1 Tèsàlonikà 2 - Ŋwàʼlè ə̀ Fèzhə̀ Mkâyn Mə̂ Fèm

Efɨ̂aʼ zɛ ə Pɔ̂l tè nəyn ə Tèsàlonikà

¹ Ghɔnyiə, nâʼà ghàyn sə ghàyn ə ngɨŋ kyi sə̂ ke nə pə̂yn zɛ ə ghàs tè pə̀yn môtè ghàyn za pâʼà njìsè səndô.

² Ghàyn e ke nə ə̀ tè nyi tsɔ̀fə kə ghàs pəyn ə Tèsàlonikà mə ghàs ə fe ngəʼ nâʼà sə ŋaŋ, ə nyâplə̀ è ghàs, ə sôylə̀ ghàs ə Filìpây. Nâʼàpî kə ghɨə tsɨəghe tè kɔ̀ŋə va nə ghàs ndaʼa tom ə̀təyn, Zhə̀fè ghasènìfe ə tə fo ghàs ètəm ə tɛ nə ghàs tsayn tom èchùŋ sê ghàyn mə è ndò pə̂yn sê vəyn, nâʼàpî kə ghɨ tsɨəghe tè kɔ̀ŋə va nə ghàs ndaʼa tom ə̀ Fèzhə̀.

³ Chyatê zɛ ə ghàs chyatə ghàyn vachi kûmə̀ ètsas zhîze, è kwaʼtè epize, pî kûmə̀ nə ghàs mɔ̀msə̀ se lə̀ŋtə ghàyn.

⁴ Ghàs pɨlə wàmnə̀ kə kə Zhə̀fè kyiŋə kûmə̀ nə è və kyàʼsè naynê ghàs ə fe nə ghàs nyi ə ghɨ ə è kàʼa è samse nə ghàs ndaʼa tom èchùŋ, nyiəmə ghàs e ndàʼà va endom vɛ əghɨ kyiŋə, pîza se nə̀yn nə Zhə̀ fɛ fe kyaʼsə̀ naynə təm ghasghe ə saŋnə̂.

⁵ Ghàyn ke nə ghàs tè paʼà pə̀yn sê ghàyn wâmnə̀ efɔmsê echoze. Zhə̀fè nyi tsɛ̀ èsaʼ se ghàs nə ghàs tè paʼà nə̀yn ghɛ ghɛ ghàs tè nəyn kûmə̀ əshi ə fɨəghe, sè kyiŋə se ndə̀tè.

⁶ Ghàs tè nə̂ va ghɛ nə ghɨghe ə tsîtə̀ ghàs, ə vachi ghàyn, pî ə̀ghɨ ə mɔ̀ʼɔghe sə̂ pɔmsə̂ ghàs.

⁷ Ghàs tè kàʼa ə ghàs ə pfɨfə nâʼà èfɨa sê ghàyn kə ghɨətom ə Klâysghè pîza ghàs ə pɔsə̂ kɨmə̂ kə ndò. Pîza ghàs tè nyîə pɔynə̂ shîŋə̀ kɛ ə ghàs tè nyì ghâsènì kə nyìə vayn ə è tɔ̀ʼnə̀ è ghɔ vəynghe.

⁸ Kûmə̀ èkɔ̂ŋ zɛ ə ghàs tè kyi se ghàyn, ghàs tè nyi èpɨaʼtêzè se ndàʼa tom èchùŋ sê ghàyn mə è ndò pə̂yn se Zhə̀fè, nyi kepî èpɨaʼtêzè se kwu kûmə̀ ghàyn. Ghàs tè nyîə kɔ̂ŋə̀ ghàyn nâʼà sə ŋaŋ!

⁹ Ghɔnyiə, ghàyn nyiə ke kə ghàs tè fɨ̀aʼa nâʼà sə ŋaŋ! Ghàs tè fɨ̀aʼa èchwì fɨ̂aʼà ètuʼve kə ghàs tàʼa fɨmsə̂ ghàyn endom vîve, kə ghàs ndàʼà tom nə zɨnə̀ ə Zhə̀fè fo nə ghàs ndaʼa sê ghàyn.

¹⁰ Ghàyn nyi setsɛ̀ èsaʼ sasse, Zhə̀fè e nyi kepî tsɛ̀ èsaʼ vâsvè nə, ghɛ ghàs ghe nəghe sê ghàyn ghɨ poməghe tè nyîə zo, nyi chichi, kyi va ləʼke.

¹¹ Ghàs tè kyî ghàyn kè kə pɨ̀a vayn kyi ghɔ vəynghe,

¹² fo ghàyn təm ə tɛghe, pɔsə̂ ə̀təm ghaynghe, pîə kwəynsə̂ kə ndò nə ghàyn ə ndamə endom vɛ ə Zhə̀fè kyiŋə, ə Fèzhə̀ fɛ ə fe tɔŋə ghàyn nə ghàyn ə nyi ə̀ghɨ ə vəyn elùʼ efɔ̀yn, è kɨsè ə vəyn epomsê.

¹³ Ghàs fo kəpî àzɔ̀ŋnè sê Zhə̀fè shîŋə̀ tekɨ̂m kûmə̀ nə kə ghàyn tè zɨte tom ə̀ Fèzhə̀ zɛ ə ghàs tè pə̀yn tsayn sê ghàyn, ghànə pomə̂ nə tom ə̀təyn ndo pə̂yn sê Zhə̀fè, ə̀ vachi sê wùə m̀sɔ̀ŋ. Tom nə zɨnə fɨ̂aʼà ndò ə ghàyn ə fètəyn ə ghɨ poməghe.

¹⁴ Ghɔnyiə, ghɛ zɛ ə ze tè tyə̀nə nə tom ə̀ Fèzhə̀ ə zhə̀tè se fɨ̂aʼ ə ghàyn ə fètəyn tè nyi nə, ghɛ ghɛ ghe tè kyàyn sê nɔ̂yn ə ghɨ kɛ ə ke pomə sê Klâys Njisə̀s ə Njòndyâ ə kyàyn kepî sê ghàyn. Ghɨ endaʼ ghaynghe ə fo ngəʼse sê ghàyn, ə̀ nyi kepî sèngəʼ sɛ ə ghɨ Njûsə̀ tè fo sê ghɨ pomə nə ghɛ,

¹⁵ ghɨ Njûs nə ghɨnə ə tə zhwi Pɛ̂pɛ Njisə̀s, è fɨ̀aʼtèsè ə tsə̀fsə̀ kəpi ghàs. Ghənə nə̂ nə Zhə̀fè ə nyɔʼsə̀ ètɔŋ ashìŋə̀ kɛ ə ghənə nə̂ nyiəmə! tɔŋ ə Fezhə̀ və zafə, fɨnə nə̂ nə nâʼàpî ndè ə nyi pàyn ə ghənə!

¹⁶ Endom nə vɨ̂yn ghənə tè mɔ̀msə se tàsè nə kə ghàs wamne sê ghɨ ghɛ ə tè vachi ə̀ghɨ ə Njûsghè kə Zhə̀fè sɔza ghənə. Kûmə̀ zɨnə mə, ghənə ə nə̀yn ke pise nyiə se sɛ se kɔʼ kwəyn. Zhə̀fè nyîə nyɔʼsə̀ ètɔŋ sê ghənə zôyn, shîŋə̀kè kɛ ke kwəyn se fo etsôs sê ghənə!

Pɔ̂l tè nyîə kyiŋə se fɨnə ndûə mòtè əghɨ ə Tèsàlonikàghè

¹⁷ Ghàs kyiŋə se pì ə ghɔnyìə ghasə nə, ə̀ tè nyi kə ghɨ yîghe nə̂yn nə ghàs ndo za ghàyn sə fendîŋə̀ fə ashìŋə̀ nyî, ghàs ə ndò kə è wiyn vasve pîza təm ghasghe ə faŋa kwâʼtə̀ kə ghàyn. Ghàs tè nyîə kyiŋə nâʼà sə ŋaŋ se fe ghàyn, ə mɔ̂mə̀ nâʼà è tyaʼa se kɛsə pə̂ fe ghàyn.

¹⁸ Ghàs tè nyîə kyiŋə se kɛsə pə fe ghàyn, nâʼà mi è ngɨŋ zɨ̂mzè ə mɔ̀msə̀ se zaʼâ shîŋə̀ tepɛ̀ pîza, Satàyn ə tàʼa za nə ghàs pəyn.

¹⁹ M tè kyiŋə se pə̀yn sê ghàyn kûmə̀ nə ə̀ nyi ghàyn ə ghàyn nə̂ nə ghàs ə kwaʼtə̀ lɨmtə, fɨnə nə̂ ghàs esaŋnə̂, kûmə̀ ghàyn, ghàs tə nə̂ ə pfɨ̂nə̀ àngàŋtè ə Pɛ̂pɛ ə̀ ghâsènì Njisə̀s əshi nə ghàs ə tɨm zhi ashìŋə̀ kɛ ə è kɛse pə̂yn.

²⁰ Səmɔʼ, ə̀ nyi kûmə̀ ghàyn ə ghàs ghaŋsə wiynve, fɨnə saŋnə̂!