रोमी 1 - बारेली पावरी

अभिवादन

¹ पौलुसोनचा गोथो जू येसु मसिहन दास छे, एने प्रेषित होयनेन कोरता बुलावलु छे, एने परमेश्वरोन तिना वारली खोबरोन कोरीन ओलोग कोराय गोयलु छे,

² जेरी चू पेहेलेसी आपना भविष्य कोरतान लारे पवित्र शास्त्रामा

³ आपनु पुऱ्यु आपना प्रभू येसु मसिहन वारली खोबरोन बारामा वायदू कोरलु होतु, जू डीलोन भावशी दाऊदन पिढीमा पोयदा होयू,

⁴ एने पवित्र आत्मान सहायतासी मोरलाम गोथू जीव उठनेन वजेसी ताकत साते परमेश्वरोन पुऱ्यु ठेरावलु छे. येसु मसिह आमरू प्रभु,

⁵ तिनान लारे दया एने प्रेषितोन सेवा जोळी कि तेरा नावोन वोजेसी आखा जातीन माणसे भुरसू कोरीन तेरो माने,

⁶ जीनामा गोथा तुमुक येसु मसिहन होयनेन कोरीन बुलावला छे,

⁷ तीनु आखान नावे जे रोममा परमेश्वरोन मोंगावा छे एने चुखला होयनेन कोरीन बुलावला छे; आखान बास परमेश्वर एने प्रभू येसु मसिहनचा गोथो तुमु काजे दया एने शांती जोळतली.

रोममा जाणेन मोर्जी

⁸ पेहेले मे तुमरे आखान कोरीन येसु मसिहन लारे आपना परमेश्वरोन धन्यवाद कोरो, काहाकि तुमरा भुरसान वाते आखा जोगोमा होयने बाज रोय.

⁹ परमेश्वर जेरी सेवामा आपनी आत्मा काजे तेरा पुऱ्यान वारली खोबरोन बारामा कोयतेला छे होयुत मारू गोवा छे कि मी तुमु काजे काहना रितीसी हमेशा फोम कोरतू रोयतेलू.

¹⁰ एने हमेशा मारी प्रार्थनामा विनता कोरतेलू कि काहना रितीसी तुमरेनचा आवनेन मारो आवनो परमेश्वरोन मोर्जीसी वारू होये.

¹¹ काहाकि मे तुमु काजे मेवनेन लालच कोरतेलू छे, मे तुमुक काहीन आत्मिक वरदान आपो जीनासी तुमु पाका होय जासू;.

¹² मतलब यो कि जेतार मे तुमरे इचमा रोयो ती आमु इना भुरसान लारे जो मारेमा एने तुमरेमा छे एक दिसरा काजे उस्साहित कोरे.

¹³ हे भाशो मेसेक ओसो लागे कि तुमु इनासी ओनजानला रोयू कि मे घोळी-घोळी तुमरेनचा आवनेन कोऱ्यु कि जोसो मेसे काजे दिसरा जातीमा फोव जोळ्यो तोसोत तुमरेमा भी जोळे बाकीन हिमी तोक रुक देदा.

¹⁴ मे युनानी एने दिसरा भाषान एने बुद्धिवान एने बिना बुद्धीन कर्जदार छे.

¹⁵ आखरी मे तुमु काजे बी जे रोममा रोयतला वारली खोबर सोमवाळने तीयार छे.

धोरमी भुरसासी जीवसे

¹⁶ काहाकि मे वारली खोबरोन प्रचारोन कोरनेन कोरता नी लाजवायतू, इनान कोरता कि चू होर एक जे भुरसू कोरणे वावान कोरता पेहेले ते यहुदि ओवतेन युनानीन कोरता छुटकारू वोजेसी परमेश्वरोन ताकत छे.

¹⁷ काहाकि तीनामा परमेश्वरोन धोरमी विश्वासी सी एने भुरसान कोरता प्रगट होयतेली छे; जोसो लिखलो छे “विश्वासी धोरती पोर जीवतला रोयसे.”

अधोरमी पोर परमेश्वरोन रीस

¹⁸ परमेश्वरोन रीस ते तीनु माणसोन विभक्ती कोरणे वावा एने अधोरमी पोर सोरगसी प्रगट होयतेलो छे, जे खोरला काजे अधोरमीसी दाबीन राखतला छे,

¹⁹ इनान कोरता कि परमेश्वरोन बारामा ग्यान तेरे मोनोमा प्रगट छे, काहाकि परमेश्वर तीनु पोर प्रगट कोरलु छे.

²⁰ तेरो नी देखलो गुणू मतलब तेरी ओमोरकाईन ताकत एने परमेश्वरोन, जोग काजे बोनावनेन टेमे गोथो तेरे कामोन लारे देखणेमा आवतेलो छे न्या तोक कि चे रिकामो छे.

²¹ इनान कोरता कि परमेश्वरोक उवखने पोर बी चे परमेश्वरोन लायक बोढाई एने धन्यवाद नि कोऱ्या बाकीन रिकामा विचार कोरणे बाज रोया, न्या तोक कि तिंदरो बिन ओकल्यो मोन आंदारो होय गोयो.

²² चे आपना खुदो काजे ओकोलवावू जानीन बिन ओकल्यु बोन गोया.

²³ एने अविनाशी, नी नाश होयने वावा परमेश्वरोन महिमा काजे नाश होयने वावू माणसोन एने चार पायोन जोनावर, चिल्ला एने घीसळायने वावा जंतून रुपकाजे सोमानतामा बोदल देदा.

²⁴ इना वोजेसी परमेश्वर तीनुक तिंदरा मोनोन लालचोन अनसारे भुंडला कामोन कोरता छुळ देदा कि चे आपसामा डीलोन मान नि राखे.

²⁵ काहाकि चे परमेश्वरोन खोरला काजे बोदलीन झुटो बोनाव देदा, एने जो बोनावलो छे तेरी आराधना एने सेवा कोऱ्या, एने नी ते तिना बोनावने वावान जू हमेशा सोयावा छे, आमेन.

²⁶ इनान कोरता परमेश्वर तीनु काजे भुंडला कामोमा छुळ देदु; न्या तोक कि तिंदरा बायराबी वारला व्यहवार काजे तीनासी जो स्वभावोन खिलापमा छे बोदली नाख्या.

²⁷ तोसा माणसेबी बायरा साते स्वभाविक व्यहवार चाल चलन छुळीन आपोसमा कामतूर होयीन कुहरायने बाज गोया, एने माणसे माणसोन साते भुंडला कामे कोरीन आपना भ्रोमोन ठीक फोव लेदा.

²⁸ जेतार चे परमेश्वर काजे उवखनेन नी कोऱ्या ती परमेश्वर भी तीनु काजे रिकामा मोनोपोर छुळ देदु कि चे तोसा काम कोरे.

²⁹ इनान कोरता चे आखा भातीन अधोरमोन एने रीस, खुन कोरनो, एने ओहळायने, एने छोळ एने रीससी घोणा घेरवाय गोया, एने चुगली कोरण्या,

³⁰ बोदनाम कोरणे वावा, परमेश्वर सी रीस कोरणे वावा, दिसरान आदर नि कोरणे वावा, अभिमानी मोटायकी, भुंडला-भुंडला वाते बोनावने वावा, आसी बासान आग्या नी मानने वावा.

³¹ बिन ओकल्या विश्वासघातीमा, दया नी कोरणे वावू एने निर्दय होय गोया.

³² चे ते परमेश्वरोन जी रिती जानतला छे कि ओसला ओसलान काम कोरणे वावा मोरनोन दोंडोन लायक छे ते बी नी निसतू तुमु बी ओसला काम कोरतेला बाकीन कोरणे वावासी खुश बी होयतला छे.