1 Tèsàlonikà 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyâʼà mi Pɔ̂l, è Silàs è Timotì è ŋwàʼlè zɨ̀yn sê ghàyn ghɨ e poməghe ə Tèsàlonikà, mə za nyi əghɨ ə Fezhə̀ghè, mə za nyi pɨa, è ghɨə Pɛ̂pɛ Njisə̀s Klâysghè. Ə fùʼkè, è pɔ̂ynè ə nyi sê ghàyn.

Endom vɛ ə ghɨ Tèsàlonikàghè tè tyə̀yn sê ghɨə kə kaʼa pomə sê Zhə̀fè

² Ghàs fo àzɔ̀ŋnè sê Zhə̀fè shîŋə̀ tekɨ̂m kûmə̀ ghàyn əkɨ̂m. Ghàs tsə̀mə̀ sê ghàyn shîŋə̀ tekɨ̂m ezhoghɛ ə ghàs tsə̀mə̀.

³ Ghàs piə tsə̂mə̀ sê Zhə̀fè, ə Pɨ̀a ghâsènì, ghàs e kwâʼtə̀ kə ghàyn nə̂ ghɛ ghɛ ə ghàyn nyi mə ə kyî kyì epomə̂zè se ghəynghe, kwàʼtə̀ kə kɔ̂ŋ zɛ ə ghàyn kyi nə̂ nə ghàyn ə fɨaʼà sə ŋaŋ, è kə kwaʼtè zayn ə Pɛ̂pɛ Njisə̀s Klâys fɛtə tɛ.

⁴ Ghɔnyiə, ghàs ke nə Zhə̀fè kɔ̀ŋɔ̀ ndò ghàyn, ə chɔʼɔ ghàyn nə ghàyn ə nyi ə̀ghɨ Vəynghe,

⁵ kûmə̀ nə ghàs tè zaʼlə va tom èchùŋ sê ghàyn kè etùə ècho, ghàs ə tə ndàʼà kepî è tyaʼa, è Zuʼse Ŋwaʼase, è pomə̂ etɛze nə ze nyi səmɔʼ. Ghàyn ke ndô kə ghàs tè ndamə ə ghàyn ə fètəyn. Ndam nə zɨ̂nə̀ tè nyi se tsàmtə ghàyn.

⁶ Ghàyn ə tə zaʼlê se ndam kə ghàs è kɨsè kə Pɛ̂pɛ, naʼapi kə ghàyn tè fe tsôsvè sə ŋaŋ, Zuʼse Ŋwaʼase ə nə̀ ghàyn ə fiə tom ə̀təyn è saŋnêzè.

⁷ Kûmə̀ nyi, ghànə kə̀mnə̀ nyi kə chwìə sê ghɨ e poməghe əkɨ̂m ə Màsèndonyà è Àkayà.

⁸ Ghàyn tè paʼà ndàʼà ke tom ə̀ Pɛ̂pɛ ə Màsèndonyà è Àkayà, pîza tom kûmə̀ èndom vɛ ə ghàyn samse Zhə̀fè ə tə waŋ ke luʼ tekɨ̂m, nyiəmə, ghɛ zhîze tè fɨyn va ə ghàs tè kàʼa pi.

⁹ Ghàs ə zɨ wâmnè zɛ ə ghənə wâmnə̀ kûmə̀ èndom echûŋ vɛ ə ghàyn tè fi ndzɨsê ghàs ətəyn kə ghàs mòtè pə̂yn ghàyn, è kɨsè kə ghàyn tè kwiyne sə chûmtə̀ èfɨaʼsè, sè chûmtə̀ Fezhə̀, ə Fezhə̀ fɛ ə Fe fo ndamze, fɨyn nyi səmɔʼ.

¹⁰ Ghənə ə fɨyn tsayn kə ghàyn lɨmtə nə Va Fèzhə̀ tə kɛse pəyn ekwùtwəyn. Ə və zòmsè Njisə̀s nə vɨnə mə, è vɛ è sɔ̀zâ ghâsènì ə Zhə̀fè enyɔ̀ʼsè etɔŋ vɛ ə ve tə pɔynsə ghɨ ghɛ ə ghe nə̂yn pi.