1 Tèsàlonikà 5 - Ŋwàʼlè ə̀ Fèzhə̀ Mkâyn Mə̂ Fèm

Ghàyn pɨaʼte ngɨŋ saynse ə lɨmtə̂ ètuʼ vɛ ə Pɛ̂pɛ tə pə̂ ətəyn

¹ Ghàs kɛse kyi pi va se nyàʼ se tsàyn sê ghàyn ə ghɔnyìghe nə, ə̀ nyi ètuʼ vɨ̂yn, kɨ̀sə ashìŋə̀ kɨ̀yn ə Pɛ̂pɛ tə kɛsə pə̂ ətəyn.

² Ghàs pìə nyî kûmə̀ nə nâʼà ghàyn nyîə ke sə ghàyn ngɨŋ nə, tuʼ vɛ ə Pɛ̂pɛ tə kɛsə pə̂ ətəyn tə kwənə mə wùə ke va, kè kə wùə è chɔŋɔ nə̂ è və pə̂ ètuʼve.

³ Shîŋə̀ kɛ əghɨ tə nə̂ ə pîə nə, “Pɔ̂ynè nyì ndô, tsôsvè va,” ə tsôsvè pfɨ̀ŋə̀ pəyn sê ghənə ə ve ə kwə̂mə̀ kə nyî, kèpi èghɨ kə vayn zhə̂tə̀ se zafə wùzhɔyn. Nâʼà wùə sətəyn tə tə va.

⁴ Pîza sê ghɔnyì ghɨmə ghàyn va kə ghɨ ghɛ ə ghe ndamə ə fètəyn àlɨm, kə tuʼ ə Pɛ̂pɛ nə vɨ̀nə tə pfɨ̂ŋə̀ pəyn endom vɛ ə wùə èchɔŋɔ pə̂.

⁵ M piə nyî kûmə̀ nə ghàyn əkɨ̂m nə̀ ə̀ghɛ àchûŋ, ndamə chichi, mə ze nyi kepî eghɨ kə ndamə epayn, nyi ə̀ghɨ zo chwîghè.

⁶ Kə ghɛ ətəyn se nyi nyî, ghâsènì kyi va sə̂ tsɨ̂ynə̀ pɨənə̂ kə kə ghɨ mɔʼɔ, ghâsènì kyi sə̂ pɨl tsɨs pfɨ̂tə̀, fɨnə kyîə sèngɨŋ sə ghasènìse.

⁷ Kûmə̀ nə ghɨ ghɛ ə ghe pɨənə̂, pɨənə̂ etuʼve, ghɛ lɨ̀m ko, ə̀ nyi ètuʼve.

⁸ Pîza, ghâsènì nyi əghɨ ə zo chwîghè. E za tyə̀nə̀ nə ghâsènì kyî se fɛtə̂ kyiə sengɨŋ sə ghasènìse. Kyî epomə̂ ə ghasènìze sê Zhə̀fè è kɔ̂ŋ ə ghasènìzè kyi se kɨ̀ŋtè ə ghâsènì kə akɨ̀ŋtè angàŋtèkè. Kwâʼtè elɨmtə ə ghasènìze nə ə nə̀ sɔza ghâsènì kyi se kɨ̀ŋtə ghâsènì kə afɔ eghɔ̀ŋke.

⁹ Ghâsènì kyi sə̂ kɨ̂ŋtə̂ nyî kûmə̀ nə Zhə̀fè tè pâʼà chɔʼ ghâsènì se saʼa ghâsènì se fɨnə pɔynse, pîza nə ghâsènì kyi sɔzaze tɔynə̂ ə Pɛ̂pɛ ə̀ ghâsènì Njisə̀s Klâys,

¹⁰ vɛ ə è tè kwu kûmə̀ ghâsènì kə ghâsènì ə nyi kàʼa ndamə è vəyn, kɨ̀sə ghâsènì nyi etwɔ, kɨ̀sə nyi mə ə kwu.

¹¹ Kûmə̀ nyî m pìə nə, ghàyn e fo ə̀təm ə tɛ sê ngɨŋ saynse, tsâmtə̀ kəpî sèngɨŋ saynse kè kə ghàyn nə̀ zôyn.

Etəftê ekwuŋsəze

¹² Ghɔnyìə, ghàs chyatə̂ nə, ghàyn ə fɛtə ngɨmnə̂ ə̀ghɨ ghɛ ə ghe fɨ̂aʼà ə ghàyn əfètəyn, chwîtə̀ ghàyn, fɨnə təftə̂ ghàyn, endom ə Pɛ̂pɛve kə ndɔ̀ʼɔ ghàyn tə pfɨ ə pi.

¹³ Ghàyn e ngɨmnə̂ ghənə nâʼà àchûŋ fɨnə kɔ̂ŋɔ̀ ghənə kûmə̀ àfɨaʼ kɛ ə ghənə fɨaʼà. Ə pɔ̂ynè ə nyi ə ghàyn ə fètəyn shîŋə̀ tekɨ̂m.

¹⁴ Ghàs chyatə̂ kəpi ghàyn ə ghɔ nyiə nə, ghàyn fo fɨ̀as sê ghɨ ghɛ ə ghe kɔ̂ŋɔ̀ va sə̂ fɨ̂aʼà, ə nəyn nə ghɨə fanəghe ə kyi ə̀təm ə tɛ, ə tsamte ghɨ ghɛ ə ghənə kyiŋə tsâmtèzè. Ghàyn e kolə ə̀təm se ghɨghe əkɨ̂m.

¹⁵ Kə ghàyn nə pomə̂ nə wùə ə ghàyn ə fètəyn nə pə̂ynsè pi è pi, pîza ghàyn e zâŋsə̀ mɔ̂msə̀ sə̂ nə̂ ə̀ghɛ ə chûŋə̀ sê ngɨŋ saynse, è kɨsè se ghɨghe əkɨ̂m.

¹⁶ Ghàyn e sɨŋə shîŋə̀ tekɨ̂m,

¹⁷ tsə̂mə̀ sê Zhə̀fè shîŋə̀ tekɨ̂m,

¹⁸ fo àzɔ̀ŋnè nâʼàpî eghɛ èkè zɛ ə ze kyâyn, kûmə̀ nə ə̀ zɨnə nyi eghɛ zɛ ə Zhə̀fè kyiŋə nə ghàyn ə nə̂ tɔynə̂ ə Klâys Njisə̀s.

¹⁹ Kə ghàyn ə tâsə̀ èfɨ̂aʼ zɛ ə Zuʼse Ŋwaʼase nə̂ ə ghàyn ə fètəyn;

²⁰ kə ghàyn nə kɔ̂psè tom zɛ ə ghɨə ndaʼà sê ghàyn mə è ndò sê Zhə̀fè.

²¹ Ghàyn e pɨlə kyâʼsə̀ ə̀ghɛ ə̀kɨ̂m ghɛ ə ghɨə pîə nə Zuʼse Ŋwaʼase ə tyə̀yn se ghənə se fe nə sə tyə̀yn mə se paʼà tyə̀nə. Ə ze nyi səmɔʼ, ghàyn pomə̂ sê ghənə,

²² ghàyn kwiynse nâʼàpî èghɛ èkè zɛ ə nyi eghɛ ətəm ə pighe.

²³ Ə Zhə̀ fɛ ə fe fo pɔ̂ynè sê ghâsènì nəyn ə ghàyn ə nyi è ŋwaʼze nâʼàpî endom èkwùə. Ə Zhə̀fè nəyn ə təm ghaynghe, è zuʼ saynse, è wiyn vaynve ə kyi va ghâmzè nâʼà endom vîve etuʼ vɛ ə Pɛ̂pɛ ə ghâsènì Njisə̀s Klâys kɛsə pə̂.

²⁴ Zhə̀ fɛ ə fe tɔŋə ghàyn nə ghàyn ə nyi èŋwaʼze nyîə ndə̂mə̀ ètsɨnè ə vəynze, nyi se nə̀yn nə ghàyn ə nyi èŋwaʼze.

²⁵ Ghɔnyîə, ghàyn e tsə̂mə̀ se ghàs.

²⁶ Ghàyn tɔŋte ghɔnyì ghanə nâʼà ə̀kɨ̂m kè nâʼà endom se tyə̀yn ekɔ̂ŋ ə ghɨə poməghe.

²⁷ M chyatə̂ ghàyn tɔynə̂ ə Pɛ̂pɛ atyaʼ nə ghàyn tɔŋɔ ŋwàʼlè zɨ̀yn sê ghɨ poməghe nâʼà ə̀kɨ̂m.

²⁸ Ə Pɛ̂pɛ ə̀ ghâsènì Njisə̀s Klâys tyəyn fùʼ ə vəynke sê ghàyn.