2 Tèsàlonikà 2 - Ŋwàʼlè ə̀ Fèzhə̀ Mkâyn Mə̂ Fèm

Wùə təm epiə

¹ Ghàs kyiŋə se wàmnè sê ghàyn kûmə̀ èpə̂ Pɛ̂pɛ ə ghâsènì Njisə̀s Klâys, è kɨsè kûmə̀ kə Zhə̀fè tə Zûŋtə̀ ghâsènì luʼve mɔ̀ʼ nə ə kwəyne è vəyn è Njisə̀s; ghàs chyatə̂ ghàyn ə ghɔnyìə nə,

² kə ghàyn nə za nə ghɨə fəʼ tu kaynke ezhoghɛ ə ghənə pîə nə tuʼ fɛ ə Pɛ̂pɛ nyi se pə̀yn ətəyn se nyi mə fə kàynè kwəyn. Ghɨə kaʼa kwaʼtə̀ nə ghàs tè pì zɨnə ashìŋə̀ kɛ ə ghàs tè tsâ ghɛ ghɛ Zhə̀fè tyə̀yn sê ghàs, pi ashìŋə̀ kɛ ə ghàs tè ndàʼa tom ə̀ Fèzhə̀, è kɨsè nə ə̀ kàʼa nyi mə ghàs tè nyaʼ zəynze ə ŋwàʼlè.

³ Kə ghàyn za nə wùə vîvè lese ghàyn nâʼà endom vîve kûmə̀ nə tuʼ nə vɛ tə pə̂ va se zaʼâ mə ghɨ ə tsɨə pâʼà pfɨ̀ fɨ, ə wùə etəm epiə pfɨ̀ŋə̀ pəyn, ə vɛ ə è ndùə elùʼ ewùs.

⁴ Wùə èpi nə vɨ̂nə tə fɨə pə, ə è pi ghɛ ə kwunəghe kûmə̀ Fèzhə̀, è nâʼàpî ghè vɛ ə ghɨə ngɨmnə, njîə nə ə̀ nyi Fezhə̀, ə è pi nə zhi nyîə kɔʼnə̂ tsɛ̂ nâʼà ghənə əkɨ̂m. Kûmə̀ zɨnə mə ə è ndu njiə tsɨsə̂ ə ndɛ̂ Fèzhə̀ ètsə̀mə ə è və pìə nə ə̀ nyì ke nâʼà zhi Zhə̀fè.

⁵ M ke nə ghàyn pa kwâʼtə̀ ndò kə m tè pi ghɛ nə ghɨnə sê ghàyn kə ghâsènì pa nyi əmɔʼ

⁶ Pîza ghɛze nyîə nyi ə ze kyiə faŋsə vəyn nə kə è pəyn zôyn, ghàyn e ke èghɛ ətəynze, ə shîŋə̀ kɛ ə Zhə̀fè ndə̀m nə è kyi se pə̀yn ətəyn kwəyn, ə è pfɨ̀ŋə̀ pəyn.

⁷ Kè nâʼà zôyn satàyn nyîə ndə̂tə̀ fɨaʼà etyə̂ àlɨm se nə̀yn nə ghɨghe ə kwiynsə̂ alâŋ ə Fezhə̀kè. Pîza wùə vɛ ə è tàmə̀ nə kə ghɨghe ə wâmnə ghɛ ə kwuəynə kûmə̀ Fèzhə̀, nə pa nə̂ kə za se zaʼâ ashìŋə̀ kɛ kə Zhə̀fè njì tsɨsè vəyn endom.

⁸ Ə tsɨ̂sè wùə nə vɨnə endom, ə wùə ə̀təm ə pi nə vɨnə pfɨ̀ŋə̀ fɨ ə ndayn. Pîza shîŋə̀ kɛ ə Pɛ̂pɛ Njisə̀s Klâys tə kɛsə pə̂, è tə pî nə ə tyəmse ghɛ ə vəynghe nəghe, ə tyəmse kendò, tɔynə̂ endom vɛ ə Klâys tə nə̂ ə è və panə nyaynə̂ ətəyn, ə è nəyn ə è və kyi va tyaʼ kyîke.

⁹ Wùə ə̀ghɛ pi nə vɨ̂yn tə pə̂ è tyaʼa, mə ə̀ fo Satàyn nə è və nə̂ ə̀ghɛ kayntə akaŋ ə tsɨəghe, tyə̂nə̀ sèchwìə sə akaŋ shîse sê ghɨ.

¹⁰ È tə fɨaʼà nâʼàpî endom epi èkwə̀ se lesê əghɨ ghɛ ə ghe njisə̀ ndûə. Ghənə tə njisə̀ kûmə̀ nə ghənə ə tə tə se kɔ̀ŋə səmɔʼ, kə è sɔza ghənə.

¹¹ Kûmə̀ kə ghənə tè tə se pomə̂ səmɔʼ, Zhə̀fè tə tomə àfɨa kyîke, ə ke lese ghənə, ə ghənə pomə kaŋke,

¹² famə endom, è tə saʼa, ə è pi nə nâʼà ə̀ghɨ ə̀kɨ̂m ghɛ ə ghe tàʼa pomə tom ə̀ səmɔʼ, pîza pɨlə kɔ̂ŋə̀ kə pi ə pfɨ̀ saʼ.

Zhə̀fè chɔʼ ghàyn se sɔzà

¹³ Ghɔnyìə, ghàs kyi ndô sə fo àzɔ̀ŋnè sê Zhə̀fè shîŋə̀ tekɨ̂m kûmə̀ ghàyn. Pɛ̂pɛ ə kɔ̀ŋ ghàyn, ghàyn e nyi anɔ̂yn ə ghɨ̀ kɛ ə fe tè chɔʼ ə zhə̀te se sɔzà tɔynə̂ efɨ̀aʼ zɛ ə Zuʼse Ŋwaʼase nə̂, è kɨsè tɔynə̂ ə ghàyn ekyî epomə̂zè eghɛ zɛ ə ze nyi səmɔʼ kə è nəyn ghàyn ə ghàyn ə nyi ə̀ ghɨə vəyn ghe ŋwaʼaghe.

¹⁴ Zhə̀fè tè tɔŋɔ ghàyn tɔynə̂ ə tom èchùŋ zɛ ə ghàs tè ndàʼa sê ghàyn kə ghàyn pəyn sə̂ pɔŋ kyi èpomsê zɛ ə Pɛ̂pɛ ə̀ ghâsènì Njisə̀s Klâys kyi.

¹⁵ Ghàs e sè pìə sê ghàyn ə ghɔnyìə nə, ghàyn kyi ke ndò pomə̂ zaynze, kə ghàyn pomə nə wùə nəyn, ə ghàyn za zaʼlê ə səmɔʼ zɛ ə ghàs tè zaʼle sê ghàyn za ə fɨnə nyâʼà sê ghàyn ə ŋwàʼlè.

¹⁶ Ə Pɛ̂pɛ ə ghâsènì Njisə̀s Klâys nâʼà è ngɨŋ ə vəyn yî Zhə̀fè Pɨ̀a ghâsènì vɛ ə è tè kɔ̀ŋə ghâsènì ə fo ghâsènì è təmə tɛghe, è kwaʼtè elɨmtə zɛ ə ze tə mîə va tɔynə̂ ə vəyn afùʼ.

¹⁷ Fe nə̀ nə̂ ə ghàyn ə kyi ə̀təm ə tɛ è tyaʼa sə̂ nə̂ fɨnə wâmnə̀ kə ə̀ghɛ ə chûŋghè shîŋə̀ tekɨ̂m.