Njə̂m 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyaʼ Njə̂m ŋwàʼlè zɨ̀nə̀, ə wufɨ̀aʼa ə Fèzhə̀, è və̂ Pɛ̂pɛ Njisə̀s Klâys. M fo pə̂ ètɔŋtê sê tâŋ tə Isìlâytè eghɨm njòse pɛ̀ tɛ ə te nyi mə te ə waŋ ndu ke mbi èkɨ̂m.

Ekyî epomə̂zè è kol ətəmze

² Ghɔnyì ghɨm ghe poməghe, ghàyn e saŋnə̂ nâʼà sə ŋaŋ, ezhoghɛ ə kyì tə temɔ̀mtè pə̀yn ə ghàyn endom,

³ kûmə̀ nə ghàyn ke ndô nə mɔ̂mtè pə̀yn ə ghàyn ə tendom, ghàyn ə zhiə fɨə təynte, ə ghàyn ə ke se wəynsê ewiyn.

⁴ Ghàyn nəyn kə wəynsê ewìyn ə təynze nəyn ə ghàyn ə tɛ ndûə kə èshike mə ghàyn pfɨ̀ə va, kə ghàyn ə nyi mə ə ndəmə̂, nyi mə kwəyn, lâʼà va fɨa kyîke.

⁵ Pîza, ə wùə se ghàyn làʼà tɔf eghaʼâzè, e və tsə̀mə̀ sê Zhə̀fè, ə Fe fo zəynze sê vəyn kûmə̀ nə Zhə̀fè fo sê nâʼàpî ndè èsaŋnêzè, e vayn zɔ̀ ə ghô ashìŋə̀ kɛ ə ò pfɨf sê vəyn.

⁶ Pîza shîŋə̀ kɛ ə ghàyn tsə̂mə̀, ghàyn kyi se kyî epomə̂ mə ə mə̂ŋə̀ chîəva ndô. Ə mə̀ŋə̀ pîndè, ə è və nyi ke kə mmo mə ènjwì ə fengwaŋve ezhoghɛ ə fofke tsɛ̂, m̀ kɔʼɔ kə nyî tso.

⁷ E lote nyi ndò nə wûə ətəyn kyi va se kwàʼtè nə zhi kaʼa ə zhi kyi fɨa kyîke sê Pɛ̂pɛ.

⁸ Kyì ə wùə nə vɨ̀nə kyi ətəm əpɛ̀, mə nâʼàpî èghɛ èkè zɛ ə è nə̂, è epaynse ke va pâs kɛ ə è tyəm ətəyn.

Wùə èkɛ è wùə àfɨf

⁹ Ghɨə pomə ghɛ ə̀ nyi əghɨ afɨfghe kyi sə̂ saŋnə̂ kûmə̀ nə Zhə̀fè ə njì kɔʼsê ghənə elùʼ engaŋtəve.

¹⁰ Ghɨə pomə ghɛ ə ghe kyi kɛve kyi sə̂ saŋnə̂ ezhoghɛ ə Zhə̀fè ə njì tsosê ghənə əchi, kûmə̀ nə ghənə tə tsɛ̂ ndô kəpî kə mbule àwə̀yn ə mbvɨynke.

¹¹ Zhwize sa, ze ə nə̀ kɔʼɔ tɛ atɨ̀m ə chwîkè, ze ə nyɔ̀ʼə̀ èwə̂yn ə mbvɨyn, mbulè sətəynse ə zà, tsɔ̂f ə təynze ə njìsə̀. E za nyì kepî èghɨ kə ghɨə ghɨ ekɛghe tə kwuə, ə ghənə ə fètəyn èfɨ̀aʼ zɛ ə ghənə fɨ̂aʼà kè kə ghənə fɨaʼà tûʼmè m̀kɨ̂m.

Mɔ̂mzè pə̀ èpɔsêzè

¹² Saŋnêzè nyì sê ghɨ ghɛ ə ghe wəynsə wiynve ə ghənə epomə̂ etyə̂ èmɔ̀m, kûmə̀ nə ghənə tsɨ̂yn mə ə tsɛ̀ mɔ̂m ətəynze, ə ghənə fi mâʼteze mə nyi endam zɛ ə ze tə mîə va ə Zhə̀fè tè tsɨ̀nè sê ghɨ ghɛ ə ghe kɔ̂ŋə̀ vəyn.

¹³ Kə wùə tə pi ezhoghɛ mɔ̂mzè se nə̀yn ə pi pə̀yn sê vəyn nə, “Mɔ̂mzè se nə pi nə zɨnə ndò sê Zhə̀fè.” Kûmə̀ nə wùə vayn kàʼa è chiynte Zhə̀fè nə è nəyn pi, Zhə̀fè e vayn kàʼa ə fe chiynte wùə vîvè nə è nəyn pi.

¹⁴ Pîza chiyntêzè se nə̀yn ə pi pə̀ sê wùə ezhoghɛ ghɛ epi zɛ ə è kyiŋə lə̂ŋtè vəyn ə shìnə̀ vəyn kə è nəyn pi.

¹⁵ Zamə kwaʼtè ə ghâsènì ze pize fo ghâsènì èkɔ̂ŋzè se nə pi, mə shîŋə̀ kɛ ə pi lote ndəmə kwəyn, è zə pə̀ èkwuze.

¹⁶ Kə wùə tə lese ghàyn ə ghɔnyì ghɨmghe kɔ̀ŋghè.

¹⁷ Nâʼàpî èfo echûŋ èkè, è nâʼàpî èghɛ èkè zɛ ə ze kyi va ləʼke ndò pə̂ ekwùtwəyn sê Zhə̀fè, ə fɛ ə fe tè fɛte payn tekɨ̂m tɛ ə te nyi awulə. È kwiynə̂ tsɛ̂ va kə anyɨ̂ŋsè kɛ ə ke kɨŋtə tsɛ̂ kəndò.

¹⁸ Ə tè chɔʼne vəyn nə ə piə ghâsènì tɔynə̂ ə tom ə̀ səmɔʼ kə ghâsènì kyi luʼ əshive ə fètəyn èfɨa èkɨ̂m vɛ ə è tè pom.

Ghɨə pomə kyi sə̂ zɨə, nə̂ eghɛ zɛ ə tom ə̀ Fèzhə̀ pìə

¹⁹ Ghàyn tɔʼ zɨte zɨnə ə ghɔnyì ghɨm ghe chûŋə̀: Ə nâʼàpî ndè ə tɔ̂ʼɔ̀ ndə̂mə̀ àtu se zɨtê, ko kyîə èwiyn ə vəynve se wàmnè, fɨnə ko kyîə èwiyn ə vəynve se nyɔ̀ʼsè etɔŋ.

²⁰ Shîŋə̀ kɛ ə wùə m̀sɔŋ kyi tɔŋ ezafsəve, è vayn kàʼa è və nyi chichi endom vɛ ə Zhə̀fè kyiŋə.

²¹ E za tyə̀nə̀ nə ghàyn kyi se mâʼà endam nyələze è kɨsè ndam epofze. Ghàyn tsose ngɨŋ saynse ə ghàyn pomə tom zɛ ə Zhə̀fè nyi mə fe ə ndə̀m ə ghàyn ətəm kûmə̀ nə tom ə̀təyn nyi kàʼa è sɔza ghàyn.

²² Kə ghàyn lese ngɨŋ saynse sə̂ zɨtə̂ kə ndò ghɛ ə Fezhə̀zè, pîza ghàyn e nə̂ èghɛ zɛ ə tom ə̀təyn pîə.

²³ Wùə vɛ ə è zɨtə kə ndô ghɛ ə Fezhə̀zè, nə̂ va kə ze pîə nyi ke kə wùə vɛ ə è naynə kyâʼ ə vəynze anâynè,

²⁴ ezhoghɛ ə è nayne mɨsè ə ndò, è və lèsə̀ kə è kyàʼà.

²⁵ Pîza wùə vɛ ə è tɔ̀ʼɔ̀ zaʼlə lâŋ ə Fezhə̀ kɛ ə ke kyi va ləʼke mə ke njîə fɨsə̂ ə̀ghɨ ə ndɛ ə̀ chaʼ, è və kolə ə̀təm əfètə̂ təyn nə̂ èghɛ zɛ ə è zaʼle, lɛ̂sə̀ va, ə Zhə̀fè pɔse vəyn eghɛ zɛ ə è nə̀.

²⁶ Ə wùə kwàʼtə̀ nə zhi chùmtə̀ Fèzhə̀ endom echûŋve, pîza, ke va se kyiə andəm ə vəynke, è və ke nə è lesə̂ kə ngɨŋ ə vəyn, kwàʼtè ə vəynze nə zhi chùmtə̀ Fèzhə̀ kwəynə va nâʼà eghɛ zhîzè.

²⁷ Ghɛ zɛ ə Zhə̀fè mə nyi Pɨ̀a njìə nə ə̀ nyi endom vɛ ə ve zo, kwəynə̂ se chùmtè ə Fezhə̀ ətəyn nyi nə, ə tɔ̀ʼnə̀ è ghɔkwuə, è zhwiə kwughe ə ghənə ezə ngəʼze, fɨnə tɔ̂ʼnə̀ è ngɨŋə̂ vəyn nə kə ghɨ ə mbighe tə nəyn vəyn nə è və nə̂ ə̀ghɛ ə nyələ ghɛ ə ghənə nə̂.