प्रकाशित वाक्य 21 - बारेली पावरी

नोवली धरती

¹ पोछु मे नोवलो सोरोग एने नोवली कोव काजे देख्यू, काहाकि पेहलो वादवो एने पेहली कोव जात रोयली होती, एने दोरीया बी नि रोया.

² पोछु मे चुखला गाव नोवलो यरुशलेम काजे सोरगसी परमेश्वरोनचा गोथो उतरतेलो देख्यू, चो हिनी लाडीन तोसो होतो जी आपना पाहणान कोरता सिंगार कोरली होसे.

³ पोछु मे सिहासन मा गोथू काहनास काजे उचला बुलोसी यो कोयतेलू सोमव्यू, “देख, परमेश्वरोन डेरू माणसोन इचमा छे चू हिंदरे साते डेरू कोरसे, एने चे हीना माणसे होयसे, एने परमेश्वर खुद हिंदरे साते रोयसे एने तिंदरू परमेश्वर होयसे.

⁴ चू हिंदरा डूवासी आखान आसवा नूस देसे; एने एरेन ओवतेन मोरोन नी रोये, एने नी दुख, नी विलाप, नी पिढा रोये; पेहेली वाते जात रोयी.”

⁵ जू सिहासन पोर बोसलु होतु, चू कोयू, “देख, मे आखो काय नोवलो कोर दोम” पोछु चू कोयू, “लिख ले, काहाकि यो वचन भुरसान लायक एने खोरलो छे.”

⁶ पोछु चू मेसे काजे कोयू, “जे वाते पुरा होय गोयला छे मे सूरवात एने आखरी पेहेलु एने शेवटलु छे, मे तीसला काजे जीवनोन पाणीन झोरोमा गोथू सेंतमेंत पिवाडीस.

⁷ जू जय हासील कोरलु चू इना चीजोन वारीस होयसे, एने मे तेरु परमेश्वर होयीस एने चू मारू पुऱ्यु होयसे.”

⁸ बाकीन बिहीने वावा, एने अविस्वास्या, एने भुंडला, एने खुन कोरणे वावा एने व्यभिचार कोरणे वावा, एने कुहराय कोरणे वावा, एने मूर्ती पुजा कोरणे वावा, एने आखान झुटान वाटू तीना आगठामा जोळसे जो आगठो एने गोंधोकसी धोपतो रोयतलो छे, यो दूसरो मोरोन छे.

गाडरान लाडी

⁹ ओवतेन जीनु सात सोरग दूतो जुव सात आखरी पिळा सी भोरलो सात वाटका होता, तीनामा गोथो एक मारेंचा आव्यु, एने मारे पुठी वाते कोरीन कोयू, “उरू आव, मे तुसेक लाडी मतलब गाडरान लाडी देखाळीस.”

नवलो यरुशलेम

¹⁰ तेत्यार चू मेसेक आत्मामा एक मोटला एने उचला बोयडा पोर लीगोयू, एने चुखला यरुशलेम गाव काजे सोरगोसी परमेश्वरोनचा गोथू उतरतेलु देखाळ्यू.

¹¹ परमेश्वरोन गौरव हिंदरेमा होतो, एने तेरो विजावो जादात किमती वानी दोगळू, मतलब बिलोराण तोसलु योशोबोन तोसु चुखलु होतु.

¹² तेरी सोहोरोन कोट मोटलो उचलो होतो, एने तेरा बारा फाटक एने फाटकोपोर बारा सोरग दूत होता; एने तीना फाटकोपोर इस्राईलोन बारा पिढीन नावे लिखला होता.

¹³ पूर्व भूनी गोथा तीन फाटक, उत्तर भूनी तीन फाटक, दक्षिण भूनी तीन फाटक, एने बुडेवना भूनी तीन झोपला होता.

¹⁴ गावोन शोरोनफनाहोन बारा निवे होता, एने तिना पोर गाडरान बारा प्रेषितोन बारा नाव लिखला होता.

¹⁵ जू मारे पुठी वाते कोरतू होतु तेरे जुव नगर एने तेरा फाटक एने तेरा सोहोरोन कोट काजे मापने कोरीन एक सोनान माप होतु.

¹⁶ चू गावोन वोर्गा आकार वोसलु होतु एने हेरी नांबी, चौवडाइन बोराबोर होती एने चे तिना मापोसी माप्या, ती साळे सातसौ कोसोन निकव्यो तेरी नांबी एने चौडाइ एने उचायी बराबर होती.

¹⁷ चे हेरी शोरोनफनाह काजे माणसोन मतलब सोरग दूतोन मापोसी माप्या, ती एकसोव चौरेचाळीस हात निकव्यो.

¹⁸ हेरी शोरोनफनाह योशोबोन बोनावली होती, एने गाव ओसला चुखला सोनान होतो जो चुखला आरसा सारखो होतो.

¹⁹ तिना गावोन पायु हर एक भातीन जादा मोहेंगला दोगळासी सोजली होती; पेहेलु पायु योशोबोन, दुसरी नीलमनीन, तिसरी लालडीन, चौथी मोरकोतोन,

²⁰ पाचवी गोमेदोन, छोवी मोनीक्योन, सातवो पीत मानीन, आठव पेरोजन, नोववो पोखराजोन दोसवो लहसनीएनोन, ग्यारावो धूम्रकान्त, एने बारावो याकूतोन होतो.

²¹ बारा फाटक बारा मूर्तीन होता; एक-एक फाटक एक-एक हिरान बोनलो होतो. गावोन सोळोक चुखला आरसा सारखो चुखला सोनान होती.

नोवला यरुशलेमोन महिमा

²² मे हेरो काहनलो मंदीर नि देख्यू, काहाकि आखा गोथू ताकत वावू प्रभू परमेश्वर एने गाडरो हेरो मंदीर छे.

²³ तिना गावमा सूर्यान एने चांदोन विजावान गोरोज नी होय, काहाकि परमेश्वरोन तेजोसी तिनामा विजावो होयलो छे, एने गाडरु हिंदरु दिवू छे.

²⁴ जाती-जातीन माणसे तेरा विजावामा चाले-फिरे, एने कोवीन राजा आपना-आपना तेजोन समान हिनामा लावसे.

²⁵ तेरा झोपला दाहळामा कोबी बोंद नी होये, एने रात चा नी होये.

²⁶ माणसे जाती जातीन विजावो एने वैभवन समान हेरेमा लावसे.

²⁷ बाकीन हेरेमा कुदू विटोव चीजे, नीती भुंडला काम कोरणे वावा, नीती झुटान गाळने वावू काहना रितीसी जाय नि सोके, बाकीन निस्ता चे माणसे जिंदरा नावे गाडरान जीवनोन किताबमा लिखला छे.