मरकुस 15 - बारेली पावरी

पिलातुसोन येसुक सवाल

¹ एने सोंदारो होयताच मामार प्रधान पुजारा, डाह-डाहा, एने शास्त्री एने आखी मोटली सभा पोतू लागाळीन येसु काजे बांदाळ्या, एने तीना काजे लीजायीन पिलातोन हातोमा आप देदा.

² पिलात तीना काजे पुछु, “काय तू यहुदिन राजा छे?” येसु तीना काजे जोवाब आप्यू, “तू खुद कोयने बाज रोयू.”

³ प्रधान पुजारा तीना पोर लोकेत वातोन गुणा लागाळता होता.

⁴ पिलात तीना काजे एने पुछु, “काय तू काहीन जोवाब नि आपतू, देख ये तारे पोर कोतरी वातोन गुणू लागाळ रोया?”

⁵ येसु ओवी काहीन जोवाब नि आप्यू; न्या तोक कि पिलात काजे मोटी नोवलाय लागी.

येसुक मार देनेन आग्या

⁶ पिलात तेरे पेहेले काहना एक बोंदीवान काजे जू तीनुक जुवतू होतु, तिंदरे कोरीन छुळ देतू होतु.

⁷ बरब्बा नावोन एक माणूस तीनु बोंदीवानो साते बोंदी होतु, जे बंडामायलू खुनी होती.

⁸ एने गोरदी उपोर जायीन तीना काजे विनता कोरणे बाज गोया, कि जोसू तू आमरेन कोरता कोरतू आवलु छे तोसुच कोर.

⁹ पिलात तीनु काजे जोवाब आप्यू, “काय तुमरी मोर्जी छे कि मे तुमरेन कोरता यहुदिन राजा येसु काजे छुळ दोम?”

¹⁰ काहाकि चू जानतू होतु कि प्रधान पुजारा तीना काजे डाव धोरीन धोरावला होता.

¹¹ बाकीन प्रधान पुजारा माणसो काजे उबराख्या कि चू बरब्बा काजेत तिंदरेन कोरता छुळ देये.

¹² यो सोमवीन पिलात तीनु काजे ओवी पुछु, “ती जीना काजे तुमु यहुदिन राजा कोयतेला, तीना काजे मे काय कोरो?”

¹³ चे ओवी आयळ्या, “तीना काजे ख्रुस पोर चोळाव दे.”

¹⁴ पिलात तीनु काजे कोयू, “काहा, यु काय बुराई कोरलु छे?” बाकीन चे ओवी आयळ्या, “हिना काजे ख्रुस पोर चोळाव दे”

¹⁵ तेत्यार पिलात गोरदी काजे खुश कोरनेन कोरता, बरब्बा काजे तिंदरेन कोरता, छुळ देदू, एने येसु काजे चापका देवाळीन हवाले कोर देदू कि ख्रुस पोर चोळाय जाय.

येसुन अपमान

¹⁶ सिपायळा येसु काजे किल्लान माहाय वावा आंगनामा लीगोया जो प्रीटोरीयुम कोवायतेला छे, एने आखी पलटन काजे बुलाव लाव्या.

¹⁷ तेत्यार चे तीना काजे जामन्या छिंदरा पेहराव्या एने काटान मुकुट गुथीन तेरा मुंनकापोर मेक देदा,

¹⁸ एने यो कोयीन तीना काजे नमस्कार कोरणे बाज गोया, “हे यहुदियान राजा, नमस्कार”.

¹⁹ चे तेरा मुंनकापोर लाकळा देता, एने तीना पोर थूपता, एने मांडा टेकाळीन तीना काजे नमस्कार कोरता रोया.

²⁰ जेतार चे तेरी मोजाक कोर लेदा, ती तीना पोर गोथा जामन्यो छिंदरो निकावीन तेरात छिंदरा पेहेराव देदा; एने तेत्यार तीना काजे ख्रुस पोर चोळावनेन कोरता बारथे लीगोया.

येसु काजे ख्रुस पोर चोळावनो

²¹ सिकनदर एने रुफूस इंदरु बाबू शिमोन, एक कुरेनेकर माणूस, यु गाव गोथू आवने बाजरोयलू चा गोथू निकव्यू; चे तीना काजे जोब्रानसी धोऱ्या कि तेरू ख्रुस हाकलीन चाले.

²² चे येसु काजे गुलगुता नावोन जागा पोर, जिनान मतलब कोवटीन जागा छे, लाव्या.

²³ चा तीना काजे नोशा भेसेकलो अगुंरोन रोस आपने बाज गोया, बाकीन चू नि लेदू.

²⁴ तेत्यार चे तीना काजे ख्रुस पोर चोळाव्या एने तेरा डोगलापोर चिठ्या नाखीन, कि कुनी काजे काय जोळे, तीनाक वाट लेदा.

²⁵ एने एक पोहोरु दाहळू चोळ रोयू होतु, तेत्यार चे तीना काजे ख्रुस पोर चोळाव्या.

²⁶ एने तेरे पोर गुणान चिट्ठी लिखीन तीना पोर उपोर लागाळ देदा कि “यहुदियान राजा.”

²⁷ चे तेरे साते दुय डाखू, एक तेरे जेवळे एने एक तेरे डाखऱ्ये धोळे ख्रुस पोर चोळाव्या.

²⁸ तेत्यार पवित्र शास्त्रान यो वचन कि चू गुणावा साते गीनाय गोयू, पुरो होय गोयो.

²⁹ एने वाटे जान्या मुनको हालवी-हालवीन एने यो कोयीन तेरी बुराई कोरता होता, “वाह, मंदीर काजे तूळने वावू, एने तीन दाहळामा बोनावने वावू!.

³⁰ ख्रुस पोर गोथू उतरीन खुदो काजे वाचाडले.”

³¹ इनी रितीसी प्रधान पुजारू बी, शास्त्री पुठी, आपोसमा मोसकरी कोरता होता, यु दिसरा काजे वाचाड्यू, बाकीन खुदो काजे नि वाचाड सोकतू.

³² इस्राईलोन राजा, मसिह, हिमी ख्रुस पोर गोथू उतरीन आव कि आमु देखीन भुरसू कोरजे एने जे तेरे साते ख्रुस पोर चोळाव लाव होता, चे बी तेरी बुराई कोरता होता.

येसुन मोरनो

³³ दिसू होयनेन टेमे आखा देसोमा आंदारो होय गोयो, एने तिसरे पोहर तोक रोयो.

³⁴ तिसरे पोहर येसु मोटात बुलोमा आयळीन कोयू, “इलोई, इलोई, लमा सबखथनी?” एरू मतलब यो छे, “हे मारा परमेश्वर, हे मारा परमेश्वर, तू मेसे काजे काहा छुळ देदू?”

³⁵ ये साते उबरोयला होता, तिंदरे मायला कहानास यो सोमवीन कोया, “देखू, यु एलिया काजे आयळने बाज रोयू.”

³⁶ एने एक जोनू दोवळीन स्पंच काजे आंबोमा डूबाळयू, एने बोरून लाकळीन तीखलापोर मेकीन तीना काजे चूसाड्यू एने कोयू, “उबरोय जावू, देखू, एलिया इना काजे उतारनेन कोरता आवतेलु कि नी.”

³⁷ तेत्यार येसु मोटात बुलोसी आयळीन जीव छुळ देदू.

³⁸ एने मंदीरोन पोडदु उपोर गोथू नेचू तोक फाटीन दुय तुकडा होय गोयू.

³⁹ जु सुभेदार तेरे सामने उबरोय रोयू होतु, जेतार तीनाक ओसू आयळीन जीव छुळतेलू देख्यू, ती चू कोयू, छाचलीन यु माणूस, परमेश्वरोन पुऱ्यु होतु.

⁴⁰ लोकेत बायराबी नांबे रोयीन देख रोया होता तिंदरेमा मरीयम मगदलीनी, नानलु याकुब एने योसेन आया मरीया, एने सोलोमी होता.

⁴¹ जेतार चू गलीलमा होतु ती ये तेरे पोछोव जाता होता एने तेरी सेवा हमेशा कोऱ्या कोरता होता; एने दिसरा लोकेत बायराबी होता, जे तेरे साते यरुशलेममा आवला होता.

येसुक मोळवाट्यामा मेकनो

⁴² जेतार सांतो होय गोयो ती इनान कोरता कि तीयारीन दाहळू होतु, यु शब्बाथोन एक दाहळू पेहेले रोयतेलू,

⁴³ अरिमतियाह मा रोयने वावू युसूफ आव्यु, जू महासोभान मेंबर होतु एने खुद बी परमेश्वरोन राजोन वाट जुवतू होतु चू हिंमत कोरीन पिलातोन चा गोयू एने येसुन धोळ मांग्यू.

⁴⁴ पिलात काजे नोवलाय लागी कि चू ओतरू छाटू मोर गोयू; एने चू सुभेदार काजे बुलावीन पुछु, “काय इनाक मोरीन टेम होय गोयी?”

⁴⁵ जेतार चू सुभेदार जुव गोथू हालोत जान लेदू, ती धोळ युसूफ काजे आपाळ देदू.

⁴⁶ तेत्यार चू मखमोलोन एक चादरो मुले लेदू, एने धोळ उतारीन तिना चादरामा गुंडाव्यू, एने एक मोळवाट्यामा जो चाफऱ्यामा खोंदाय गोयलो होतो मेक्या, एने मोळवाट्यान झोपला पोर एक दोगळू ढोबवाव देदा.

⁴⁷ मरीयम मगदलीनी एने युसूफोन आया मरीया देखती होती कि चू का मेकायलू छे.