मरकुस 2 - बारेली पावरी

लखवा काजे वारू कोरनो

¹ घोन दाहळामा येसु पोछु कफर्णहुम गाव आव्यु, एने सोमवायो कि चू घोरमा छे.

² ओवतेन ओतरा माणसे एखठा होया कि झोपलान साते बी जागा नि होती; एने चू तीनु काजे वचन सोमवाळतू होतु.

³ एने माणसे एक लखवा वावा काजे चार माणसे खाटला पोर हाकलीन तेरेनचा लाव्या.

⁴ बाकीन जेतार चे गोरदीन वजेसी तेरेनचा पुगी नि सोक्या, ती चे तिना छोत काजे जिनान तोवे येसु होतु, उगाळ देदा; एने जेतार चे तीनाक वेछडी देदा, ती तीना खाटला काजे जीना पोर लखवा बिमारी वावु पोळ रोयू होतु, टांग देदा.

⁵ येसु तिंदरू भुरसू देखीन तीना लखवा बिमारी वावा काजे कोयू, “हे पुऱ्या, तारा पाप माफ होय गोया.”

⁶ तेत्यार लोकेत शास्त्री जे चा बोस रोयला होता, आपना-आपना मोनोमा विचार कोरणे बाज गोया,

⁷ यु माणूस काहा ओसू कोयतलु? यु ते परमेश्वरोन बुराई कोरतेलू! परमेश्वर काजे छुळीन ओवी कून पापोन माफी कोर सोकतलु?

⁸ येसु तेत्यारुत तेरी आत्मामा जान लेदू कि शास्त्री तिंदरा मोनोमा ओसा विचार कोरणे बाज रोया, एने तीनु काजे कोयू, तुमु तुमरा मोनोमा यु विचार काहा कोर रोया?

⁹ सुदो काय छे? काय लखवा बिमारी वावा काजे यो कोयनो कि तारा पाप माफ होय गोया, कि ओसो कोयनो कि उठ आपनो खाटलो हाकलीन चाल फिर?

¹⁰ बाकीन जीनासी तुमु जान लेवु कि माणसोन पुऱ्या काजे धोरती पोर पाप माफी कोरणेन बी होक छे चू तिना लखवा बिमारी वावा काजे कोयू,

¹¹ मे तुसे काजे कोयो, उठ, आपनो खाटलो हाकलीन आपने घोर जातरो.

¹² एने चु उठ्यू एने तेत्यारुत खाटलो हाकलीन आखा सामने गोथू निकवीन जात रोयू; इनापोरसी आखा वाहराय गोया, एने परमेश्वरोन महिमा कोरीन कोयने बाज गोया, “आमु ओसो कोदि नी देख्या.”

येसुन लारे लेवीन बुलावनो

¹³ येसु ओवी निकवीन दरियान धोळे गोयू, एने आखी गोरदी तेरेनचा आवी, एने चू तीनु काजे सिकाळने बाज गोयू.

¹⁴ जातु जायीन चू हलफई पुऱ्यु लेवी काजे फावू लेनेन चौकिपोर बोसलु देख्यू, एने चू तीनाक कोयू, “मारे पोछोव आव” एने चू उठीन तेरे पोछोव चाल पोळ्यु.

¹⁵ जेतार चू तेरा घोरोमा खाणो खाणे बोस्यू, एने तेत्यार घोन सोवटा फावू लेणे वावा एने पापी, येसु साते एने तेरा चेला पुठी खाणो खाणे बोठ्या; काहाकि चे लोकेत होता, एने तेरे पोछोव आवला होता.

¹⁶ शास्त्री एने फरुशी यो देखीन कि यु ते पापी एने फावू लेनेवावा साते खाणे बाज रोयू, तेरा चेला काजे कोया, “यु ते फावू लेनेवावा एने पापी माणसो साते खातलू-पितलू.” येसु यो सोमवीन तीनु काजे कोयू, “वारलाकाजे वारू होयनेन इलाजोन गोरोज नि होय, बाकीन बिमारी वावा काजे छे, मे धोरमी काजे नि, बाकीन पापी काजे बुलावणे आव रोयू.”

¹⁷ येसु यो सोमवीन तीनु काजे कोयू, “वारलाकाजे वारू होयनेन इलाजोन गोरोज नि होय, बाकीन बिमारी वावा काजे छे मे धोरमी काजे नि, बाकीन पापी काजे बुलावणे आव रोयू.”

उपवाससी जुळायला सवाल

¹⁸ योहानोन चेला, एने फरुशी उपास कोरता होता; आखरी चे आवीन तीना काजे ओसा कोया, योहानोन चेला एने फरुशीन चेला काहा उपास राखतेला, बाकीन तारा चेला उपास नी राखतेला?

¹⁹ येसु तीनु काजे कोयू, “जेतार तोक लाडू वोरात्या पुठी रोयतलु, काय चे उपास कोर सोकतेला?” आखरी जेतार तोक लाडू तिंदरे पुठी छे, तेत्यार तोक चे उपास नी कोर सोकतेला.

²⁰ बाकीन चे दाहळा आवसे जेतार लाडू तिनामा गोथू ओलोग कोराय जासे; तिनी टेमे चे उपास कोरसे.

²¹ “कुरा कापळान थीगवो जूनला छिंदरापोर कुदु नी लागाळतलु; नीती चो थीगवो तीनाम गोथो काहीन हापकी लेसे, मतलब नोवलो, जुनला सी, एने चो पेहला गोथो सोवटो फाट जासे.”

²² नोवला आंगुरोन रोसकाजे जुनला डूचरामा कुदु नी घालतला, नीती चू आंगुरोन रस डूचराकाजे फाळ देसे, एने आंगुरोन रस एने डूचरो दुय बी नाश होय जासे; बाकीन नोवला आंगुरोन रोस नोवला डूचरा भोरतेला.

येसु सब्बाथोन परमेश्वर

²³ ओसो होयो कि येसु शब्बाथोन दाहळे खेतोमा गोथू जातू होतु, एने तेरा चेला चालता जायीन कोनसे भांगणे बाज गोया.

²⁴ तेत्यार फरुशी तीना काजे कोया, “देख; जे शब्बाथोन दाहळे चे काम काहा कोरतेला ओसो वारू नि होय?”

²⁵ चू तीनु काजे कोयू, “काय तुमु यो कोदि नी भोन्या कि जेतार दाऊद काजे जोरूरोत पोळी, एने जेतार येसु एने तेरा साथी भूकला होता, तेत्यार चे काय कोरला होता?”

²⁶ चे कोसा अबियातार महायाजकोन टेमे, परमेश्वरोन मंदीरमा जायीन भेटोन रूटा खादा, जिंदरो खाणो पुजारू काजे छुळीन एने कुदा काजे बी वारू नि होय, एने आपना साथी काजे बी आप्यू?

²⁷ तेत्यार चे तिना काजे कोया, “शब्बाथोन दाहळू माणसोन कोरता बोनावलू गोयलु छे, कि माणूस शब्बाथोन दाहळान कोरता.

²⁸ इनान कोरता माणसोन पुऱ्यु शब्बाथोन दाहळान बी प्रभू छे.”