तीतुस 2 - बारेली पावरीखोरली शिक्षा पोछोव चालनो 1 बाकीन तू ओसला वाते कोया कोर, जे खोरला प्रचारोन लायक छे. 2 मतलब डाहला माणसे जागता एने गंभीर एने संयमी होय, एने तिंदरू भुरसू एने मोंग एने धीर पाकु रोये. 3 इना रितीसी डाहला बायराण चाल चलन धोरमी माणसो सारखी रोये, चे चुगली लागाळने वाली एने मोंदळाय नि, बाकीन वारली वाते सिकाळने वावी जुवे. 4 काहाकि चे जुवान्या बायरा काजे जोताळता रोये कि आपना ओदमी पुठी एने पुऱ्यान पोर मोंग कोर; 5 एने सोयावी, चुखली बायर घोरोन कारभार देखणे वावी, वारली एने आपना-आपना ओदमीन कोयामा रोयने वावी रोये, काहाकि परमेश्वरोन वचनोन बुराई होयनो नि जुवे. 6 ओसुत जुवान्या माणसो काजे बी सोमजाड्या कर कि हदमा रोयू. 7 आखा वातोमा खुद काजे वारला कामोन नमुना बोनु. तारा प्रचारमा सापसूत्र एने खोरलो, 8 एने ओसो खोरलो देखायनो जुवे कि कुदू इनाक कोय सके, जिनासी दुष्मोन आमरेपोर काहनु गुणू लागाळने टेमे नि हरीण लाजवाय जाय. 9 पावोर काजे सोमजाड कि आपना-आपना मालिकन कोयामा रोयू, एने आखा वातोमा खुश कोरु, एने पोछु उलटू जोवाब नि आपे. 10 चुरी चालाकी नि कोरे, पुन आखा भातीन पुरा विश्वासी जुवे कि चे आखा वातोमा आमरा छुटकारू आपनेवावा परमेश्वरोन प्रचार शोभा बोढावु. 11 कि परमेश्वरोन दया प्रगट छे, जो आखा माणसोन छुटकारान वोजा छे, 12 एने आमुक चेतावनी आपे कि आमुक अभक्ती एने संसारन भुंडली मोर्जीसी मन फिरावनीन इना जोगोमा संयम एने धर्म एने भक्तीसी जीवन जिवू. 13 एने इनी सोयावा आसोन मतलब आपना मोटला परमेश्वर एने छुटकारू आपने वावु येसु मसिहन महिमा प्रगट होयनेन वाट जुवता रोयू. 14 जू खुद काजे आमरेन कोरता आप देदू कि आमु होर एक भातीन पापोमा गोथू छुळाव लेय एने चुखा कोरीन आपनेन कोरता एक ओसी जात बोनाव लेये जे वारला-वारला कामोमा तीयार जुवे. 15 आखा अधिकारी पुठी जे वाते कोय एने सोमजाड, एने सिकाळतू रोय. कुदु तुसेक कम समजनो नि जुवे. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation