Filemùyn 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ŋwàʼlè zɨ̀nə ndò sê Pɔ̂l vɛ ə è nyi ə ndɛ ə̀chaʼ kûmə̀ nə è ndàʼà tom èchùŋ kûmə̀ Klâys Njisə̀s, ə ndò pə kəpi se ànyì ə̀ ghâsènì Timotì. Mə è ndùə se soyn ə̀ ghâsènì ə̀ nyi wùə vɛ ə ghasè ghə̀ ghənə fɨaʼà əmɔʼ Filemùyn,

² è ndɛ ə̀ Fèzhə̀ zɛ ə è nyi ə və ndɛ, è kɨsè ànyì ə̀ ghâsènì və èzhɔyn Afìa, è Akipùs vɛ ə ghasè ghə̀ ghənə fɨaʼà əmɔʼ, ə̀ nyi vəyn vɛ è ndàʼa tom èchùŋ è tyaʼa.

³ Ə Zhə̀fè, Pɨ̀a ghâsènì è Pɛ̂pɛ Njisə̀s Klâys fo fùʼ ə vəynke sê ghàyn è pɔ̂ynè.

Filemùyn nyîə kɔ̂ŋə̀ Fèzhə̀, samsə̂ Pɛ̂pɛ Njisə̀s

⁴ Filemùyn soyn vɨ̂m, m piə m tsə̂mə̀ nâʼàpî ashìŋə̀ àkè mə tɔŋtə̂ ezə zɛze, fo àzɔ̀ŋnè sê Zhə̀ fɛ ə m kɔʼsə.

⁵ M nə̂ nyi kûmə̀ nə mə zɨ ndom vɛ ə ò kyi kyî epomə̂zè sê Pɛ̂pɛ ə̀ ghâsènì Njisə̀s, fɨnə kɔ̀ŋɔ̀ əghɨə Fezhə̀ nâʼà ə̀kɨ̂m.

⁶ M tsə̂mə̀ nə ndom vɛ ə ghàyn nyì ghâsènì sə afɨa àmɔ̀ʼ ə ndəmə̂, tɔynə̂ endom vɛ ə ghàyn kê ghɛ ə chûŋ ghɛ ə Zhə̀fè nyi mə fə nə̀yn sê ghâsènì. M kyiŋə nə ghɛ nə ghɨnə kyayn kə ghɨghə fo èpomsê sê Klâys.

⁷ Ànyì vɨ̂m, kɔ̂ŋ zɛ ə ò kyi sê ghɨə Fezhə̀ è ndom vɛ ə ò nə̂ ghənə e saŋnə̂ ə fo mi ètəmə, ə nə̀ nə mə sɨŋnə̂! O nə̀yn ghɨə Fezhə̀ghè əkɨ̂m e ko kə nâʼà àchûŋ.

Pɔ̂l chyatə̂ nə Filemùyn kɛse nji Ònesimùs

⁸ Kûmə̀ zɨnə mə, m pîə nə ò nəyn ghɛ zɛ ə ze nyi achûŋ kə wùə èpomə. M kaʼa m pi tɔynə̂ atyaʼ kɛ m kyi kə wùətom ə̀ Klâys nə ghàyn nəyn nyiə mə,

⁹ pîza m nə̀ chyatə kə ghò kûmə̀ nə ò nyiə kɔŋə̀ mi, è ghɨə pomə mɔ̀ʼɔghe. Ə mi Pɔ̂l, m wâmnə̀ se ghò kə wùə ndumə ə ndɛ ə̀chaʼ kûmə̀ nə m fɨaʼà se Njisə̀s Klâys.

¹⁰ M chyatə̂ nə ò tsamte Ònesimùs kə̂ è se nyi sê mi kə vayn vɨm. Ə̀ tè nyì kə m nyi ə ndɛ chaʼ, è ve nyi kə vayn sê mi kûmə̀ nə mə tə tsàmtè vəyn nə è kyi ndam efeze mə ze ndo sê Zhə̀fè.

¹¹ Ə̀ tè nyì sə shi, è ve nyi ke nâʼà àfɨa ə emaʼake sê ghò, pîza zôyn, è nyì ke nâʼà wùə sə̂ tsâmtə̀ ghasè ghò.

¹² M kɛsə̂ tiynsə̂ vəyn sê ghò zôyn nyi kə wùə vɛ ə m kɔ̀ŋə̀ è təm ghɨmghe əkɨ̂m.

¹³ Kə m se nyi ə ndɛ̂ əchaʼ nyi kûmə̀ nə m ndaʼà tom èchùŋ, m fè kàʼa mə kɔ̀ŋɔ̀ se ndə̀m ə vəyn nə è faŋ kè fàyn kə è nji luʼ vɛve ə è və tsâmtə̀ mi,

¹⁴ pîza m nə̀ ndəmə̀ zâ va vəyn ə̀ tsɛ̂ kə va mə o pomə̂ kə ze ə tyə̂nə̀ nə nâʼàpî chùŋ èkè zɛ ə ò nə̀yn sê mi ə nyi mə ò nə̀yn ke ə ghò ekɔ̀ŋ, ə̀ vachi nə m ŋamne ndò ghò.

¹⁵ E kàʼa ze ə nyi nə, ə tè nəyn nə Ònesimùs puʼse ngɨŋ ə vəyn sə fendîŋə̀ fə ashìŋə̀fè kə è tə piə è kɛsə pə̂ sê ghò, ə è pəyn ke eshîŋə̀.

¹⁶ Se zhə̀tè zôyn, è nə vachi ke tsɨ̀yntsɨ̀yn àkɔ̀s, pîza è nə nyi ànɛ̂ ve èkɔ̀ŋ ə Klâys. M nyiə kɔ̂ŋɔ̀ vəyn, pîza ò kyi sə̂ kɔ̂ŋɔ̀ vəyn tsɛ̂ kə m kɔ̂ŋɔ̀. Ò nə kɔ̀ŋɔ̀ vəyn kə akɔ̂s kɛke, è kɨsè kûmə̀ nə è nyi chùmtè ə̀ Klâys kèpî kə ghò.

¹⁷ Ə ò ke nə ghasè ghò nə̀ kə nâʼà efɨaʼ èmɔ̀ʼ, o fiə Ònesimùs kèpi kə ò fe kàʼa ə ò fi mi.

¹⁸ Ə è nyi mə è və nə̀yn nâʼàpî èghɛ epi èkè sê ghò, kɨ̀sə è kyi ekɛ se ndàʼ sê ghò, o tsà m ndàʼ.

¹⁹ Ə̀ nyâʼà kə nâʼà mi è gho kɨmke sê ghò nyiə nə, “Mi Pɔ̂l nə̀ ndaʼà nâʼàpî àndàŋ àkè kɛ ə Ònesimùs kyi se ndàʼ.” Kə ò nə lɛsè nə kè nâʼà èndam zɛze nyi kə andàŋ ə ò kyi se fo sê mi kûmə̀ nə mə tə tsàmtè ghò nə o nyi chùmtè ə̀ Klâys.

²⁰ Ànyì vɨm, nə̀yn tsâmtè zɨ̀nə sê mi kûmə̀ Pɛ̂pɛ. Nə̀yn nə mə saŋnə̂, kûmə̀ nə ghasè ghò nyi ə ghɔnyìghe ə Klâys.

²¹ M nyîə ke ke nâʼà nə, kə m nyâʼ ŋwàʼlè zɨ̀nə̀ sê ghò nyi, ò nə̀ nə̂ kə kə pîə, ə ò nəyn tsɛ.

²² Se kwəynse, m chyatə̂ nə ò fɛte luʼ e ndaməve ə ghò ndɛ sê mi kûmə̀ nə m kwaʼtə̀ lɨmtə̂ ndò nə, Zhə̀fè nə̀ zɨə ètsə̂m zayn əkɨ̂m ə è nə̀yn ə fɨse mi əchaʼ kə m fɨyn pə̀yn fe ghàyn.

Etɔŋtê ekwuŋsəze

²³ Èpafalàs ə pì nə m tɔŋte sê ghò. È nyì ə ndɛ̂ chaʼ ghasè vəyn kûmə̀ nə è ndàʼa tom èchùŋ kûmə̀ Klâys Njisə̀s.

²⁴ Ghɨ ghɨnə tomə kəpi ètɔŋtê sê ghò. Ə̀ nyi Mâk è Àlistakùs è Ndemàs è Lûk. Ə̀ nyi əghɨ ghɛ ə m fɨaʼà ghasè ghənə sə̂ ndaʼà tom èchùŋ.

²⁵ Ə fùʼ ə Pɛ̂pɛ Njisə̀s Klayskè ə nyi ghâyn ghə̀ ghənə.