2 Kolìŋ 2 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyiə nyi eghɛ zɛ ə m nji chɔʼnêzè se tàʼa kɛsə pə̀yn se ghàyn se nə̀yn nə ghànə fɨnə saŋnə va.

² Kûmə̀ nə ə m tè nyì se nə̀yn nə ghàyn ə saŋnə̂ va, ə nyi ndè zôyn se nə̀yn nə mə saŋnə̂? Ə pa nyi ke ə̀ghɨ ghɛ m nə̂yn nə ghənə saŋnə̂ va.

³ Ə̀ nyiə nyi eghɛ zɛ ə m tè nyaʼ ŋwàʼlè zɛ sê ghàyn, m tè kɔ̀ŋɔ va se pə̀yn se ghàyn nə ghàyn nəyn mi m mə saŋnə̂ va, mə ə̀ pɨl nyi ghàyn ghɛ ə ghàyn kyi se nə̀yn nə mə saŋnə̂. Kûmə̀ nə m lote ke ndò nə shîŋə̀ kɛ m saŋnə, nâʼà ghàyn əkɨ̂m e saŋnə̂ kəpî.

⁴ M tè nyàʼa ŋwàʼlè sê ghàyn mə tsôsvè nyîə lotê nyi ə mìə təm, è kɨsè shi me tsɨ̀əm̀ ə mì əshi. M tè nyàʼa chîəva se nə̀yn nə ghànə saŋnə̂ va, pîza se pɨlə nə̀yn nə ghàyn fe kê èndom vɛ m kɔ̂ŋɔ̀ ghàyn ətəyn ə̀kɨ̂m.

Ə kyi se lɛ̀sə fo wùə ashìŋə̀ ke è nə̀yn pofse

⁵ Zôyn, ə wùə vîvè nyi mə è və nə̀yn nə və mɔʼɔ saŋnə̂ va, ə nyi mə è paʼà nə̀yn chi sê mi pîza se ghàyn əkɨ̂m, endom vîvè. (M pîə zɨ̂nə mə kûmə̀ nə m kɔ̂ŋɔ̀ va se nə̀yn nə ghɛ ətəynze ə tɛ se vəyn.)

⁶ Ghàyn yîghe se tsɨ̀ se nyi mə ə kàynè pɔynsê wùə nə vɨnə mə, mə zɛ mə ə kwəyn.

⁷ Zôyn, ghàyn pɨl lɛ̂sè fo vəyn, ə fo vəyn è təm ə zɨtəghe, endom se nə̀yn nə kə è və kosə̂ kyaʼà tsɛsə̀, mə è kàʼa è laynse pfɨ mɨsè.

⁸ Ə̀ za nyi eghɛ zɛ ə m chyatə̂ ghàyn nə ghàyn kɛse nəyn ə è və ke nə ghàyn pa kɔ̂ŋɔ̀ kə ndò vəyn.

⁹ M tè nyaʼ ŋwàʼlè se ghàyn se kotê endom vɛ ə ghàyn nyi mə ghàyn ə nò nâʼà sə ŋaŋ əfètəyn èmɔ̀m, è kɨsè se kê nə ghàyn pa nyi ke ndò èpɨaʼtêzè sə̂ zɨə ə̀ghɛ ghɛ m pîə mə.

¹⁰ Shîŋə̀ kɛ ə ghàyn lɛ̀sè fo ghɨə ətə̂ èghɛ zɛ ə ghənə nyi mə ə nə̀yn, mə lɛ̀sə̀ fo kəpî ghənə. Ghɛ zɛ m lɛsè fo, ezhoghɛ ghɛ zhîze fə nyi kə m lɛse fo, ə zə nyi ke kûmə̀ ghàyn ə Klâys ə shi.

¹¹ Ghâsènì nə̀ nyiə mə kə ə tàʼa chwì endom se pɛ̀ sèndɔŋ kûmə̀ nə ghâsènì se kâynè ke ndò m̀nàŋ mə vəm̀.

Pɔ̂l kyi efɨmsê ə Tɨ̀luwàs

¹² Ə̀ tè nyi kə m pə̂yn tâyn ə Tɨ̀luwàs se ndàʼa tom èchùŋ ə̀ Klâys, ə fe nə Pɛ̂pɛ nyi mə è və pɨaʼtê nə m ndaʼa,

¹³ pîza mə tàʼa kyîə pɔ̂ynè zɨ̂mè kûmə̀ nə m tè paʼà fe ànyìə ghâsènì Taytùs fumə. Mə ke pì nə ghənə faŋ ke àchûŋ ə tsɛ̂ nduə ə Màsèndonyà.

Ghâsènì ə tɨm zhi ghɛghe əkɨ̂m tɔynə̂ ə Klâys atyaʼ

¹⁴ Pîza, zɔ̀ŋnèkè nyi sê Zhə̀fè kə è zàŋsə̀ kwìə ndùə è ghâsènì è tyale tɔynə̂ ə Klâys se tyə̀yn nə ghâsènì ə tɨm zhi, tɔynə̂ ə ghàs, tom ə̀təyn e waŋə ndûə kə luʼ tekɨ̂m, ghɨ ghe kê Vəyn.

¹⁵ Kûmə̀ nə ghàs nyi kə endiŋ kə Klâys nyɔ̀ʼɔ̀ sê Zhə̀fè, zûʼə̀ ətəynke e kwiə ka əfètəyn ə̀ghɨ ghɛ ə Zhə̀fè sɔ̀zâ, è kɨsè ghɨ ghɛ ə ghe njîsə̀ ndûə.

¹⁶ Ə̀ nyi sê ghɨ ghɛ ə ghe njisə̀ ndûə, lɨ̂m endiŋ ətəynke e pofə, mə ke kaʼa ə ke zhwi ghənə. Pîza se ghɨ ghɛ ə Zhə̀fè sɔ̀zâ, lɨ̂m ətəynke e fɔmə, fo èndam. E za nyi nə wùə vîvè vayn kàʼa è nəyn fɨ̂aʼ nə zɨnə mə.

¹⁷ Ghàs va kə tsɨ̀tsɨ̂ ə̀ ghəmɔ̀ʼɔ ghɛ ə ghe nji ghɛ Fezhə̀ sə afɨa ezhɔynke, pəʼlə̂ sə ekɛ. Ə̀ tom Fèzhə̀ ghàs nə ə nə̂ èfɨ̂aʼ nə zɨ̂nə̀, ghàse ndàʼà kə nâʼà səmɔʼ ə Zhə̀fè əshi kə əghɨ efɨaʼa ə Klâysghè.