प्रकाशित वाक्य 7 - बारेली पावरी

एक अंतराल

¹ एरेन ओवतेन मे कोवीन चारू कानटा पोर चार सोरग दूत उभरोहला देख्यू, चे कोवीन चारू वाहवा काजे उभराखला होता, काहाकि कोवी नीती दोरीया नीती कानलात झाड काजे बी वाहावू नि चाले.

² पोछु मे एक एने सोरग दूत काजे जू जीवतला परमेश्वरोन छापा लीन पूर्व भूनी गोथू उपोर आवतेलु देख्यू; चू तीनु चार सोरग दुतोसी जीनुक कोवी एने दरियान नुकसान कोरणे कोरीन होक आपाय गोयलो होतो, मोटला बुलोसी आयळीन कोयू,

³ “जेतार तोक आमु आमरा परमेश्वरोन दासोन माथा पोर छापू नि लागाळ देजे, तेत्यार तोक कोव एने दोरीया एने झाडो काजे नुकसान घोन पुगाळता.”

इस्राईलोन 14,4000 माणसे

⁴ जिना पोर छापू लागाळाय गोया तिंदरी मे गिनती सोमव्यू, मतलब इस्राईलोन पिढीन आखा जातीमा एक लाख चोवीस हजार पोर छापू आपाय गोया.

⁵ यहुदान पिढीमा बारा होजार पोर छापा आपाय गोया; रुबेनोन पिढीमा गोथो बारा होजार पोर, गादन पिढीमा बारा होजार पोर.

⁶ आशेरोन पिढीमा बारा हजार पोर, नफतालीन पिढीमा बारा हजार पोर, मनशेहोन पिढीमा गोथो बारा होजार पोर,

⁷ शिमोननोन पिढीमा बारा होजार पोर, लेवीन पिढीमा बारा होजार पोर, इस्साकारोन पिढीमा बारा होजार पोर.

⁸ जबुलूनोन पिढीमा गोथो बारा होजार पोर, युसूफोन पिढीमा बारा होजार पोर, एने बिन्यामीनोन पीढी मा गोथो बारा होजार पोर सिक्का आपाय गोया.

दुखसी एक मोटली भिळ

⁹ येरेन ओवतेन मे नोजोर नाख्यू कि, एने देख्यू, हर एक जाती एने कुल एने माणसे एने भाषामा गोथो एक ओसी मोटली गोरदी, जीनाक कुदू गिन नी सोकतो होतो, धोव्वा छिंदरा पेहेरला एने आपना हातोमा खोजुरोन डाव्या लीन सिहासनोन ओगोव एने गाडरान ओगोव उबरोयली छे,

¹⁰ एने मोटला आवाजसी कोये, “छुटकारान कोरता आमरा परमेश्वरोन, जू सिहासन पोर बोसलु छे, एने गाडरान जय-जयकार होये.”

¹¹ एने आखा सोरग दूत तिना सिहासन एने पुढाऱ्या एने चारू जोनावरोन चारू धोळे उबरोयला छे, ओवतेन चे सिहासनोन सामने उबळा पोळ्या एने परमेश्वर काजे नोमोन कोरीन कोयु,

¹² “आमेन, आमरे परमेश्वरोन स्तुती एने गौरव एने ग्यान धन्यवाद एने मान एने ताकत एने शक्ती हमेशा-हमेशा बोनीन रोये आमेन.”

¹³ इनापोरसी जूनलामा गोथू एक मेसे काजे कोयू, “यु धोव्वा डोगला पेहेरलु कून छे? एने का गोथू आवलु छे?”

¹⁴ मे तीना काजे कोयू, “हे स्वामी, तूत जानतलु छे” चू मेसे काजे कोयू “जे चे छे, चे तिना मोटला दुखोमा गोथा निकवीन आवला छे चे आपना-आपना छिंदरा गाडरान लुयमा धुवीन धोव्वा कोरला छे.”

¹⁵ इनान वोजेसी चे परमेश्वरोन सिहासनोन ओगोव छे, एने तेरा मंदीरमा रात-दाहळू तेरी सेवा कोरतेला छे, एने जू सिहासन पोर बोसलु छे, चू हिंदरे उपोर आपनु तोंबू बांधसे.

¹⁶ ये पोछा भूकला एने तीसला नी होये एने तिंदरे पोर तोपोन, नी काहनलो तातो पोळे.

¹⁷ काहाकि गाडरु जू सिहासनोन इचमा छे तिंदरी राखवावी कोरसे, एने तीनुक जीवन रुपी पाणीन झोरोनचा लीजासे; एने परमेश्वर तिंदरा डूवासी आखा आसवा नूछ लेसे.