Ŋwàʼlè ə̀ Mâk 1 - Ŋwàʼlè ə̀ Fèzhə̀ Mkâyn Mə̂ Fèm

Efɨaʼ ə Njɔyn Fo M̀mòze

¹ Zɨ̀nə̀ nyi zhə̀te ə̀ tom èchùŋə̀ Njisə̀s Klâys, ə vâ Fèzhə̀.

² Tom èchùŋ ə̀ Fèzhə̀ nə zɨnə̀ zhə̀te kè kə Fɨ̀aʼtè Èsayà tè nyàʼ nə: “Zhə̀fè tè pi nə, ‘Fekə, m tə tomə ndùətom vɨm ə è nduə ə ghò shi ə è fɛte ndom vɛve.’

³ Ə̀ nyi vəyn kə è ndàʼà pîə endaʼ ashəshəze nə, ‘Ghàyn pɨaʼte ndomə Pɛ̂pɛ vɛ; ghàyn nəyn ə ndomə vəynve ə nânə̀.’”

⁴ Njɔyn tè fɨ endaʼ ashishize fo m̀mo sê ghɨ ndàʼà tom ə̀ Fèzhə̀ pîə nə “ghàyn kwiyne təm ghaynghe ə fi môm kə Zhə̀fè lɛse fo sèpi saynse.

⁵ Ghɨghe ə fɨə apàs endaʼ ə Njòndyâzè kè əkɨ̂m è Njèlusalɛ̀m ndùə se zɨtê sê vəyn, chîə èkome ewìyn kûmə̀ sèpi sə ghənə̂sè, e və fo m̀mo sê ghənə ə tsô èghaʼâ ə̀ Njondàyn.

⁶ Ə tè nyi zâ Njɔyn ə maʼà sèndzɨs mə ə tɨm è nyuŋsə nyàm zhizè e tɔŋtə̂ nə kamɛ̀l, ə kolə̂ fèkô, mə ə fɛte è pfɨ̀ə nyàm, fɨazhiə vəyn ve nyi ke sèpɨyn è ndûvè

⁷ È tè ndàʼa nə, Wùə nyîə pə̂ ə mi èpàm tsɛ̂ mi, m kwənə pîva se ngwuʼtê se zhə̀nə sèkwɨ̀l səpfɨ sə əghòl sə̂ vəynse.

⁸ M fo m̀mo sê ghàyn è mômə tsòm, pîza è tə fo m̀mo sê ghàyn è Zuʼse ŋwaʼase.”

Njisə̀s ə fi môm, ə mɔ̀mə̀ vəyn

⁹ Ə tè nyi kepî mtuʼ nə mɛmə, Njisə̀s ə ndò ə Nazalɛ̀t apàs endaʼa Ngalìlîkè ə ndùə, Njɔyn ə fo m̀mo sê vəyn ə tsô Njondàyn.

¹⁰ Ə pə̀ kə è fi môm sè fɨə kɔʼɔ pə̂ kə ə tsô, è və fe kə wuləke chwie, Zuʼse ŋwaʼase ə fɨə tso pə awulə ə nyaʼâ ə və atu, kyaʼà kə akwɨ̀l.

¹¹ Kyə̀ ə fɨnə fɨə kəpî awulə, pîə nə, “Ə̀ nyi ke nâʼà ghò Vayn èkɔ̀ŋ vɨ̂mè, m saŋnə̂ sê ghò sə nɨŋ.”

¹² Kè sə ashìŋə̀, Zuʼse Ŋwaʼase ə nə̀ Njisə̀s, è və ndò ndûə endaʼ ashishize,

¹³ ə ndamə fu sə mtuʼ m̀ghɨm mkyàʼ, Satàyn ə mɔ̀mə̀ vəyn, nyamsə mbvɨynse ndamə fu, pîza tsìsè ə pə̀ tɔ̂ʼnə̀ è vəyn.

Njisə̀s ə chɔʼ chùmtè èpàm sə vəyn shîse

¹⁴ Ə tè nyi ə shɨŋ nə zɛ mə ə fâ Njɔyn ə ndɛ ə̀ chaʼ. Njisə̀s ə kɛsə̂ njiə ndûə apàs endaʼ ə Ngalìlîkè, ndàʼà tom èchùŋ ə Fezhə̀,

¹⁵ pîə nə, “Shîŋə̀ kə kwəyn fɔ̂yn ə Fezhə̀ və paʼsê. Ghàyn kwiyne təm ghaynghe piə ə pomə̂ tom èchùŋ zɨ̀yn.”

¹⁶ Njisə̀s tè kwìə tsɛ̂ etipì enjwì ə Ngalìlîvè tuʼ fîfe, ə fe Shimùyn yî ànyìə vəyn Andɨ̀lò, ghənə e maʼà fèlàm ə tsô se ko embwɔ̀, ə nyi efɨ̀aʼ ə ghənə̂zè.

¹⁷ È və pîə sê ghənə nə, “Ghàyn pəyn chûmtè mi. Kè kə ghàyn ko mbwɔ̀vè zôyn m nə̀ zaʼlə̂ ghàyn kə ghayn kaʼa ə pɨlə kûmə̀ ə̀təm əghɨ̀ nə ghe chumte mi.”

¹⁸ Kè sə ashìŋə̀, ghənə zà m̀làm mə ghənə̂m fu ə chùmtə̀ ndùə Njisə̀s.

¹⁹ Ghənə tè pa nyi ndɔ̀ʼɔ chɔʼ ghol ghə pɛ̀, Njisə̀s ə fɨnə fe Njə̂m yî Njɔyn ə ghɔ Zepɛndì ghə pɛ̀, ghənə e tsɨs ə ngwùʼ èghaʼâ, tɨmə m̀làm mə ghənə̂m.

²⁰ Njisə̀s ə fe pə̂ ghənə nyi ə fɨnə tɔŋɔ kə ndò. Ghənə ə fɨə zâ pɨ̀a ə̀ ghənə̂ è ghɨ fɨaʼa ghə ngwùʼ èghaʼâ, ə chùmtə̀ ndùə Njisə̀s.

Njisə̀s ə chùm fɨse zuʼse pise ə wùə ewìyn

²¹ Njisə̀s è chùmtè èpàm sə vəyn sekyàʼ ə ndùə Kàpanùm, mə tè nyi etuʼ endaʼve, e və ndùə ə ndɛ atsɨ̀ynte sè zaʼlə̂ ə̀ghɨ fu.

²² Zaʼlê ətəynze ə nə̀, choze ə zomə ghənə kûmə̀ nə è tè zaʼlə va kə setyə̀ynsè sə alàŋsè. È tè zaʼlə kə nâʼà kə wùə vɛ è kyi tyaʼa.

²³ Kè nyî, wùə è kyi sèzuʼ sepise ə njiə pə̂ fumə ndɛ atsɨ̀ynte, ə pɨa

²⁴ piə nə, “Ò kyiŋə ghè sê ghàs ə Njisə̀s və Nazalɛ̀t, ò pə̀yn se pofsə̂ ghàs mə? M ke ndô ghò nâʼà àchûŋ. Ə̀ nyì ghò wùə vɛ ə Zhə̀fè tom ò nyi èŋwaʼze.”

²⁵ Njisə̀s ə kàyntə̀ ə̀ghɛ sê zuʼse pi nə sɛ̂ ə pìə nə, “Kɨm mɔŋ ə tsɛ̀ fɨə ə wùə vɨ̀nə ewiyn!”

²⁶ Zuʼsə ətəyn sə nə̂ʼsə̀ wùə ətəyn nâʼà sə ŋaŋ, e və fɨnə pɨa nâʼà è kyə̀ e tɛ tsɔ̀fə se fɨ ə vəyn ewìyn.

²⁷ Ghɨ ətəynghe tè nyi è kaynze, kyì e pfɨfə sê kyì nə, “Ə̀ nyi ekyì eghɛ èkè nyiə? Ə̀ nyi ekyì ezaʼlê efe èkè zɨ̂nə̀ ə? È kàyntə̀ ə̀ghɛ è tyaʼa, nâʼàpî sêzuʼ sepise, se nə̂ kə ke è pìə.”

²⁸ Se zhə̀tə̀ kə ashìŋə̀ nə kɛ, saʼghɛ kûmə̀ vəyn Njisə̀s ə waŋə kə luʼ tekɨ̂m apàs endaʼ ə Ngalìlîkè.

Njisə̀s ə tsuʼ ghɨ nâʼà setsɨ̀

²⁹ Njisə̀s yî Njə̂m è Njɔyn ə fɨə ə ndɛ atsɨ̀ynte kè sə ashìŋə̀, ə nàynə̀ ndùə kə ə Shimùyn è Andɨ̀lò ə ndɛ.

³⁰ Ə nyi zâ, nyiə zhwìə Shimùyn e nyɨŋ ekwì èwiyn kasəve. Kè kə Njisə̀s nji pə̂yn, ə̂ tsà ezaf ə wùə zhɔyn ətəyn sê vəyn.

³¹ È və ndùə kyîə àgho vəynke ə tsàmtə̀ vəyn nə è ndwi, wiyn kasə təynve ə mìə kə ndò, è və tsɛsə̀ efɨaezhiəve ghənə ə zhiə.

³² Ə pə̀ ashìŋə̀ ezhwikwɨləke, ghɨghe ə pə̀ è ghɨə zafə sê Njisə̀s nâʼà ə̀kɨ̂m, è ghɛ ghe tè kyi pamə̂ tə satàyntè.

³³ Ghɨghə fɨnə fɨ fu ə tɔ̂ŋ nâʼà ə̀kɨ̂m ə pə̀ zuŋtə̂ kə Shimùyn echò ndɛ.

³⁴ Njisə̀s ə tsuʼə əghɨ ghe tsɨ̀ə kə nyi, ghe kyi tèzaf kə ə tekyì ə tekyì, ə chûmə̀ fɨsə̂ tèpamə̂ tə satàyntè te tsɨ̀ə kə nyî ə ghɨghe mwìyn, chûmə̀ za, pomə̂ va nə se pi ghɛze kûmə̀ nə pamə̂ tə satàyn tə təynte tè ke ndô vəyn.

Njisə̀s ə ndàʼà ghɛ ə Fezhə̀zè ə Ngalìlî

³⁵ Tuʼve tè pa tsɨs ndɔ̀ʼɔ ve zo, Njisə̀s ə ndwìə fɨə ndûə elùʼ e ndətəve kè və̂yn ènɨŋ sè tsə̂mə̀.

³⁶ Shimùyn yî soynse ə vəynse e sè kwîə kyiŋə vəyn.

³⁷ Ə pə̀ kə ə fe vəyn, ghənə ə pìə sê vəyn nə, “Ghɨ kyiŋə ghò kè əkɨ̂m.”

³⁸ Njisə̀s ə pìə sê ghənə nə, “Ghàyn pəyn, ə ghâsènì ndu ə se tə̀ʼ sə mɔ̀ʼɔ sɛ ə se nyi paʼsê, ə m pɔŋ ndâʼà ndu èghɛ ə Fezhə̀zè fumə kûmə̀ nə ə̀ nyi eghɛ zɛ ə m tè pə̀yn se nə̀yn fa mbi.”

³⁹ È və wàmnə̀ zâ ə kwìə kə tèluʼ tekɨ̂m ə Ngalìlî, kwîə njiə ə sendɛ sə atsɨ̀ynte sə ghənə̂sè, ndàʼà tom ə Fèzhə̀, fɨnə chûmə̀ fɨsə̂ sèzuʼ se pise ə ghɨghe mwìyn.

Njisə̀s ə tsuʼ wùə akwùs

⁴⁰ Wùə tè pə̀yn sê Njisə̀s kyi àkwùs, ə tɨmə ə̀ndzɨs ə və əshi chyatə̂ vəyn pîə nə, “Ə ò kɔ̂ŋɔ̀ ò nə̀ m zo.”

⁴¹ Sə̂ynzə ko Njisə̀s nâʼà sə ŋaŋ sê wùə ətəyn, e və nɛ̀sə̀ àgho ə ndə̀mə̀ ə vəyn ewìyn ə pìə nə, “M kɔ̂ŋɔ̀ ndò, zo”

⁴² Kè sə ashìŋə̀, kwùsə ətəynke ə mìə ə vəyn ewìyn, è və zo.

⁴³ Njisə̀s ə pìə sê vəyn nə nduə, ə fɨnə fo fɨ̀as sê vəyn nə,

⁴⁴ “Kə ô nə̂ mɔmse se tsàyn eghɛ zɛ ə ze kyâyn sê wùə vîvè. Nduə ə tyə̀yn ngɨŋ zɛ è sê wùə èkɔʼsə nə èshyə̀ ə̀ ndɛ̂ Fèzhə̀, ə è fɨəs gho. Fo mâʼtè zɛ ə laŋə Mosîskè pìə se tyə̀yn se ghɨ nə o zo.”

⁴⁵ Pîza è və fɨə sè kotə̂ pîndè tsâ kə ndò ghɛ ətəyn, saʼghe ə̀təyn ə waŋə kə luʼte tekɨ̂m, zə nə̀ Njisə̀s e fɨmə sə̂ njiə əfètə̂ tɔ̂ŋ ə ndayn, e ve sè kwîə ndùə kə epɨ̀as ə sembvɨ̂nə̀vè pîza ghɨghe ə pa fɨə kə luʼ tekɨ̂m ndûə fe vəyn fu.