1 Korenti 11 - U TIENU MAAMA TILI 2013

¹ Yin yaa ŋua n fuuli nani min ŋua Kilisiti fuuli maama.

Bi puoba yucaba yilima maama

² N pagi yi kelima yi tiani n po li bonla kuli nni, ki go ŋua min den bangi yi yaa bangima mo.

³ Ba yeni, n bua yin bandi ke Kilisiti tie joa kuli yudaano, o joa mo tie o pua yudaano, U Tienu mo tie Kilisiti yudaano.

⁴ Yaa joa n jaandi, bi ki wangi U Tienu maama ki ciibi kuli, o jigidi o yudaano.

⁵ Ama yaa pua n jaandi, bi ki wangi U Tienu maama ki naa yili, o jigidi o yudaano. Likuli tie yenma leni wan kuo o yudi.

⁶ O pua yaa kan yili yucabili, wan moagi o yudi. Ama o yudi kuoma bi ti moagima yaa pia i fe, wan yili li yucabili.

⁷ Laa ŋani o joa n yaa ciibi, kelima o tie U Tienu nannanli leni o kpiagidi. O pua mo n tie o joa yaa kpiagidi.

⁸ Moamoani, o joa naa den ñani o pua niinni, ama o pua n den ñani o joa niinni.

⁹ U Tienu naa den tagi o joa kelima o pua po ka, ama o den tagi o pua kelima o joa yaa po yo.

¹⁰ Lani yaa po leni malekinba yaa po, li pundi o pua n yili li yucabili.

¹¹ Lani yaa po, o Diedo nintuali, o pua kan fidi ki paadi leni o joa, o joa mo kan fidi ki paadi leni o pua.

¹² Nani o pua n den ñani o joa niinni maama, li tie yenma leni moala, joa kuli, pua n mali o, ama li bonla kuli ñani U Tienu kane.

¹³ Yinba yi ba n biigi ki le li yaa ŋani ke o pua n jaandi U Tienu kaa yili yucabili.

¹⁴ Naani mi tagima mani miba ki wangi ke o joa yaa pia ti yuciandi, ke li pia i fe?

¹⁵ Ama o pua wani yaa pia ti yuciandi, li tie o po ti kpiagidi, kelima U Tienu puni o ti yuciandi, tin yaa tie o po nani li cabiyilikaali yeni.

¹⁶ O nilo yaa bua ki nia laa maama, wan bandi ke tinba leni U Tienu Nitaana kuli, ki pia laa bogidili.

Ti Diedo jiema maama

¹⁷ Yaa maama n ŋua po, mii pagi yi ba, kelima yi taana naa ŋanbidi yi ka, li biidi yi bebe.

¹⁸ Min da baa kpa maadi yi yaala tie, n gba ke yi yaa taani, mi paadima ye yi siiga. N daani la waamu,

¹⁹ kelima li tie tiladi mi paadima n yaa ye yi siiga, ke yaaba n se i moamoani nni n doagidi.

²⁰ Yi yaa taani, li naa tie o Diedo jiema po ka ke yi taani.

²¹ Yi yaa kali ki baa je, yuakuli yen cili ki yaa di wani o ba yaa jiema, kaa guudi o lieba. Lani, mi koma pia tianba, ke tianba mo ñuni hali ki gaadi.

²² Yii pia yi denpo yin baa yaa di ki go ñu naani yo? Bi yi fali U Tienu Nitaanli, ki fiagi bi siiga yaaba n ki pia liba yo? Min yedi yi lede? Min pagi yi bi? N kan pagi yi lani yaa po.

²³ N den baa o Diedo kani min bangi yi yaala. Ban den janbi o yaa ñiagu, o den taa dupen

²⁴ ki tuondi U Tienu, ki cabidi ki yedi: «Line n tie n gbanandi, yaadi n cabidi yi po. Yaa tiendi mani yeni ki tiadi n po.»

²⁵ Ban den dini ki gbeni yaa yogunu, o den taa ki tadiñokaaga ki yedi: «Yaa tadiñokaaga n tie ne tie o Ŋantaadipaano yua n kua kelima n soama po. Yaa tiendi mani yeni ki tiadi n po, yin baa ño yaa yogunu kuli.»

²⁶ Lanwani, yaa yogunu kuli ke yi ŋmani dupen ki go ñuni ki tadiñokaaga nni na, yi wangi o Diedo kuuma, hali wan go baa cua.

²⁷ Lani yaa po, yua n ŋmani o Diedo dupen ki go ñuni o Diedo tadiñokaaga nni kaa dagidi, o pia i tagili o Diedo gbanandi leni o soama po.

²⁸ Lanwani, nilo kuli n kpa biigi o yuli, lani yaa puoli, wan ŋmani laa dupen ki go ño laa tadiñokaaga.

²⁹ Yua n ŋmani ki go ñuni ki naa laa ke o Diedo gbanandi ye lienni, ŋmani ki go ñuni o yuli po buudi leni cuonu.

³⁰ Lani n teni ke a yiama leni a tadima yabi yi siiga, ke niba boncianla mo kpe.

³¹ Ti yaa biigi ti yula, U Tienu kan ti jia ti buudi.

³² Ama o Diedo ja ti buudi leni fala ki tundi ti, kelima waa bua ki taani ki bu ki cuo ti leni ŋanduna.

³³ Lani yaa po n kpiiba, yi yaa taani ki baa je o Diedo jiema, yin guudi yiyaba.

³⁴ Mi koma yaa pia yua, wan kpa je o denpo ki nan cua, ke yin da taani ki cuani yi yula po ti buudi leni u cuonu. N yaa ti cua yaa yogunu, n baa ŋanbi yaa maama n sieni kuli.