रोमी 5 - बारेली पावरी

परमेश्वर सी मेल

¹ आखरी, जेतार आमु भुरसासी धोरमी ठेराया, ती आपना प्रभू येसु मसिहन लारे परमेश्वर साते मेव राखे.

² जिनान लारे भुरसान वजहसी तिना दया तोक जीनामा आमु बोनला छे, जा आमु पुग बी गोया एने परमेश्वरोन महिमान आसोपोर मोटाय कोरे.

³ निस्तु योत नी, बाकीन आमु तोकलीतमा भी मोटाय कोरु यो सोमजीन कि तोकलीतसी धीर,

⁴ एने धीरसी खोरलो निकवनो एने खोरलो निकवनेसी आस पोयदा होयतेली छे;.

⁵ एने आस सी लाज नी आवतेली काहाकि पवित्र आत्मा जू आमु काजे आपलो छे तिनान लारे परमेश्वरोन मोंग आमरा मोनोन भोर देदला छे.

⁶ काहाकि जेतार आमु कोमजुर होता ती येसु मसिह सही टेम पोर धोरमीन कोरता मोर गोयू.

⁷ काहनास धोरमीन कोरता जुदा मोऱ्या, यो ते ठीक छे बाकीन होय सोके कि काहनास वारला माणसोन कोरीन कुदू मोरनेन बी हिंमत कोरे.

⁸ बाकीन परमेश्वर आमरेपोर आपना मोंगोन भोलाई इना रितीसी प्रगट कोरतेलू कि जेतार आमु पापीत होता तेत्यार मसिह आमरेन कोरीन मोऱ्यु.

⁹ आखरी, जेतार कि आमु हिमी तेरे लुयोन वोजेसी धोरमी ठेहऱ्या ती तिनान लारे परमेश्वरोन रीसोसी काहना नी वाचे?

¹⁰ काहाकि दुष्मोन होयनेन हालोत तेरा पुऱ्यान मोरनोन लारे आमरू मेव परमेश्वर साते होयू, ती चो ओवी मेव होय जाणे पोर तेरे जीवनोन लारे आमुक छुटकारू काहा नी जोळे?

¹¹ निस्तो योत नी, बाकीन आमु आपना प्रभू येसुन मसिहन लारे आमरू मेव होयतलु छे एने परमेश्वरमा खुश होयला से.

आदोममा मोरोन एने येसुमा जीवन

¹² इनान कोरता जोसू एक माणसोन लारे दुनीयामा पाप आव्यु, एने पापोन लारे मोरोन आव्यो एने इना रितीसी मोरोन आखा माणसोमा फैल गोयी काहाकि आखात पाप कोरला छे.

¹³ जा तोक नियम शास्त्रान नि आव्यो चा तोक पाप जोगोमा ते होतो, बाकीन जा नियम शास्त्र नि होय चा पाप नि गीनायतलो.

¹⁴ ते बी आदोमोन चा गोथो लीन मुसा तोक मोत तीनु माणसो पोर राज कोऱ्यु जो जिना आदोमोन आवने वावू चिन्ह छे गुणेगार सारका पाप नि कोऱ्यु.

¹⁵ बाकीन जोसी गुणावावान हाल छे तोसोत दयान वरदानोन नि, काहाकि जेतार एक माणसोन गुणासी घोणा माणसे मोऱ्या, ती परमेश्वरोन दयासी एने तेरो यो दान एक माणसोन मतलब येसु मसिहन दयासी होयो घोणा माणसो पोर छाचलीन घोन सोवटो होयो.

¹⁶ जोसो एक माणसोन पाप कोरनेन फोव जोळ्यो तोसोत दानोन दशा नि होय काहाकि एकान वोजेसी दोंडोन आग्यान फैसलु होयू बाकीन लोकेत गुणावावान वोजेसी असलो दान आव्यो कि माणसे धोरमी गीनाय गोया.

¹⁷ आखरी जेतार एक माणसोन गुणान वोजेसी, मोत तिना एक जोनान लारे राज कोऱ्यु, ती जे माणसे दयासी एने धोरमोन रुपसी वरदान, घोनो सोवटा ली सोकतला चो एक माणसोन लारे, बाकीन येसु मसिहन लारे छाचलीन, ओमोर जीवनमा राज कोरसे.

¹⁸ इनान कोरता जोसो एक गुणू आखा माणसोन कोरता मोतोन मतलब बोने, तोसोत एक धोरमोन काम बी आखा माणसोन कोरता जीवनोन कोरता धोरमी ठेरायसे.

¹⁹ काहाकि जोसो एक माणसोन आग्या नी माननेसी घोणा सोवटा माणसे पापी गीनायसे, तोसात एक माणसोन आग्या माननेसी घोणा सोवटा माणसे धोरमी गीनायसे.

²⁰ शास्त्रनियम इचमा आव लागी कि गुणा घोन सोवटा छे बाकीन जा पाप जादा छे, चा दया तेरे गोथी बी जादा होई.

²¹ कि जोसो पाप मोत काजे फैलावतू जायीन राज कोऱ्यु, तोसोत आमरू प्रभू येसु मसिहन लारे दया बी, ओमोर जीवनोन कोरीन धोरमी ठेरावती जायीन राज कोरे.