मत्ती 8 - बारेली पावरी

कुळावा काजे वारू कोरनो

¹ जेतार येसु बोयळा पोर गोथू उतऱ्यु, ती एक मोटीत भीळ तेरे पोछोव चाल पोळी.

² एने देख्यू, एक कुळावान बिमारी वावू साते आवीन तीनाक नमस्कार कोऱ्यु, एने कोयू, “हे प्रभू, ओगर तारी मोर्जी होय ती मेसेक चुखू कोर सोकतलु.”

³ येसु हात ओगु कोरीन तीनाक छिम्यू, एने कोयू, “मारी मोर्जी छे, तू चुखू होय जा” एने चू तेतारुत कुळावान बिमारीमा गोथू चुखू होय गोयू.

⁴ येसु तीना काजे कोयू, “देख कुदाक झुन कोयतू, बाकीन जायीन खुदोक पुजारा काजे देखाळ एने जू चोळावु मुसा ठेरावलु छे तीनाक चोळाव, काहाकि माणसोन कोरता गोवायी होये.”

सुभेदारोन भुरसू

⁵ हिमी जेतार येसु कफर्णहुम सोहोरोमा आव्यु ती एक सुभेदार तेरेनचा आवीन विनता कोऱ्यु कि,

⁶ “हे प्रभू, मारू पावोर घोरमा लखवा बिमारीमा घोनु दुखमा पोळ रोयु.”

⁷ येसु तीनु काजे कोयू, “मे आवीन तीना काजे वारू कोरिस.”

⁸ सुभेदार जोवाब आप्यू, “हे प्रभू, मे इनान लायक नि होय कि तू मारा घोरमा आवे, बाकीन निस्तु मुखसी कोय दे ती मारू पावोर वारू होय जासे.

⁹ काहाकि मे बी अधिकारीन माणूस छे, एने सिपायळा मारा ताबामा छे, जेतार मे एक काजे कोयतेला ‘जा’ ती चू जातलू; एने दिसरा काजे ‘आव’ ती चू आवतेलु; एने जेतार आपना पावोर काजे कोयतेला, ‘यो कोर,’ ती चू कोरतेलू.”

¹⁰ यो सोमवीन येसु काजे नोवलाय लागी, एने जे तेरे पोछोव आवता होता तीनु काजे, कोयू “मे तुमुक छाचलीन कोयो कि मे इस्राईलोन माणसोमा बी ओसू भुरसू नि देख्यू,

¹¹ एने मे तुमु काजे कोयो कि पूरब एने पच्छिम भूनी गोथा माणसे आवीन अब्राहाम एने इसाहाक एने याकुबोन साते सोरगोन राजमा बोठसु,

¹² बाकीन राजोन पुऱ्या बारथे आंदारलामा नाखाय जासे चा रोडनो एने दात उकावने रोयसे.”

¹³ तेत्यार येसु सुभेदार काजे कोयू, “जा तारू भुरसू छे, ओसोच तारेन कोरीन होये, एने तेरु पावोर वारू होय गोयू.”

मांदला काजे वारू कोरनो

¹⁴ एने येसु जेतार पतरसोन घोर आव्यु, ती येसु पतरसोन सासू काजे सेरी मा पोळ रोयली देख्यू,

¹⁵ चू तेरु हात छिम्यू एने तेरो सेरी उतरी गोयो, एने ची उठीन तेरी सेवा कोरणे बाज गोयी.

¹⁶ जेतार सांतो होतो तेत्यार चे तेरेनचा घोना सोवटा माणसो काजे लाव्या, जीनुमा भुंडली आत्मा होती एने येसु तीनु भुंडली आत्मा काजे तेरा वचन सी निकाव देदू; एने आखा बिमारी वावाणु काजे वारू कोऱ्यु.

¹⁷ काहाकि वचन यशयाह भविष्य कोरतान लारे कोयलो होतो पुरो होय गोयो. चू आमरी कोमजुरी काजे ली लेदू एने आमरी बीमारी काजे हाकली लेदू.

येसुन चेला बोनावनेन मूल्य

¹⁸ येसु जेतार आपने चारू धोळे एक मोटीत गोरदी देख्यू ती दोरीयान पोरले धोळे जाणेन आग्या आप्यू.

¹⁹ तेत्यार एक शास्त्री तेरेनचा आवीन तीनाक कोयू, “हे गुरु, जा का बी तू जायीस, मे तार पोछोव आवीस”.

²⁰ येसु तीनाक जवाब कोयू, “कुल्यान कोरता दोरे एने सोरगोन चिल्लान कोरता पुतरा रोयतला बाकीन माणसोन पुऱ्यान कोरता मुनको टेकनेन बी जागा नि होय.”

²¹ एक ओवी चेलू येसु काजे कोयु, “हे प्रभू, मेसेक पेहेले जाणे दे कि मारा बाबा काजे गाळ दोम.”

²² येसु तीना काजे कोयू, “तू मारे पोछोव आव, एने मोरला काजे खुद मारलो गाळने दे.”

आंजी काजे शांत कोरनो

²³ तेत्यार चू ढोंड्यामा चोळ्यु, ती तेरा चेला तेरे पोछोव गोया.

²⁴ एने देखू, दोरीयामा एक ओसी मोटी आंजी छुटी कि ढोंड्यो झेलोकमा धोकलायने बाज गोयी, एने चू सुवतू होतु.

²⁵ तेत्यार चेला तेरे साते आवीन तीनाक जागाळ्या एने कोया, “हे प्रभू आमुक वाचाड, आमु मोरने पोर छे.”

²⁶ चू तीनु काजे कोयू, “हे कोम भुरस्या, काहा बिहीतेला?” तेत्यार चू उठीन आंजी एने पाणी काजे धोमकाव्यू, एने आखो हुगरोय गोयो.

²⁷ एने चे वाहरायीन कोयने बाज गोया, “यु कोसू माणूस छे कि आंजी एने दोरीयान पाणी तेरी आग्या मानतेली?”

भुंडली आत्मासी भोरायला काजे वारू कोरनो

²⁸ जेतार येसु पोल धोळे गदरेनकोरोन देसमा पुग गोयू, ती दुय माणसे जीनामा भुंडली आत्मा होती मोळवाट्यामा गोथा निकवीन तीना काजे, भेट्या चे ओतरा सोवटा होता कि कुदु तिने वाटे जाय नि सोकता होता.

²⁹ देखू, चे आयळीन कोया, “हे परमेश्वरोन पुऱ्या, आमरो तारे साते काय काम? काय तू टेमोन पेहले आमुक दुख आपने आव रोयू?”

³⁰ तिंदरे गोथू इतरेक नांबे सुवरोन टूवू होतु चोरणे बाज रोयू होतु.

³¹ भुंडली आत्मा तीना काजे यो कोयीन विनता कोऱ्या कि, ओगर तू आमुक नीकाव रोयू ती सुवऱ्यान टूवामा मुकली दे.

³² चू तीनुक कोयू “जावू” एने चे निकवीन सुवऱ्यामा भोराय गोया एने देख्यू, आखू टूवू आळखे गोथू झपटायीन पाणीमा जायीन पोळ्यु, एने डूबीन मोऱ्या.

³³ तिंदरा गुवाव्या, दोवळी पोळ्या, एने सोहोरोमा जायीन ये वाते एने जीनामा भुंडली आत्मा होती तेरी आखी हालोत कोयीन सोमवाव्या.

³⁴ देखू, तेत्यार आखा सोहोरोन माणसे येसु काजे भेटनेन कोरता निकवीन आव्या एने तीनाक देखीन विनता कोऱ्या कि आमरा हदमा गोथू बारथे जात रोय.