रोमी 10 - बारेली पावरी

इस्राईल काजे वारली खोबरोन गरज

¹ हे भाशो मारा मोनोन मोर्जी एने तिंदरेन कोरता परमेश्वरोनचा मारी प्रार्थना छे कि चे छुटकारू लेये.

² काहाकि मे तिंदरी गोवायी आपो कि तीनु काजे परमेश्वरोन आवाज छे बाकीन बुद्धीवावान साते नी.

³ काहाकि चे परमेश्वरोन धारमिकतासी ओनजानला होयीन एने आपनी धारमिकता स्थापन कोरणे प्रयत्न कोरीन परमेश्वरोन धारमिकता रोयीन कोऱ्या.

⁴ काहाकि होर एक भुरसू कोरणे वावा कोरता धोरमीन वजेसी मसिहन सेवक नियमूत आखरी छे.

छुटकारू आखान कोरता छे.

⁵ काहाकि मुसा यो लिखलू छे जू माणूस तिना धारमिकतान जू शास्त्रनियममा छे; चू तीनासी जीवतु रोयसे.

⁶ बाकीन जी धारमिकता भुरसासी छे, ची यो कोय कि “तू आपना मोनोमा यो कोयतू झुनी कि सोरग पोर कून चोळसे? (मतलब मसिहक उतारीन लावनेन कोरता).”

⁷ “एने अधोलोकमा कून उतरसे?” मतलब मसिह काजे मोरलामा गोथू जीवाळीन उपोर लावणेन कोरीन.

⁸ बाकीन ची काय कोये? यो कि “वचन तारे साते छे तारा मुयोमा एने तारा मोनोमा छे” यो चोत भुरसान वचन छे यो आमु प्रचार कोरतेला.

⁹ अगर तू प्रभू येसु मसिह काजे आपना मुयोसी येसु काजे प्रभू मानीन स्वीकार कोरे एने आपना मोनोसी भुरसू कोरे कि परमेश्वर तीना काजे मोरनेमा गोथू जीव उठाळ्यु ती तुसेक छाचलीन छुटकारू जोळसे.

¹⁰ काहाकि धारमिकतान कोरता मोनोसी भुरसू कोराय जातलो छे, एने छुटकारान कोरता मुयोसी स्वीकार कोराय जातलो छे.

¹¹ काहाकि पवित्र शास्त्र यो कोये कि, “जू कुदु तिना पोर भुरसू कोरे चू लाजवाये नी.”

¹² यहुदि एने युनानीमा काहनास भेदभाव नी होय, इनान कोरता कि चू आखान प्रभू छे एने आपना आखान नाव लेणे वावा सपन्न कोरे.

¹³ काहाकि “जो कुदू प्रभून नाव लेदा तेरो छुटकारू होयसे.”

इस्राईल वारली खोबर काजे मना करनो

¹⁴ ओवतेन जीनु पोर चे भुरसू नी कोऱ्या चे तेरो नाव कोसा लेसे? एने जिनान बारामा सोमव्या नी तीना पोर भुरसू कोसा कोरसे? एने प्रचार कोरणे वावा विगुर प्रचार कोसा सोमोवसु?

¹⁵ एने अगर मुकले नीती कोसा प्रचार कोरे? जोसो लिखलो छे “तिंदरा पाय कोतरा घाटावा छे जे वारली वातोन वारली खोबर प्रचार सोमवतला छे.”

¹⁶ बाकीन आखा, तिना वारली खोबर प्रचार पोर कानटा नी लागाळ्या यशयाह कोये कि “हे प्रभू कून आमरे वारली खोबर पोर भुरसू कोरतेला छे.”

¹⁷ आखरी भुरसू सोमवनेसी मसिहन वचनोसी होयतलो छे.

¹⁸ बाकीन मे कोयो कि काय चे नी सोमव्या? सोमवे ती वारू छे; काहाकि लिखलो छे “तिंदरा आवाजे आखा धोरती पोर एने तिंदरो वचन जोगोन कुपरे तोक पुग गोयला छे.”

¹⁹ मे ओवी कोयो कि, काय इस्राईलोनीक मालूम होतो; पेहेलेत मुसा कोयतेलु “मे तीनुन लारे विजावो नी होय तुमरा मोनोमा रीस पोयदा कोरिस मे एक मूढ जातीन लारे तुमुक रीस लावाळीस.”

²⁰ एने यशयाह मोटा हिंमतसी कोये कि “जू मेसे काजे नी हेरता होता चे मेसे काजे हेरे लेदा; एने जे मेसे काजे पुसता बी नी होता तीनु पोर मे प्रगट होय गोयू.”

²¹ बाकीन इस्राईलोन बारामा मे चो यो कोया कि “मे आखू दाहळू आपने हाते एक आग्या नी मानणे वावी एने विवाद कोरणे वावी प्रजा भूनी हात फैलावतू रोयीस.”