मरकुस 11 - बारेली पावरी

येसुन यरुशलेममा जाणो

¹ जेतार चे यरुशलेम साते जेतुनोन बोयळा पोर बेथफगे एने बैतनिय्याह गाव साते आव्या ती चू तेरा चेलामा गोथू दुय जोना काजे यो कोयीन मूकल्यु,

² “कि सामने वावा गावोमा जावू, एने चा पुगतेच एक गोदळीन पिलो, जीना पोर कोबी कुदू नि चोळ्या, बांदलो तुमु काजे जोळसे तीना काजे छुळीन लावू.”

³ तेत्यार तुमु काजे कुदू पुछे, “यो काहा कोर रोया?” ती कोयजू, “कि प्रभू काजे एरी जोरुरोत छे, एने चू मामार तीना काजे न्या मुकली देसे.”

⁴ चे दुय चेला जायीन तिना गोदळीन पिला काजे बारथे झोपला साते चौकमा बांदलो देखायो, एने छुळने बाज गोया.

⁵ तीनुमा चे चा उबरोय रोया होता, काहना-काहना कोयने बाज गोया, “यो काहा कोर रोया, गोदळीन पिला काजे काहा छुळतेला?”

⁶ जोसो येसु तीनु काजे कोयलु होतु, तोसाच चे तीनु काजे कोया; तेत्यार माणसे तीनु काजे जाणे देदा.

⁷ एने चे गोदळीन पिला काजे येसुनचा लाविन तीना पोर तिंदरा कापळा नाख्या एने चू तीना पोर बोस गोयू.

⁸ तेत्यार लोकेत जोना तिंदरा कापळा वाटी पोर आथरी देदा एने कानला खेतोमा गोथा डाव्या काटी-काटीन फेलाव देदा.

⁹ जे तेरे ओगोव-ओगोव जातला एने पोछोव-पोछोव चालीन पोछा आवता होता, आयळीन-आयळीन कोयता जाता होता कि, “होसान्ना, सोयावू छे चू जू प्रभून नावोसी आवतेलु.

¹⁰ आमरू बास दाऊदन राज जो आवने बाज रोयो; सोयावा छे सोरगोमा होसान्ना.”

¹¹ एने येसु यरुशलेममा पुगीण मंदीरमा आव्यु, एने चारू धोळे आखा चीजो काजे देखिन बारा जोना साते बैतनिय्याह गावमा गोयू, काहाकि सांतो होय गोयलो होतो.

शापित गुलोरोन झाड

¹² दिसरे दाहळे जेतार चे बैतनिय्याह गाव गोथा निकव्या ती तीना काजे भुक लागी.

¹³ एने चू नांबे गोथू गुलोरोन एक निव्वो झाड देखीन साते गोयू कि काय मालूम कि तीनामा काहीन जोळे, बाकीन पानटा काजे छुळीन काहीन नि जोळ्यो; काहाकि फोवनेन टेम नि होती.

¹⁴ इनापोरसी चू तीना काजे कोयू, “न्या गोथो कुदू तारो फोव कोबी नि खाय” एने तेरा चेला सोमवता होता.

धुंदा वावाकनुक मंदीरमा गोथा निकावनो

¹⁵ एने चे यरुशलेममा आव्या, एने येसु मंदीरमा गोयू; एने चा जी लेन-देण कोर रोया होता तीनु काजे बारथे निकावने बाज गोयू, एने सोराफोन पिला एने पेरवा वेचने वावन बागळा उथलाव देदू,

¹⁶ एने मंदीरमा गोथा कुदा काजे ठाहरा लीन आवने जाणे नि देदू.

¹⁷ एने सिकाळीन तीनु काजे कोयू, “काय यो नि लिखलो होय कि मारा घोरोमा आखा जातीन कोरता प्रार्थनान घोर कोवायसे? बाकीन तुमु इना काजे लुटारून घोर बोनाव देदला छे.”

¹⁸ यो सोमवीन प्रधान पुजारू एने शास्त्री तीना काजे नाश कोरणे कोरीन टेम हेरने बाज गोया; काहाकि चे तीना काजे बिहता होता, इनान कोरता कि आखा माणसे तेरा सिकापणसी वाहराय जातेला.

¹⁹ एने सांतो होयताच चे सोहोरोन बारथे जात रोया.

भुरसान ताकत

²⁰ एने सोंदारे वेगात जेतार चे चा गोथा जाता होता ती चे गुलोरोन झाड काजे मुवोन चा तोक सुक गोयलो देख्या.

²¹ पतरस काजे तिनी वातोन फोम आवी, एने चू तीनु काजे कोयू, “हे रब्बी, देख! यो गुलोरोन झाड जीना काजे तू श्राप आपलु होतु, सुक गोयलो छे.”

²² येसु तीना काजे जोवाब आप्यू, “परमेश्वर पोर भुरसू मेकू.”

²³ मे तुमु काजे छाचलीन कोयो कि, “जु कुदू इना बोयळा काजे कोये, ‘कि तू उखवी जा, एने दोरीयामा जायीन पोळ,’ एने आपना मोनोमा शंका नी कोरे, एने भुरसू कोर कि जो कोयतेला चो होयसे, ती तेरेन कोरता ओसो होयसे.

²⁴ इनान कोरता मे तुमु काजे कोयो कि जो काहीन तुमु प्रार्थना कोरीन मांगसू, ती भुरसू कोर लेयू कि तुमु काजे जोळ गोयो, एने तुमरेन कोरता होय जासे.

²⁵ एने जेतार तुमु उबरोयीन प्रार्थना कोरतेला ती तेत्यार तुमरा मोनोमा कुदान बारामा कायबी खिलाप होय, ती माफ कोरु इनान कोरता कि तुमरू सोरगोन बास बी तुमरा पापोन माफी कोरे.

²⁶ एने जेतार तुमु माफ नि कोरे ती तुमरु बास बी चू सोरगोमा छे, तुमरा पापे माफ नि कोरे.”

येसुन होक पोर सवाल

²⁷ येसु एने चेला पोछा यरुशलेममा आव्या, एने जेतार चू मंदीरमा फिरतू होतु ती प्रधान पुजारू एने शास्त्री एने डाह-डाहा तेरेनचा आवीन पुछने बाज गोया,

²⁸ “कि तु यो काम काहना होकोसी कोरतेलू? एने यु होक तुसेक कून आपलु छे कि तू यो काम कोर रोयू”?

²⁹ येसु तीनु काजे कोयू, “मे बी तुमु काजे एक वात पुछो; मेसेक जोवाब आपु ती मे तुमु काजे कोयीस कि यो काम काहना होकोसी कोरतेलू.

³⁰ योहानोन बाप्तिस्मा काय सोरग गोथू होतु कि माणसो जुव गोथू होतु मेसेक जोवाब आपु.”

³¹ तेत्यार चे एक दिसरा साते जोखळी पोळने बाज गोया कि हिमी आपनु कोयसू सोरगो भूनी गोथू छे, ती चू कोयसे, “ती तुमु तेरे पोर भुरसू काहा नी मेक्या?”

³² एने हिमी आपनु कोयसू, “माणसो भूनी गोथू होतु,” ती माणसोन बिक छे, काहाकि आखाक मालूम छे कि योहान छाचलीन भविष्य कोरता होतु.

³³ आखरी चे येसु काजे जोवाब आप्या, “आमु नि जानतेला” येसु तीनु काजे कोयू, “मे बी तुमु काजे नि कोयतू कि यो काम काहना होकोसी कोरतेलू”.