प्रकाशित वाक्य 10 - बारेली पावरी

सोरगो दुत एने नानली किताब

¹ पोछु मे एक ओवी ताकत वावू सोरगो दूत काजे वादवो पांघरलु सोरग गोथू उतरतेलु देख्यू, तेरा मुंडका पोर वादवान धोंदली होती. तेरो मूय सूर्या सारखो होतो एने तेरा पाये आगठान खांबा सारखो होता.

² हेरा हातोमा एक नानलो किताब होतो चू आपनु जेवळ्यु पाय दोरीया पोर एने डाखऱ्यु कोवी पोर मेक्यू,

³ एने ओसला मोटला बुलोसी आयळ्यु, जोसू सिह आयळतलु छे; एने जेतार चू आयळ्यु ती आयळनेसी सात बुले सोमवाय पोळ्या.

⁴ जेतार सात आयळनेन बुले सोमवाय गोया, ती मी लिखने पोर होतु बाकीन मी सोरगोमा गोथू यो बुल सोमव्यू, “जी वात आयळनेन तिना सात बुलोसी सोमव्यू तीनुक एखलामा राख, एने मा लिखे.”

⁵ जिना सोरग दूत काजे मे दोरीया एने कोवी पोर उभरोहलु देखलू होतु, चू आपनु जेवळ्या हात सोरग भूनी देखाळ्यू.

⁶ एने जू कायम जीवतलु छे, एने यु सोरगमा एने जो काय हेरेमा छे, एने कोवी काजे एने जो काय हेरे पोर छे, एने दोरीया काजे एने जो काय हेरेमा छे सोजाळ्या, हेरी कोसोम घालीन कोयू, “हिमी ते एने वार नि लागे.

⁷ नि ती सातवू सोरग दूत फेपाऱ्यो फुकने पोर होयने वावा बुलोन दाहळामा परमेश्वरोन एखलामा मेकलो मनोरथ तीना वारली खोबरोन अनसारे जू चू आपनु दास भविष्य कोरता काजे आप्या, पुरो होयसे.”

⁸ जिना बुल काजे मे सोरगोमा गोथू बुलतेलू सोमवलू होतु, चू पोछु मारे साते वाते कोरणे बाज गोयू, “जा, जू सोरग दूत दोरीया एने कोवी पोर उबरोय रोयू, तिंदरा हातोम वावी किताब लीले.”

⁹ मे सोरग दूतोन साते जायीन कोयू, “जी नानलो किताब मेसेक लाव” चू मेसे काजे कोयी, “ले, इनाक खायले; जी तारो पेट कोळवो ते कोरसे, बाकीन तारा मुयोसी माहाव गोथो गुवो लागसे.”

¹⁰ आखरी, मे ची नानलो किताब तिना सोरग दूतोन हातोमा गोथू लीन खाय गोयू ची मारा मुयोमा माहाव गोथो गुवो ते लाग्यो, बाकीन जेतार मे हिनाक खादु, ती मारो पेट कोळवो होय गोयो.

¹¹ तेत्यार मारेसी यो कोवाय गोयो, “तुसेक जादा माणसे, एने जाती एने भाषा एने राजान बारामा पोछि भविष्यवाणी कोरनो पोळसे.”