प्रकाशित वाक्य 8 - बारेली पावरी

सातवी छापू-फेपाऱ्या एने सोनं धूपदान

¹ जेतार चू सातवी छापू उगाळ्यु, ती सोरगोमा आदु घोंटुतोक शांत होय रोयलो होतो.

² तेत्यार मे तीनु सात सोरग दूतो काजे देख्यू जे परमेश्वर ओगोव उभा रोयतला छे, एने तीनु काजे सात फेपाऱ्यो आपाय गोया.

³ ओवतेन एक एने सोरग दूत सोनान धुप दान लेदलु आव्यु, एने वेदीन साते आवीन उभू रोयू; एने तीनाक ज्यादा धूप आपाय गोयो कि आखा चुखला माणसोन प्रार्थना पुठी सोनान तिनी वेदी पोर, जो सिहासनोन सामने चोळावे.

⁴ तिनी धुपोन धुवाळू चुखला माणसोन प्रार्थना पुठी सोरग दूतोन हातोसी परमेश्वरोन सामने पुगाळाय गोयू.

⁵ तेत्यार सोरग दूत धूपदान लीन तिना वेदीन आगठो भोऱ्यु एने कोवी पोर नाख देदु; एने गाज्यो एने बुल एने वीजव्या एने भूकंप होयने बाज गोयू.

⁶ तेत्यार चे सात सोरग दूत तिंदरेनचा सात फेपाऱ्या होता तीनुक फुकने कोरीन तीयार होया.

पेहलो फेपाऱ्यो

⁷ पेहेलु सोरग दूत फेपाऱ्यो फुक्यू, एने लुयसी मेवायला गारा एने आगठो पोयदा होयो, एने कोवी पोर नाखाय गोयो; एने कोवोन एक तिहाई धोप गोयी, एने झाडोन एक तिहाई धोप गोयी, एने आखो निव्वू चारू बी धोप गोयू.

दुसरो फेपाऱ्यो

⁸ दुसरू सोरग दूत फेपाऱ्यो फुक्यू, ती माणू आगठा सारखो धोपतलो एक मोटलु बोयडू दारीयामा मा घालाय गोयू; एने दोरीयान एक तिहाई लुय बोन गोयो,

⁹ एने दोरीयान एक तिहाई जोनावरे मोर गोया, एने एक तिहाई जहाज नाश होय गोयो.

तिसरो फेपाऱ्यो

¹⁰ तीसरु सोरग दूत फेपाऱ्यो फुक्यू, एने एक मोटली चांदणी जी दिवा सारखी धोपती होती सोरगसी तुटी, एने नोंद्यामा एक तिहाई पोर एने पाणीन झोरा पोर आवीन पोडी.

¹¹ तिना चांदणीन नाव नागदौना छे; एने एक तीहाईन पाणी नागदौना सारखो कोळवो होय गोयो, एने जुदा सोवटा माणसे तिना पाणीन कोळवो होय जाणेसी मोर गोया.

चौथो फेपाऱ्यो

¹² चौथू सोरग दूत फेपाऱ्यो फुक्यू, एने दाहळान एक तिहाई, एने चांदोन एक तिहाई एने चांदण्यान एक तिहाई पोर सोंकोट आव्यो, न्या तोक कि हिंदरो एक तिहाई डील आंदारो होय गोयो एने दाहळान एक तिहाई मा विजावा नी रोयो, एने तोसोच रातमा बी.

¹³ जेतार मे पोछु देख्यू, ती सोरगोन इचमा एक घुवळ काजे उळतलु एने उचला बुलोसी यो कोयतलु सोमव्यू, “तीना तीन सोरग दूतोन फेपाऱ्यान बुलोन वोजेसी, जिंदरो फुकनो हिमी बाकी छे, कोवीन रोयने वावा पोर हाय, हाय, हाय.”