मरकुस 7 - बारेली पावरी

रिती रीवाज एने नियम

¹ तेत्यार फरुशी एने काहना शास्त्री जे यरुशलेम गोथा आवला होता, तेरेनचा एखठा होया,

² एने चे तेरा काहना चेला काजे विटव मतलब बिना धुवला हातोसी रूटा खातला देख्या.

³ काहाकि फरुशी एने आखा यहुदि, डाय-डायान रिती रीवाजसी चालतला एने जेतार एक वारू रितीसी हात नी धुवे चा तोक नी खातला;.

⁴ एने हाटोमा गोथा आवीन, जेतार तोक उग्वे नि, तेत्यार तोक नि खातला; एने लोकेत दिसरा वाते छे जे तिंदरे जुव माननेन कोरीन पुगाळला छे, जोसा वाटका, एने कोवशा, एने तांबान ठाहरा काजे धुवनो-उजावोनो.

⁵ इनान कोरीन चे फरुशी एने शास्त्री तीनाक पुछ्या, “कि तारा चेला काहा डाय-डायान रिती रीवाज पोर नी चालतला, एने भुंडला हातोसी रूटा खातला?”

⁶ चु तीनु काजे कोयू, “यशयाह तुमरा दोगावावान बारामा घोनो वारू भविष्यवाणी कोरलु” ओसो लिखलो छे “जे माणसे हुटे कोरीन ते मारू सन्मान कोरतेला, बाकीन तिंदरा मोने मारेसी नांबे रोयतेला

⁷ एने चे वायबार मारी आराधना कोरतेला छे, काहाकि माणसोन आग्या काजे धर्म प्रचारोन कोरीन भोनावतला.”

⁸ काहाकि तुमु परमेश्वरोन आग्या काजे टाविन माणसोन रिती काजे मानतेला.

⁹ एने चू तीनु काजे कोयू, “तुमु आपनी रिती रीवाजोकाजे माननेन कोरीन परमेश्वरोन आग्या कोसा वारली रितीसी टाव देतेला.”

¹⁰ काहाकि मुसा कोयलु छे, “आपनु बास एने आपनी आयान मान कोर,” एने “जु कुदू आपनु बास एने आश काजे भुंडला कोये, चू जरूर माराय जासे.”

¹¹ बाकीन तुमु कोयतेला कि कुदू आपना बास एने आश काजे कोये, “जो काय तुसेक मारेसी लाभ पुग सोकतेलो, चो कुरबान मतलब अरपण होय यो.” परमेश्वरोन वरदान छे.

¹² ती तुमु तीना काजे तेरा बास एने तेरी आयान काय सेवा कोरणे नि देतला.

¹³ इनी रितीसी तुमु आपनी रिती रीवाजसी, जीनु काजे तुमु ठेरावला छे, परमेश्वरोन वचन टाव देतला; एने ओसला-ओसला लोकेत काम कोरतेला.

माणसो काजे भुंडली कोरणे वावी वाते

¹⁴ तेत्यार चू माणसो काजे तेरे साते बुलावीन तीनु काजे कोयू, “तुमु आखा मारो सोमवू, एने सोमजू.

¹⁵ ओसी कानली चीज नि होय जी माणसोन बारथे गोथी भोराईन तीना काजे विटावे; बाकीन जे चीजे माणसोन माहाय गोथी निकवतेली छे, चीत तीना काजे विटावतेली छे.

¹⁶ (हिमी कुदान सोमोवणेन कानटा होय ती सोमवे).”

¹⁷ तेत्यार चू गोरदीमा गोथू घोरमा गोयू, ती तेरा चेला तिना दाखलांन बारामा तीना काजे पुछ्या.

¹⁸ चू तीनु काजे कोयू, “काय तुमु बी ओसा नासोमोज छे? काय तुमु नि सोमोजतेला कि जी चीज बारथे गोथी माणसोन माहाय जातेली, ची तीनु काजे विटाव नि सोकतेली?

¹⁹ काहाकि ची तेरा मोनोमा नि, बाकीन पेटोमा जातेली एने हागनेमा निकवी जातली”? यो कोयीन येसु आखा खाणान चीजो काजे चुखलो ठराव्यू.

²⁰ एने चू कोयू, “जो माणसोमा गोथो निकोवतलो, चोत माणसो काजे विटावतेल.

²¹ काहाकि माहाय गोथो, मतलब माणसोन मोनोमा गोथो, भुंडा-भुंडा विचार, भुंडला कामे,

²² चुरी, खुन, दिसरी बायरी पुठी संसार, लोभ, दोगु, कपट, लालच, भुंडली नोजोर, चाहाळी, मोटायकी एने बिन ओकली निकवतेली छे.

²³ जे आखा भुंडला वाते माहाय गोथा निकवतेला एने माणसो काजे विटावतेला.”

एक बायरोन भुरसू

²⁴ एने चू चा गोथू उठीन सोर एने सिदोन देसोमा आव्यु; एने एक घोरमा गोयू, एने लाकतो होतो कि कुदु नि उवखे; बाकीन चू डूकाय नि सोक्यू.

²⁵ एने तेत्यारुत एक बायर तेरी नानली पुरायमा भुंडली आत्मा होती, तेरी वात सोमवीन आवी, एने तेरा पायो पोर पोळी.

²⁶ ची युनानी एने सूरफुनिकी जातीन होती एने ची तीना काजे विनता कोरी कि मारी पुरायमा गोथी भुंडली आत्मा निकाव दे.

²⁷ चू तिनी काजे कोयू, “पेहेले पुऱ्या काजे आफेरणे दे, काहाकि पुऱ्यान रूटा लीन कुत्रा ओगोव नाखने वारू नि होय.”

²⁸ ची तीना काजे जोवाब देदी, “छाचलीन छे प्रभू; ते बी कुत्रा बी ते टेबल तोवे पुऱ्यान रुटान चुरू चारू खातला.”

²⁹ चू तिनी काजे कोयू, “इनी वातोन वोजेसी जातरो; भुंडली आत्मा तारी पुरायमा गोथी निकवी गोयली छे.”

³⁰ एने ची तेरे घोर आवीन देखी कि पुराय खाटला पोर पोळ रोयी, एने भुंडली आत्मा निकवी गोयली.

बेहरा एने मुक्का काजे वारू कोरनो

³¹ एने चू सोर एने सिदोन देसोमा गोथू निकवीन दिकापुलीस देसोमा गोथू गलीलोन दरिया धोळे पुग गोयू.

³² एने माणसे एक बेहेराकाजे जू गुंगू बी होतु, तेरेनचा लावीन तीना काजे विनता कोऱ्या कि तारू हात इनापोर मेके.

³³ तेत्यार चू तिना काजे गोरदीमा गोथू एक धोळे लीगोयू, एने तेरा आंगव्या तेरा कानटामा घाल्यू, एने थुपीन तेरी जीबो काजे छिम्यू;.

³⁴ एने सोरगो भूनी देखीन ठुसका लेदू, एने तीना काजे कोयू, “इप्फाता” मतलब “उगळी जा.”

³⁵ तेरा कानटा उगळी गोया, एने तेरी जीबोन गाठ बी उगळी गोय, एने चू चुखो-चुखो बुलने बाज गोयू.

³⁶ तेत्यार चू तीनु काजे जोताळ्यु कि कुदा काजे झुन कोयतू; बाकीन जोतरो चू तीनु काजे जोताळ्यु तोतरोत चू एने फेलावने बाज गोयू.

³⁷ एने चे घोणा नोवलाय कोरीन कोयने बाज गोया, “चू यो काहीन कोऱ्यु आखो वारलो कोरलु छे; चू बेहेराकाजे सोमोवणेन एने गुंगा काजे बुलनेन ताकत आपतलु”.