Ngàleshyà 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyâʼ mi Pɔ̂l ŋwàʼlè zɨ̀yn. M nyi wùətom mə paʼà ndə̀m chi ghɨghe mi, fɨaʼà chîəva kə wùə m̀sɔ̀ŋ. Ə̀ chɔʼ Njisə̀s Klâys mi yî Zhə̀fè pɨ̀a sə wùətom, ə pɨ̀a vɛ ə è tè zòmse vəyn ekwu.

² M tiynsə̂ ètɔŋtê zɨ̂nə̀ ghasè ghɔyn nyî ghɛ ghe nyi fayn sê ghàyn ghɨ pomə ghɛ ə ghe nyi ə sendɛ sə Fezhə̀sè endaʼ ə Ngàleshyàzè.

³ Ə Zhə̀fè, Pɨ̀a yî Pɛ̂pɛə ghâsènì Njisə̀s Klâys fo ghàyn è fùʼkè è pɔ̂ynè.

⁴ Klâys ə tə fo ngɨŋ ə vəyn ə kwuə kûmə̀ sèpi sə ghasènìse se sɔza ghâsènì fa ə mbi èpi, se nə̀yn eghɛ zɛ ə Zhə̀fè pɨ̀a ə̀ ghâsènì tè kyiŋə.

⁵ Ə pomsêzè ə nyi sê fəynfe sə teshìŋə̀ tekɨ̂m. Ə zə nyi ke zamə.

Tom èchùŋ zhîzè fɨyn va

⁶ M nyi è kaynze nə ghànə kàynè fɨl tsɨ̀m sê wùə vɛ ə è tè tɔŋɔ ghàyn tɔynə̂ ə Klâys afùʼ, sè pomə̂ se tom ə̀ ndò.

⁷ Se pì səmɔʼ, ‘tom èchùŋ zhîzè kɛse va,’ pîza m pîə zɨnə̀ kûmə̀ nə ghɨ yîghe nyiə nyi ə ghe mômsə̀ se sàʼtè atu kaynke se kwiynê ə tom ə̀ Klâys ə ghàyn ətəm.

⁸ Pîza, ə wùə sê ghàs kɨ̀sə tsì mə è ndò ekwùtwəyn fɨyn ndâʼà tom, è nyi sə nɨŋ sə̂ zɛ ə ghàs tè tsàyn sê ghàyn, ə Zhə̀fè ti ndi sê wùə nə vɛ.

⁹ Ghàs ə tə pì chi sê ghàyn, m fɨnə pìə kwəynsə̂ zôyn nə, ə wùə ndàʼà tom ə̀ ndò sê ghàyn, è nyi sə nɨŋ sê zɛ ə ghàyn tè pomə, ə Zhə̀fè ti ndi sê wùə ə̀təyn.

¹⁰ E za tyə̀nə̀ zôyn nə, m nə̂ èghɛ zɛ ə ghɨ kyiŋə mə zɛ ə Zhə̀fè kyiŋə? E za nyi nə m nə̂ nə ghɨ ghə saŋnə mə? Ə m sè kyiŋə sə̂ nə̂ nə ghɨ ghə saŋnə̂, ə mə fɨyn va wùə è fɨ̀aʼa ə̀ Klâys.

Kə Pɔ̂l tè kɛse sə wùətom

¹¹ Ghɔnyì ghɨmə, m kyiŋə nə ghàyn ə ke nə tom èchùŋ zɛ m ndaʼà pâʼà ndò sê wùə.

¹² M tè pâʼà zɨ tom nə zɨ̂yn sê wùə m̀sɔŋ, pî nə wùə zaʼle zə̂ynzè se mi. Ə̀ tè tyə̀n paynsê Njisə̀s Klâys è zə̂ynzè se mi.

¹³ Ə tsàyn se ghàyn kə ndam zɨme tè nyi kə m tè kɔʼsə Zhə̀fè endom vɛ ə ghɨə Njûsə̀ kɔʼsə, kə m tè tsə̀fsə ndɛ, mə nyi zə Fèzhə̀ mə m kyi va kosê esəynze, ə mɔ̀msə̀ tèndom tèkɨ̂m se sàʼtə zə̂ynzè.

¹⁴ M tè ke se kɔʼsə Fezhə̀ endom vɛ ə ghɨə Njûsghè kɔʼsə tsɛ̂ ngwàʼ zɨ̂mze tsɨə, mə mə fo təm ghɨmə nâʼà sə ŋaŋ, tsɛ̂ endam endaʼ zɛ ə ghə̀pɨ̀a ə ghasènìghe tè ndamə.

¹⁵ Pîza, Zhə̀fè tɔynə̂ ə və afùʼ, ə chɔʼɔ mi tsɔ̀fə kə piə mi, ə tɔŋɔ mi sə wûə èfɨ̀aʼa ə̀ vəyn. Kə è chɔʼne

¹⁶ se tyə paynsə̂ Va vəyn sê mi, kə mə ndaʼà tom èchùŋ se ghɨ ghɛ ə̀ vachi ə̀ghɨ Njûsghè, m tè paʼà ndù nə wùə təfte mi.

¹⁷ M tè paʼà kɔʼ pîə ə Njèlusalɛ̀m se pfɨf eghɛ sê ghɨətom ghɛ ə ghe tè se nyi ə mì əshi. M tè pɨl ndû ə Àlapyà ə ndò fu ə kɛsə pə̀ kə ə Ndàmaskùs.

¹⁸ M tè kɔʼ ə Njèlusalɛ̀m epàm mə sèpîŋ sèta sè wàmnè ghasè Pità, ghasè vəyn ə ndamə sə mtuʼ njòse tâyn.

¹⁹ M tè paʼà fɨyn fe wùətom ə̀ mɔʼɔ fu, wùə vɛ ə m tè fe fu tè nyiʼe nyi ke Njə̂m, ə ànyì ə̀ Pɛ̂pɛ ə̀ ghâsènì.

²⁰ Ghɛ zɨ̀nə̀ ə m nyâʼà sê ghàyn nyî nyì ke nâʼà səmɔʼ. Zhə̀fè ke ndô nə m wamə chîə va!

²¹ M tè ndò fu ə ndù ətelùʼ ə Silyà è Sìlisyà.

²² Ə tè nyì fumə ashìŋə̀, ghɨ poməghe ə Njòndyâ e nyi mə ə paʼà nyìəm fe mi.

²³ Ghənə tè zɨə ndò ghɛ kə ghɨ tè wàmnə̀ kûmə̀ mi pìə nə, “Wùə vɛ e tè tsə̀fsə ghâsènì sə shi ə kɛse sè ndaʼà tom kûmə̀ èkyî epomə̂ zɛ ə è tè kyiŋə se pofsê.”

²⁴ Zɨnə ə nə̀ ghənə e tsîtə̀ Fezhə̀ kûmə̀ mi.