प्रकाशित वाक्य 9 - बारेली पावरी

पाचवो फेपाऱ्यो

¹ जेतार पाचवू सोरग दूत फेपाऱ्यो फुक्यू, ती मे सोरग गोथू कोवी पोर एक चांदणी पोळतेली देख्यू, एने तीनाक उंडा कुंडान कुची आपाय गोयी.

² चू उंडा कुंडा काजे उगाळ्यु, एने कुंडाम गोथो मोटला भट्टी सारखु धुवाळू निकव्यू, एने कुंडान धुवाळासी दाहळू वाहवू आंदारलु होय गोयू.

³ तिना धुवाळामा गोथा कोवीपर टीड्या निकव्या, एने तीनुक कोवीन विछान सारखो ताकत आपाय गोयी.

⁴ तीनु काजे कोवाय गोयो कि नी कोवीन खोळा काजे, नी कानला निव्वा काजे, नी कानला झाडो काजे नुकसान होये, निस्ता तिना माणसो काजे जिंदरा माथा पोर परमेश्वरोन छापू नि होय.

⁵ तीनु माणसो काजे मार नाखने ते नी बाकीन पाच मोहना तोक पिढा आपनेन होक आपाय गोयू, एने तिंदरी तोकलीत ओसी होती जोसो विछान चावनेसी माणसो काजे होयतेली छे.

⁶ तीनु दाहळामा माणसे मोरोन काजे हेरसे एने नि जोळे; एने मोरनेन मोर्जी कोरसे, एने मोरोन हिंदरे सी ढाससे.

⁷ तीनु टीड्यान आकार लोळायनेन कोरीन तीयार कोरला घुल्ला सारखो होतो, एने हिंदरा मुंडका पोर माणू सोनान मुकुट होता; एने तिंदरा मुये माणसो सारखा होता.

⁸ तिंदरा झोटा बायराण झोटान तोसा एने दात नाहारोन दातो सारखा होता.

⁹ चे लुहळा सारखा झीलम पेहेरला होता; एने तिंदरा पाखळान बुल ओसू होतु जोसू रोथ एने जादा घुल्लान जोसू लोळायमा दोवोळतला.

¹⁰ तिंदरा छेमटो विछान तोसा होता, एने तीनामा डंक होती, एने तीनुक पाच मोहोना तोक माणसो काजे दुख आपनेन जी ताकत जोळली होती, ची तिंदरा छेमटामा होती.

¹¹ आखिर कुंडान दूत तिंदरे पोर राजा होतु; तेरो नाव इब्रीमा अबद्दोन, एने युनानीमा अपुल्लयोन छे.

¹² पेहेली पिढा वीत गोयी, देखू, हिमी एरेन ओवतेन दुय सोंकटे एने आवने वावा छे.

साहावी फेपाऱ्यो

¹³ जेतार सहावू सोरग दूत फेपाऱ्यो फुक्यू ती सोनान वेदी जो परमेश्वरोन सामने छे तेरा सिंगडामा गोथू मे ओसू बुल सोमव्यू,

¹⁴ मानो कानला सहावा सोरग दूत सी, जेरे जुव फेपाऱ्यो होती, कोयने बाज रोयू, “तीनु चारू सरोगदुतो काजे जी मोटली नोदी फरातोन चा बांधला छे, छुळ दे.”

¹⁵ चे चारू दूते छुळाय गोया जो तिने टेमे एने दाहळे, एने मोहने, एने सालोन कोरता माणसोन एक तीहाईन मार नाखनेन कोरता तीयार कोराय गोयला होता.

¹⁶ तिंदरी फौजोन बोसने वावान गिनती वीस करोड होती; मे तिंदरी गिनती सोमव्यू.

¹⁷ मेसेक इना दर्शन मा घुल्ला एने तेर पोरला ओसा बोसला देखाया जिंदरा झीलमे आगठो एने धुको, एने गोंधकोन तोसो होतो, एने तिना घुल्लान मुंडका सिह न मुंडकान तोसा होता; एने तिंदरा मुयोसी आगठो, धुवाळू एने गोंधोक निकवतो होतो.

¹⁸ एने तीनु महामरी मतलब आगठो एने धुवाळू एने गोंधोक तोसो जो इंदरा मुयोसी निकवतो होतो, माणसोन एक तिहाई मार नाख्या.

¹⁹ काहाकि तिना घुल्लान ताकत तिंदरा मूय एने तिंदरा छेमटामा होतो; इनान कोरता कि तिंदरा छेमटा घोळसान तोसा होता, एने तिंदरा छेमटान मुंडका भी होता एने तीनुसी चे तोकलीत देता होता.

²⁰ बाकी माणसे जे तिना महामारीसी नि मोऱ्या, आपना हातोन कामोसी मोन नि फिराव्या, कि भुंडली आत्मान, एने सोनो एने चांदी एने पितोव एने दोगळान एने काठोन मूर्तीन पूजा नी कोरे यो नी देखे, नी सोमवे, नी चाल सोकतली छे.

²¹ एने जोखून, एने कुहराय एने भुंडला विचार, एने चुरी चे कोरला होता, तीनामा गोथा मोन नि फिराव्या.