Filìpây 3 - Ŋwàʼlè ə̀ Fèzhə̀ Mkâyn Mə̂ Fèm

Ghɨ ghɛ ə ghe pomə Njisə̀s tə nə̂ ə nyi ə̀ghɨ ə chichighe

¹ Se mɨ̂sè ə ghɔnyì ghɨmə, ghàyn e saŋnə̂ nə ghâynghə̀ Pɛ̂pɛ nyi sə afɨa əmɔʼ. M pâʼà pɔ sə̂ nyâʼà zɔmtə̂ ə̀ghɛ mə m se nyi mə mə nyàʼ. Ghɛ nə ghɨnə nyi ke se tsɨ̀ŋnè ə ghàyn.

² Ghàyn e tɔ̂ʼnə̀ è ghɨ pi ghɨnə̀ ə ghe nyi nyiə kə sepu pîə nə ə kyi se se ənam ə wûəghè.

³ Ə̀ nyi ghâsènì kə nyi mə ə se nam ə ghasènìghe endom vɛ ə kyi se se ətəyn. Zuʼse tsâmtə̀ ghâsènì nə ghâsènì ə ngɨmnə̂ Fèzhə̀. Ghâsènì nyiə saŋnə̂ kə ghâsènì nyì sə afɨa àmɔ̀ʼ ghasènìəghə̀ Njisə̀s Klâys. Ghâsènì ke ndô nə ghɨ msɔ̀ŋghe vayn tsàmtə ghâsènì.

⁴ Pî kə mi è ngɨŋ zɨ̂mzè kàʼa m ndəm təm ghɨmghe ətə̂ èfɨa ə ghɨ̀ msɔ̀ŋve, nâʼàpî ndè ə ghàyn ə fètəyn vɛ è kwàʼtə̀ nə è nə̀ ndə̂mə̀ ə̀təm ə vəynghe ətə èfɨa ə ghɨ̀ msɔ̀ŋve, è za kyi ndô ndomve tsɨ̂ə tsɛ̂ mi.

⁵ Ə tè se ə nam ghɨmə mə tuʼ mə tsɛ̀ m̀sɛ̀mbɛ kə piə mi. M nyi wùə ə̀ Isìlây mə m fɨ etàŋ ə Penjamə̀ynzè. Pɨ̀a vɨ̂mvè è nyì vɨ̂mvè tè nyi ndɨŋndɨŋ ə̀ghɨ ə Ipilùghè. M tè nyi wùə anɔ̀yn ə ghɨə Falàsîkè, ndə̀mə̀ elwɔ̂ŋ nâʼà sə ŋaŋ.

⁶ M tè nyîə tɨ̂mə̀ tsɛsə̀ èwiynve, endom nə m tè nyîə tsə̀fsə̀ ə̀ghɨ poməghe. Wùə vîvè tè vayn kàʼa è pi nə m kyi ndô pi zhizè ə mì ewìyn kûmə̀ nə m tè nyîə ndə̂mə̀ èlwɔ̂ŋ əghɨ̀ ə Njûsvè ekɨ̂m.

⁷ M tè njìə nâʼà ə̀ghɛ nə ghɨ̂nə̀ ə̀kɨ̂m nə ə̀ nyi ezhi pîza, m njìə ghəynghe zôyn kə enjisè kûmə̀ èghɛ zɛ ə Klâys nə̀ sê mi.

⁸ Ə̀ va ke zɛ mə, m fe nâʼà pîghè nə ə̀ nyi kàyntè ènjìsè, ghɛ zhîze e va zɛ ə ze ghaʼa tsɛ̂ se ke Njisə̀s Klâys kə Pɛ̂pɛ. Kûmə̀ vəyn, mə màʼà ghɛghe əkɨ̂m, fe ghəynghe kə eliŋ kə m kaʼa m ke Njisə̀s Klâys.

⁹ M mə nyi fɨake amɔ̀ʼ ghasè Vəyn. Ə̀ vachi se chùmtè alâŋ ə ze nə̂yn mi nə mə nyi chichi ə Zhə̀fè əshi, pîza m nyi chichi ə Zhə̀fè əshi kûmə̀ nə mə pomə̂ Klâys, mə ə̀ nəyn Fezhə̀ nə mə nyi chichi kûmə̀ nə mə pomə̂ Klâys.

¹⁰ M kɔ̂ŋə̀ se kê ə Klâys, kyiŋə se kyî atyaʼ kɛ ə è tè kyi kə è tè zòmə. M kyiŋə sə̂ pa zɨə kə ngəʼ eghɨ kə è tè zɨə. M kɔ̂ŋə̀ se kyiə kəpì etsôs vɛ ə è tè kyi, se zaʼâ kə ə zhwi kepî mi kə tè zhwi Vəyn.

¹¹ Mə ndə̀m təm ghɨmə nə ghɛ nə ghɨ̂yn ə̀kɨ̂m tə kyânə̀ kə Zhə̀fè tə nəyn m zomə.

Pɔ̂l pi nə zhi mɔ̂msə̀ ndò se nduə fɨ ə mɨ̀se achûŋ

¹² M pìə va nə mə kàynè zhi fɨ, pî nə m se kâynè nyi chichi. M mɔ̀msə̀ kə sə̂ ke Klâys Njisə̀s fɨyn nyi kə vəyn kûmə̀ nə ə̀ nyi eghɛ zɛ è tè chɔʼ mi nə mə nyi wùə ə vəyn sətəyn.

¹³ Ghɔnyì ghɨmə, m ndə̂mə̀ va nə m se nyi mə mə kyi fɨa kɛ ə m kyiŋə. Ghɛze nyi ke èmɔ̀ʼ nə m fɨnə ndə̂mə̀ va tuke eghɛ mə zə tsɛ̀, m naynə̂ ndûə kə se ghɛ zɛ ə ze nyi əshi.

¹⁴ M pa mɔ̂msə̀ kə se ndùə əshi se nduə fɨ elùʼ vɛ m ndûə, kə m kaʼa m kyi fɨa vɛ ə Zhə̀fè nyi mə Fə ndə̀m se mi ekwùtwəyn. È və tɔŋɔ̂ mi nə m ndu awulə tɔynə̂ ə Njisə̀s Klâys.

¹⁵ Ghâsènì ghɛ ghɛ ə nyi mə ə ghəʼnê ə ghâsènì epomə̂ ə kyi kepî èkwâʼtè nə zɨ̂yn. Pîza, ə ghàyn yîə kyi kwâʼtè ə ndôzè kûmə̀ ə̀ghɛ nə ghɨ̀yn, ə Zhə̀fè nəyn, ə ghàyn zɨ kê ə̀ghɛ nə ghɨ̂yn endom vɛ ə ghe kyi sə̂ nyi ətəyn.

¹⁶ Ghâsènì kyi sə̂ nə̂ kə èghɛ zɛ ə Zhə̀fè tyə̀yn nə ghâsènì ə nə̂.

¹⁷ Ghɔnyì ghɨmə, ghàyn e səynə̂ kə èndam zɨme. Ghàyn e ndamə kə kə ghɨ ghɛ ə ghàyn fe nə ghənə nə̂ ə̀ghɛ ghɛ ə ghàyn tè fe kə ghàs nə̀.

¹⁸ Mə tsàyn ghɛ zɨ̀nə se ghàyn sə teshîŋə̀ te tsɨəte, zôyn m pa zomtə̂ kə ndò è shîmè ə mì əshi nə, ghɨ tsɨəghe nyi ndô mə ndam ə ghənə̂zè lotə̂ tyə̂nə̀ kə nâʼà nə ghənə nyi se pàyn se tom zɛ ə è tsà kûmə̀ èkwu zɛ ə Klâys tè kwu awâmnè.

¹⁹ Kyì ə ghɨ̀ nə ghɨ̂yn tə mɨ̂sə̀ elùʼ ewùs, kûmə̀ nə ghənə kɔʼsə̂ kə èfɨa vɛ ə njàse wìynse kɔ̂ŋə̀. Ghənə kɔ̂ŋə̀ sə nə̂ ə̀ghɛ ghɛ ə ghənə fe pɨl kyi sə ghomə̂ kûmə̀ ghəynghe, kwaʼtə̀ kə se ghɛ ghɛ ə ghe nyi fa mbi.

²⁰ Pîza, ghâsènì nyi əghɨ ghɛ ə ndaʼa ghənə̂zè nyi awulə, eluʼ vɛ ə Pɛ̂pɛ Njisə̀s Klâys ndamə ətəyn. Ghàs lɨmtə̂ sɔ̀zà vâsvè Njisə̀s Klâys nə è ndo pəyn awulə ə è tso pəyn ə chi.

²¹ È tyaʼ ə Vəyn kɛ ə ke naynə ghɛghe əkɨ̂m, è tə kwiynə̂ àchaʼ ewìyn ə ghâsènì kɨ̂nə̀, ewiyn vɛ ə ve kyi va tyaʼke, kə ghâsènì tə kyi kàyntè èwìyn kè kə È tè kyi ashìŋə̀ kɛ ə Zhə̀fè tè zòmse Vəyn.