1 Tèsàlonikà 4 - Ŋwàʼlè ə̀ Fèzhə̀ Mkâyn Mə̂ Fèm

Ndam zɛ ə ze nə̂ nə Zhə̀fè ə saŋnə̂

¹ Se mɨsè ə ghɔnyiə, ghàyn tè zaʼle sê ghàs ndom vɛ ə kaʼa ndamə ətəyn se nə̀yn nə Zhə̀fè ə saŋnə̂. Səmɔʼ ə̀ vɨnə mə nyi ke nâʼà èndom vɛ ə ghàyn ndamə ətəyn. Ghàs chyatə̂ ghàyn zôyn nâʼà sə ŋaŋ, ezə ə Pɛ̂pɛ Njisə̀szè nə ghàyn fɨyn nəyn tsɛ za.

² Ghàs chyatə̂ nyî kûmə̀ nə ghàyn se ke ndô ghɛ ghɛ ə ghàyn tè zaʼle sê ghàs. Ghàs tè nəyn zɨnə mə tɔynə̂ ə Pɛ̂pɛ Njisə̀s atyaʼ.

³ Zhə̀fè kyiŋə nə ghàyn ə nyi èŋwaʼze, kyiŋə nə kə wùə se ghàyn ə nə̂ ə̀ghɛ ə nyələghe èwiyn ə vəynve,

⁴ fɨnə kɔ̂ŋɔ̀ nə nâʼàpî wùndômə̀ èkè ke se ndam yî zhwîə vəyn àchûŋ, endom eŋwaʼve, èndom vɛ ə ghɨə nə kɔʼsə vəyn ətəyn,

⁵ zâ va nə tɨ̂m zɛ ze wìynze se nyɨ̀ŋə̀ è wùzhɔyn ə chisə̂ èndam zɛze kə ghɨ ghɛ ə ghe keva Zhə̀fè nə̀.

⁶ Fâ fètəyn èghɛ, kə wùə se ghàyn tə nəyn pofsê sê ghɔnyì ghaynghe, pî sə chɨ̂ynə̀ ə̀ ghɔ nyì ghaynghe. Ghàs ə tə pì chi ghɛ ghɨ̀nə se ghàyn, ə fo fɨ̀as se ghàyn nâʼà sə ŋaŋ nə Pɛ̂pɛ tə fo ètsôs se ghɨ ghɛ ə nə̂ kyì əghɛ nə ghɨ̂yn.

⁷ Kûmə̀ nə Zhə̀fè tè paʼà tɔŋə ghâsènì nə ə nə̂ ə̀ghɛ ə nyələghe è wiyn ə ghasènìve. Pîza Fe tè tɔŋɔ nə ghâsènì ə ndamə èndam eŋwaʼze.

⁸ Ə̀ kwiynsə̂ nâʼàpî ndè ghɛ zɛ ə ghàs zaʼlə, ə è və kwiynsə̂ va wùə, pîza kwiynsə̂ Fèzhə̀ fɛ ə fe fo Zuʼse Ŋwaʼa sə vəynse sê ghàyn.

⁹ M fe nə ghàs kyi va sə̂ fɨnə nyâʼà èghɛ sê ghàyn kûmə̀ endom vɛ ə ghàyn kyi sə̂ kɔ̂ŋɔ̀ ə̀ghɨ ə pomə mɔ̀ʼɔ ghətəyn. Zhə̀fè ngɨŋ ə̀ vəyn ə zaʼlê ghàyn kə ghàyn kyi sə̂ kɔ̂ŋɔ̀ sèngɨŋ saynse.

¹⁰ Səmɔʼ ghàyn ə tyə̀yn kɔ̂ŋ nə zɨ̂yn sê ghɔ Fezhə̀ghè əkɨ̂m endaʼ ə Màsèndonyàzè, pîza ghàs e pa chyatə̂ kə ndò ghàyn ə ghɔnyì ghasə nə, ghàyn ə kɔ̂ŋə̀ tsɛ̂ zamə.

¹¹ Ghàyn mɔmse nâʼà è tyaʼa sə̂ ndamə endom vɛ ə ve pə̂ va èfɨmsê zè sê ghɨə mɔ̀ʼɔghe. Kə ghàyn nə njiə tsɛ ə ghɨghə ghɛ. Ghàyn e fɨ̂aʼà è gho ghaynghe sə̂ kyi èfɨa vɛ ə ghàyn kyiŋə kè kə ghàs tè tsàyn sê ghàyn.

¹² Ə ghàyn nə̀ nyî ə ghɨ ghɛ ə va əghɨ ə poməghe ə ngɨmnə̂ ghàyn, ə ghàyn ə naynə̂ va sê wùə vîvè.

Epə̂ ə Pɛ̂pɛze

¹³ Ghɔnyiə, ghàs kyiŋə nə ghàyn ə ke èghɛ zɛ ə ze nyi səmɔʼ kûmə̀ ə̀ghɨ ə kwuə. Ghàs kyiŋə nə ghàyn ə ke èghɛ nə zɨ̂yn kə ghàyn ə chîə va kə ghɨə mɔʼɔ ghɛ ə ghe kwaʼtə̀ lɨmtə va se tə zòmə̀.

¹⁴ Ghâsènì pomə̂ ndò nə Njisə̀s ə tə kwu ə kɛsə̂ zômə̀, fɨnə pomə̂ nə Zhə̀fè tə nə̂ ə ghɨ ghɛ ə tè kwu mə ə pomə se Njisə̀s ə pəyn ə nyi yî ghə̀ Njisə̀s.

¹⁵ Ghɛ zɛ ə ghàs zaʼlə sê ghàyn nyi eghɛ zɛ ə Pɛ̂pɛ tè zaʼle. Ghâsènì ghɛ ə tə pə̂ ə pa nyi ashìŋə̀ kɛ ə Pɛ̂pɛ Njisə̀s kɛse pə̂yn tə ndûə kotə̂ va vəyn sə shi sê ghɨ ghɛ ə tè nyi mə əkwu.

¹⁶ Ə̀ tə pə̂ ə nyi etuʼ vɛ ə Pɛ̂pɛ nâʼà è ngɨŋ ə vəyn tso pə̂yn ekwùtwəyn, ə è pɨa è kyə̀ è tɛ, ə tsì èghaʼâ ə wâmnə̀, ə ghɨ fɨyn zɨ kə tɔŋ sɔŋ ə Fezhə̀zè, ə ghɨ ghɛ ə ghe tè piə kwuə ndò, samsə̂ Klâys, ə zômə̀ sə shi.

¹⁷ Epàm ətəyn Zhə̀fè tə njìə ghənə ə è paʼse sê ghâsènì ghɛ ə pa ndamə, ə è nji kɔʼ è ghâsènì əfètə̂ sèmbàʼ nə kwəyne è Pɛ̂pɛ awulə.

¹⁸ Nyiəmə ghàyn e fo ə̀təm ə tɛ sê ghɔnyì ghaynghe è ghɛ nə ghɨ̂yn.