रोमी 8 - बारेली पावरी

चुखली आत्मान लारे जीवन

¹ आखरीमा हिमी जे येसु मसिहमा छे तीनु पोर दोंडोन आग्या नी होय काहाकि चे डीलोन अनसारे नी बाकीन आत्मान अनसारे चालतला.

² काहाकि जीवनोन आत्मान शास्त्रनियमोन जो येसु मसिहमा मेसेक पापोन एने मोतोन शास्त्रनियम सी आजाद कोर देदू.

³ काहाकि जो काम नियम डीलोन वोजेसी कमजोर होयीन नि कोर सोकी, तीनुक परमेश्वर कोरलु छे, मतलब तेरात पुऱ्या काजे पापमय डीलोन सारखो, एने पापोन बलिदान होयनेन कोरता मूकल्यु, डीलोमा पापोन दोंडोन आग्या आप्यू.

⁴ इनान कोरता कि शास्त्रनियमोन विधी आमरेमा जे डीलोन अनसारे नि बाकीन आत्मान अनसारे चालतलो छे पुरो कोराय जाय.

⁵ काहाकि शारीरिक माणूस डीलोन वातो पोर मोन लागाळतला छे; बाकीन अध्यात्मिक आत्मान वातो पोर मोन लागाळतला छे.

⁶ शरीर पोर मोन लागाळनो ते मोत छे, बाकीन आत्मान वातो पोर मोन लागाळनो जीवन एने शांती छे,

⁷ काहाकि डील पोर मोन लागाळनो ते परमेश्वर साते दुष्मोनी कोरनो छे काहाकि नी ते परमेश्वरोन शास्त्रनियमोन होकमा छे एने नी होय सोकतलो.

⁸ एने जे शारीरिक रुपमा छे चे परमेश्वर काजे खुश नी कोर सोकतला.

⁹ बाकीन जेतार परमेश्वरोन आत्मा तुमरेमा बोसतलु छे ती तुमु डीलोन रितीन नी बाकीन आत्मिक रितीमा छे अगर काहनामा येसु मसिहन आत्मा नी होय ती चू तेरु नी होय.

¹⁰ अगर मसिह तुमरेमा छे ती डील पापोन लारे मोरलो छे; बाकीन आत्मा धोरमोन वोजेसी जीवतलु छे.

¹¹ अगर काहनासोन आत्मा जू येसु मसिह काजे मोरलामा गोथू जीवाळ्यु चू तुमरा नाश होयने वावा डीलो काजे बी आपना आत्मान लारे जू तुमरेमा बोस रोयू जीवाळसे.

आत्मान लारे येसुन वारीस

¹² इनान कोरता हे भाशो आमु डीलोन कर्जदार नी होय कि डीलोन अनसारे दाहळा निकावजे.

¹³ काहाकि अगर तुमु डीलोन अनसारे दाहळा निकावसु ती मोरसू अगर आत्मासी डीलोन कामो काजे मारसु ती जीवतला रोयसु.

¹⁴ इनान कोरता कि जोतरा माणसे परमेश्वरोन आत्मासी चाल चालतला छे चेत परमेश्वरोन पुऱ्या छे.

¹⁵ काहाकि तुमुक गुलामोन आत्मा नी कि तुमु बिही जावू, बाकीन सेवेत्र्यु मोंगोन आत्मा जोळली छे, जीनामा आपु हे अब्बा, हे बास कोयीन आयळीन कोयतेला.

¹⁶ आत्मा खुद आपनी आत्मा साते गोवायी आपतली छे कि आमु परमेश्वरोन पुऱ्या छे.

¹⁷ एने अगर पुऱ्या छे ती वारीस बी, बाकीन परमेश्वरोन वारीस एने येसु मसिह साते वारीस छे कि जेतार आमु तेरे साते दुख उठावे ती तेरे साते महिमा बी जोळे.

दुखोम गोथा महिमा तोक

¹⁸ काहाकि मे सोमजो कि इनी टेमोन दुख एने तोकलीत तिना महिमा वैभव साते जी आमरेपोर प्रगट होयने वावी छे, कायबी नी होय.

¹⁹ काहाकि जोग घोनी आसोसी परमेश्वरोन पुऱ्यान प्रगट होयनेन वाट जुव रोयो.

²⁰ काहाकि जोग आपना मोर्जीसी नी बाकीन नाश कोरणे वावा हातोमा गोथी छुटनेन आसोसी तेरो आवनेन वाट जुव रोया.

²¹ जोग खुद नाशोन बंधनमा गुलामोमा गोथो छुटकारू लीन परमेश्वरोन पुऱ्यान महिमान स्वतंत्रता हासील कोरसे.

²² काहाकि आमु काजे मालूम छे, कि आखो जोग हिमी तोक पीडामा एने कासती जाईन वेला कोर रोई;

²³ एने निस्तु योत नी बाकीन जिना जुव आत्मान पेहेले फोव छे, तुमु खुद तुमरेमा कुरकुर कोरतला छे; एने पुऱ्या होयनेन मतलब आपना डीलोन छुटकारान वाट जुव रोया.

²⁴ आखान लारे आमरो छुटकारू होयलो छे; बाकीन जिना चीजोन आस कोराय जातली छे, जेतार चो देखणेमा आवे ती ओवतेन आस का रोयी? काहाकि जिना चीजो काजे कुदू देख रोयू तेरी आस काय कोरसे?

²⁵ बाकीन जिना चीजो काजे आमु नी देखतला एने तेरी आस राखतेला ती धीर धोरीन तेरी वाट बी जुवे.

²⁶ इना रितीसी आत्मासी आमरी कोमजूरीमा मदत कोरतेलू छे; काहाकि आमु काजे नी मालूम कि प्रार्थना काहना रितीसी कोरणो जुवे, बाकीन आत्मा खुद ओसो काहीन यो जोवाबोन बारथे आमरेन कोरता विनता कोरतेलू छे;

²⁷ एने मोर्जी पारखने वावू मालूम छे कि आत्मा मोन काय छे? काहाकि चुखला माणसोन कोरता परमेश्वरोन मोर्जीन अनसारे विनता कोरो.

²⁸ आमु काजे मालूम छे कि माणसे परमेश्वर पोर मोंग कोरतेला छे, तिंदरेन कोरता आखा वातोक भेसकीन वारलो पोयदा कोरतेली छे; मतलब तीनुन कोरता जी तेरी मोर्जीन अनसारे बुलवाय गोयला छे.

²⁹ काहाकि जीनु काजे चे पेहेलेसी सोमजी गोयला छे तीनु काजे पेहेलेसी ठेराय गोयलो छे कि तेरा पुऱ्यान रुपमा छे, काहाकि चू भाशोमा पेहेलु ठेराये.

³⁰ एने जीनाक चू पेहेलेसी ठेराव्यू तीनुक बुलाव्यू बी, एने जीनुक बुलाव्यू तीनुक धोरमी बी ठेराव्यू एने जीनाक धोरमी ठेराव्यू तीनुक महिमा बी आप्यू.

परमेश्वरोन ओमोरकाईन मोंग

³¹ आखरी आपु इनी वातोन बारामा काय कोयजे? अगर परमेश्वर आमरे भूनी छे ती आमरू दुष्मोन कून होय सोकतलु?

³² जू आपना एखलु पुऱ्या काजे बी नी छुळ्यु बाकीन तिना काजे आपने आखान कोरीन आप देदु चू तेरे साते आमु काजे एने आखा काजे आखो काहीन बी आपे?

³³ परमेश्वरोन नेवाळला पोर गुणू कून लागाळे? परमेश्वर छे जू तीनुक धोरमी ठेरावने वावू छे.

³⁴ ती कून छे दोंडोन आग्या आपसे? येसु मसिह छे जू मोर गोयू, एने मोरलामा गोथू जीव उठ्यू एने परमेश्वरोन जेवळे धोळे छे एने आमरेन कोरीन मध्यस्ती बी कोर रोयू.

³⁵ कून आमु काजे येसु मसिहन मोंगसी ओलोग कोरे, काय वेला, संकट, काव, छोळ, उपासमार, उगाळलो, तोकलीते, तलवार?

³⁶ ओसो लिखलो छे तारेन कोरता आमुक दाहळीन मोरनो पोळतेलो, आमु काटायने लीजाणे वावा गाडरान तोसलो गीनाय गोयलो छे.

³⁷ बाकीन इनी आखी वातोमा आमु तेरे लारे जू आमरेपोर मोंग कोरलु छे, जयवंतसी भी बोढीन छे.

³⁸ काहाकि मे छाचलीन जानतलु छे कि नी मोरोन, नी जीवन, नी सोरग दूत, नी सुभेदार, नी चालु टेम, नी भविष्य, नी ताकत, नी उचलो,

³⁹ नी उंडलो, एने नी काहनली कोवी आमुक परमेश्वरोन मोंगसी जो आमरा प्रभू येसु मसिहमा छे, ओलोग कोर सोकसे.