तीतुस 1 - बारेली पावरी

सुभेच्छा

¹ पौलुसोन भूनी गोथो जू परमेश्वरोन सेवक एने येसु मसिहन प्रेषित छे, परमेश्वरोन नेवाळला माणसोन भुरसू एने तिना खोराइन उखाइतान अनसारे जो भोक्तीन अनसारे छे,

² तीना ओमोरकाईन जीवनोन आस पर जेरी वायदू परमेश्वर, जी झूट नि बुल सोकतलु सनातनसी कोरलु छे,

³ बाकीन सही टेमो पर तेरा वचन काजे तिना प्रचारन लारे प्रगट कोऱ्यु, जू आमरू छुटकारू आपनेवावा परमेश्वरोन आग्यान अनसारे मेसेक सोपायलो छे.

⁴ तीतुसन नावे जू भुरसान जुळायला विचारसी मारू खोरलु पुऱ्यु छे; परमेश्वर बास एने आमरू छुटकारू आपने वावु मसिह येसुन अनुग्रह एने शांती जोळती रोये.

जुनलान योग्यता

⁵ मे इनान कोरता तुसेक क्रेतमा छुळीन आवलु होतु कि तू बाकी वातो काजे सुदारीन एने मारी आग्यान ओनसारे सोहरो सोहोरोमा डाह-डाहाणूक नेवाळ लेये.

⁶ जे निरदोष एने ओवी एकुत लाडीन आदमी होय, जिंदरा पुऱ्या विश्वासी होसे तिंदरेमा लुचळाय एने मतलबी गुणू नि रोयनो जुवे.

⁷ काहाकि पुढारी काजे परमेश्वरोन भंडारी होयनेन वजा निरदोष होयनो जुवे, नि जिद्दी, नि रीसावू, नि मोंदळ्यु, नि लोळाय कोरणे वावु, एने भुंडला कोमायीन लालच्यु नि रोयनो जुवे.

⁸ बाकीन पाहांतऱ्यान मान सन्मान कोरणे वावु, भोलाई कोरणे वावु, खुद नियाव कोरणे वावु, चुखलो एने जीत वावु रोयनो जुवे;

⁹ एने चू भुरसा वावु एने वचन पर जू धर्मान प्रचारोन अनसारे वातळू रोये कि खोरली शिक्षान प्रचार आप सोके एने दुष्मोनोन मूय बी बंद कोर सोके.

पाखंडी मास्तर

¹⁰ काहाकि घोणा माणसे मोतलोबी, झूट एने धोकू आपनेवावा खास कोरीन सुंता वावा मायला.

¹¹ इंदरा मूय बंद कोरनो जुवे, ये माणसे भुंडली कोमायीन कोरता गलत वाते सिकाळीन घोर ने घोर बिगाड देतला छे.

¹² तिंदरेमा गोथू एक जोणु, जू तिंदरूत भविष्य कोरता छे, कोयलु छे “क्रेतीन माणसे हमेशा झुटा एने भुंडला जोनावरे, उजग्या पेटू रोयतला छे.”

¹³ जी गोवायी छाचलीन छे, इनान कोरता तीनुक कोळक चेतावनी आप्या कर कि भुरसामा पाका होय जाये.

¹⁴ एने यहुदिन काहानी एने तीनु माणसोन आग्या पोर मनमा लागाळू, जे खोरलासी भोटकी जातला छे.

¹⁵ चुखला माणसोन कोरता आखा जे ये चुखला छे, बाकीन अधोरमी एने अविस्वासीन कोरता कानलोबी चुखो नि होय. बाकीन तिंदरी बुद्धी एने मोन दुयूबी भुंडला छे.

¹⁶ चे कोयतेला कि आमु परमेश्वर काजे उवेखतला, बाकीन आपना कामोसी तेरु नकार कोरे काहाकि सिगी एने आग्या नि मानने वावा छे, एने कानलात वारला कामोन लायक भी नि होय.