प्रकाशित वाक्य 1 - बारेली पावरी

परिचय

¹ येसु मसिहन प्रकाशित वाक्य, जो योहान काजे परमेश्वर इनान कोरता आप्यू कि आपना दास काजे चे वाते, जेरु तेत्यारुत होयनो जोरुरी छे, देखाळ्यू; एने चू आपना सोरग दूत काजे मुकलीन तेरे लारे आपनु दास योहान काजे कोयू,

² जू परमेश्वरोन वचन एने येसु मसिहन गोवायी, मतलब जो काय चू देखलू होतु तेरी गोवायी आप्यू.

³ सोयावा छे, जे इनी भविष्यवाणीन वचन काजे मानतला छे, एने चे जे सोमवतला छे एने इनाम लिखायली वातो काजे मानतला छे; काहाकि टेम साते छे.

सात मंडवी काजे योहानोन अभिवादन

⁴ योहान जू गोथो आसियान सात मंडव्यान नाव, तेरेनचा गोथु दया एने शांती जुळे, जू छे एने जू होतो एने जू आवने वावू छे; एने तीनु सात आत्मा जुव गोथो जो हेरा सिहासनोन ओगोव छे,

⁵ एने येसु मसिह जुव गोथो जू भुरसान योग्य गोवा एने मोरलामा गोथू जीव उठने वावामा पेहेलुत एने धोरतीन राजान हाकिम छे, तुमुक अनुग्रह एने शांती जोळती रोये. चू आमरे पुठी मोंग कोरतेलू, एने चू आपना लुयोन लारे पापोसी छुळावतलो छे,

⁶ एने आमुक एक राज एने आपनु बास परमेश्वर जुगू पुजारू बी बोनाव देदु; तेरीत महिमान एने पराक्रम कायम रोये. आमेन.

⁷ देखू, चू वादवा पुठी आवने वावू छे, एने होर एक डूवू तीनाक देखसे, नी तेत्यार जे हिनाक छेळला होता चे बी येसुक देखसे, एने धोरतीन आखा जाती हीनान वोजेसी छाती ठूकसे होव. आमेन.

⁸ प्रभू परमेश्वर जो छे जो होतो एने जो आपने वावो छे, जू आखा गोथू ताकत वावु छे, जो कोयतलु “मेत सुरवात एने आखरी छे.”

योहान काजे मसिहन दर्शन

⁹ मे योहान, जू तुमरू भाश, एने येसुन दुख, एने राज, एने धीरोमा तुमरू सहभागी छे, परमेश्वरोन वचन एने येसुन गोवायीन वोजेसी पतमुस वावान टापू होतु.

¹⁰ मे प्रभून दाहळे आत्मामा आव गोयू एने मार पोछोव फेपाऱ्यो सारखो मोटूत शब्द जो कोयतेला सोमव्यू.

¹¹ “जो काय तू देखतलु छे तीना किताबमा लिखीन सात मंडव्या काजे मुकली दे, मतलब इफिस, स्मुरना, पीरगमून, थुआतीरा, एने सर्दीस, एने फिलादिलफिया, एने लौदीकिया काजे.”

¹² ती मे तीनाक, जू मारे पुठी बुलतू होतु, देखनेन कोरीन आपनो मूय फेरन्यू; एने पोछोव फिरीन मे सोनान सात दिवटे देख्यू.

¹³ एने तीनु दिवठान इचमा माणसोन पुऱ्यु एक हेर सारखा माणसो काजे देख्यू, जो पायो तोक छिंदरा पेहऱ्यु एने छाती पोर सोनान पागडी बांधलु होतु.

¹⁴ तेरा मुंडको एने झोटा धोव्वा, तिना पालान सारखो धोव्वो होतो, एने तेरा डूवा आगठान ज्वाला सारखो होतो.

¹⁵ तेरा पाय वारला पितोवोन सारखा होता, जोसो कि चुलामा तातो कोरला सारखो, एने तेरु बुल जादा पाणीन बुलोन सारखो होतो.

¹⁶ चू तेरे जेवळ्या हातमा सात चांदण्या लेदू, एने तेरो मुयोसी दुयधारी तलवार निकवती होती, तेरो मूय ओसो तेजोमोय होतु, जोसू दाहळू ज्यादा तोपोन टेमे चोमोकतो होतो.

¹⁷ तेत्यार मे तीनाक देख्यू ती तेरा पाय पोर मोरलू ओसू पोड गोयू, तेरा मुयो पोर आपनु जेवळ्या हात मेकीन कोयू, “मा बिहे; मे पेहेलु एने आखरी एने जीवतलु छे.”

¹⁸ मे मोर गोयलु होतु, एने देख हिमी कायमोन जीवतलु छे; एने मरणे एने अधोलोक माणसोन कुच्या मारेत जुव छे.

¹⁹ इनान कोरता जी वाते तू दाखलू एने जी वाते होय रोयली छे एने जी वाते इनान बादमा होयने वावी छे, तीनु आखानुक लिख ले.

²⁰ मतलब तीना सात चांदण्यान भेद जीनाक तू मारा जेवळ्या हातोमा देखलू होतु, एने तीनु सात सोना वावान दिवठान भेद, चे सात चांदण्या सात मंडव्यान दूते छे, एने चे सात दिवठा सात मंडव्या छे.