Li yaa tie ke ti gbanandi kuli bi tie nunbu bebe, mi gbadima bi baa yaa ye le? Bi tikuli yaa bi tie tubili bebe, ti baa yaa gba u nuulu lede?

¹⁸ Moamoani U Tienu bili gbananbuolu kuli uba uba ti gbanandi nni, nani wan bua maama.

¹⁹ I gbananbuoli yeni kuli yaa bi tie gbanan-buoyendu bebe, ti gbanandi bi baa yaa ye le?

²⁰ Ba ke i gbananbuoli yabi, ti gbanandi tie gbananyendi.

²¹ Lanwani, bu nunbu naa pia sanu ki yedi u nuu: «Mii pia leni a ŋantaadi.» Li yuli mo naa pia sanu ki yedi a taana: «Mii pia leni yi ŋantaadi.»

²² Ama yaa gbananbuoli n naani ke i tadi ki cie moko tie tiladi.

²³ Yaa gbananbuoli n ki pia jigidi ti gbanandi nni, ti jigindi ti boncianla. Yaa gbananbuoli n ki pia jawaama, ti tiani i po ki kubi yi leni li fangili.

²⁴ Yaa gbananbuoli n pia mi jawaama mo, yii bua puginma. U Tienu den tagi ti gbanandi ki taani ti buoli, ki teni ke yaa gbananbuoli n ki pia jigidi n baa ti jigidi ki pugini.

²⁵ O den tieni yeni ke mi paadima n da ye ti gbanandi nni, ama gbananbuoli kuli n yaa bua ki todi iyii yenma.

²⁶ Gbanan-buoyendu yaa laadi fala, i gbananbuoli kuli taani leni u laa fala nni. Gbanan-buoyendu yaa baa ti jigidi, i gbananbuoli kuli mangi i pala leni u.

²⁷ Yikuli taani ki tie Kilisiti gbanandi, yi siiga yuakuli tie o gbananbuoli.

²⁸ U Tienu kpa bili Kilisiti Nitaanli siiga bi tondiba, miliema bi saawalipuaba, mitaama bi bangikaaba. Li yaa puoli, li pia yaaba n baa mi bancianma paabu, tianba baa a yiama paagima paabu, tianba mi todima paabu, tianba mi gobidima paabu, tianba malanma maama paabu.

²⁹ Bikuli tie tondiba bi? Bikuli tie saawalipuaba bi? Bikuli tie bangikaaba bi? Bikuli tiendi mi bancianma bi?

³⁰ Bikuli baa a yiama paagima paabu yo? Bi ki maadi mi malanma yo? Bi ki fidi ki soagini mi malanma yo? Yeni ka.

³¹ Lanwani, yin yaa bua mani yaa paabu n ŋani ki cie. N baa waani yi yaa sanu n ŋani ki cie likuli.