1 Korenti 10 - U TIENU MAAMA TILI 2013

I buli ŋoadima n bia maama

¹ N kpiiba, mii bua ke yaala n den tieni ti yaajanba n yaa boani yi. Ku tawaligu den yiini bi po, ke bikuli duodi mi ñincianma.

² Bikuli den baa mi batisima Musa niinni, ku tawaligu leni mi ñincianma nni.

³ Bikuli den di jeyenma,

⁴ ki go ñu bonñokayenla, yaala n ña u Tienu kani, kelima bi den ñu yaa tangu yaa ñima n ñani U Tienu kani, yaagu n den yegi leni ba. Laa tangu den tie Kilisiti.

⁵ Ama bi siiga niba boncianla ki den mangidi U Tienu pali, lani n teni ke bi den kpe mi fanpienma nni.

⁶ Lani kuli tie ti po li bonbangikaala, ki bua ki tuodi ki bangi ti, ke tin da bua yaala n bia nani bani yeni.

⁷ Yin da ŋoadi i buli nani bi siiga bi tianba n den tieni maama. Nani lan diani maama: «Bi den kali ki dini ki go ñuni, lani n pendi, bi den fii ki jeli ki ciaga.»

⁸ Tin da pa ti yula mi conconma po, nani bi siiga bi tianba n den puni bi yula mi po maama, ke piilie n niba tudataa (23 000) den kpe dayenli.

⁹ Tin da biigi o Diedo nani bi siiga bi tianba n den tieni maama, ke i we kpa ba.

¹⁰ Yin da yenbidi mo nani bi siiga bi tianba n den yenbidi maama, ke mi kuuma maleki kpa ba.

¹¹ Laa bonla kuli den baa bi po, ki baa yaa tie bi niba kuli po li bonbangikaala. U Tienu den teni ke likuli diani ki baa yaa tie ti po, tinba yaaba n ye ŋanduna juodima dana siiga po tundi.

¹² Lani yaa po, yua n tama ke o se, wan fangi o yuli ki da baa.

¹³ Tulinmiba kuli kan cua yi kani, kaa tie yaama n kpendi bi nisaaliba kuli po. U Tienu tie dugika, o kan tuo yaa tulinma n cie yi fidu bianu n cua yi kani. Ama mi biigima yaa cua yi kani, o baa ŋanbi yi po u sanu, ke yin fidi ki juuni ki ña lienni.

¹⁴ Lani yaa po, n buakaaba, yin sani ki foagidi leni i buli ŋoadima.

¹⁵ N maadi leni yi kelima yi tie yanfuodanba. Lanwani biigi mani min maadi yaa maama na.

¹⁶ Li seli tadiñokaaga, tin tuondi U Tienu yaaga yaa po, naani kaa taani ti yenma leni Kilisiti soama? Tin cabidi yaa dupen, naani waa taani ti yenma leni Kilisiti gbanandi?

¹⁷ Dupen tie yendo, tinba yaaba n yabi moko tie gbananyendi, kelima tikuli taani ki boagidi laa dupenyendo.

¹⁸ Kpaagi mani Isidayeli yaaba po. Bi yaa dini ti padijiedi, naani baa pia taanyenma leni U Tienu ka?

¹⁹ N bua ki yedi be? O bulo tie bonmoanla bi? Bi ban padi yaala o bulo po tie bonmoanla? Kalam!

²⁰ N bua ki yedi ke yaaba n padi i buli yeni, padi mu cicibiadimu po yo, baa padi U Tienu po ka. Mii bua ke yin yaa pia ŋantaadoba leni mu cicibiadimu.

²¹ Yi kan fidi ki ño o Diedo tadiñokaaga, ki go ño mu cicibiadimu yaa tadiñokaaga. Yi kan taani ki je o Diedo jiema, ki go taani ki je mu cicibiadimu mo yaa jiema.

²² Ti baa tieni yene ki ñuni o Diedo li mutuoli bi? Naani ti pia u fidu ki cie o?

Tieni li bonla kuli U Tienu kpiagidi po

²³ Yin tua: «Liba kuli ki go kua yeni,» ama li bonla kuli ka ŋani. Moamoani, «Liba kuli ki go kua,» die li bonla kuli ka todi.

²⁴ Oba kuli n da lingi o yuceli ŋamu, ama wan yaa lingi yaala n tie o lieba moko yaa ŋamu.

²⁵ Yi pia u sanu ki ŋmani yaa nandi n kuadi ki daaga nni kuli, ki da tuo yi pali siedi n yaa bangi liba kuli po,

²⁶ kelima li diani ki yedi: «O Diedo die ki tinga leni yaala n ye ki niinni kuli.»

²⁷ Yua n ki daani yaa yini yi ke yin cua ki je leni o, ke yi tuo ki gedi, je mani wan teni yi yaa jiema kuli, ki da buali kelima yi pali siedi po.

²⁸ Ama o nilo yaa yedi yi: «Yaa nandi n tie, ne tie padinandi,» da je mani, kelima yaa nilo n waani yi yeni po leni li pali siedi po.

²⁹ N maadi yaa nilo n waani yi yeni yaa pali siedi po yo, mii maadi yi yaa pali siedi po ka. Be yaa po ke nitoa pali siedi baa bu leni nni, min pia u sanu ki tieni yaala yaa po?

³⁰ N yaa tuondi U Tienu mi jiema po, be yaa po ke bi baa yaa jaligidi nni, min tuondi U Tienu yaa jiema po?

³¹ Lani yaa po, yin di, yin ñu leni yin tiendi yaala kuli, tieni mani likuli U Tienu kpiagidi po.

³² Yin da tieni yaala n baa teni Jufinba, bi nilanba leni U Tienu Nitaanli kuli n tuudi ki baa ti tuonbiadi nni.

³³ Nmoko moandi ki tiendi yeni, ki baa dagidi leni bi niba kuli, min tiendi yaala kuli nni. Mii tiendi yeni ki bua ki lingi n yuceli ŋamu ka, n lingi yaaba n yabi yaa ŋamu yo, ke ban baa ki tindi.