योहान 9 - बारेली पावरी

आंदवा काजे देखाता कोरनो

¹ ओवते जातु जाईन एक माणसो काजे देख्यू जू पोयदासी गोथू आंदवू होतु.

² तेरा चेला तीनाक पुछ्या, “हे रब्बी, कून पाप कोरलो होतो कि यु आंदवू पोयदा होयू, यु माणूस नि ती एरा आसी-बासा?”

³ येसु जोवाब आप्यू, “नि ते यु पाप कोरलु होतु, नि एरा आसी-बासा; बाकीन यु इनान कोरता होयू कि परमेश्वरोन काम इनामा होये.

⁴ जू मेसेक मुकललू छे, आमु तेरा काम दिसू दिसुत कोरनो जोरुरी छे; ची रात आवने वावी जीनामा कुदू काम नि कोर सोकतलू.

⁵ जेतार तोक मे जोगोमा छे, तेत्यार तोक जोगोन विजावू छे.”

⁶ यो कोयीन चू धोरती पोर थुप्यू, एने तीनाक थुपो सी धुवू कालव्यू, एने चू धुवू तीना आंदवान डूवा पोर लागाळीन.

⁷ तीना काजे कोयू, “जा, सिलोहोन कुंडामा धुव ले” (शिलोहोन मतलब “मुकेललु” छे) चू जायीन धुव्यू, एने देखतू जायीन पोछु आव्यु.

⁸ तेत्यार साते वावा एने जे पेहले तीनाक भीक मांगतला देख लाव होता, कोये बाज गोया, “काय यु चू नि होय, जू बोठीन भीक मागतु होतु?”

⁹ काहनास माणसे कोया, “यु चू छे”, दिसरा कोया, “नि बाकीन तेरे सारखु छे” चु कोयु, “मी चू छे.”

¹⁰ तेत्यार चे तीना काजे पुछ्ने बाज गोया, “तारा डूवा कोसा उगळी गोया?”

¹¹ चू जोवाब आप्यू, “येसु नावोन एक माणूस धुवू कालवीन, एने मारे डूवा पोर लागाळीन मेसे काजे कोयू, सिलोहोमा जायीन धुव ले मी गोयू एने धुव्यू एने देखणे बाज गोयू.”

¹² चे तीना काजे पुछ्या, चू का छे? चू कोयू “मी नि उवखतलू.”

फरुशीन लारे आरगाईन तपासन

¹³ माणसे तीनाक यु पेहेले आंदवू होतु फरुशीनचा लीगोया.

¹⁴ जिने दाहळे येसु धुवू कालवीन तेरा डूवा उगाळलु होतु चू शब्बाथोन दाहळू होतु.

¹⁵ एने फरुशीबी तीना काजे पुछ्या कि तेरा डूवा कोसा उगळाय गोया, चू तीना काजे कोयू “चू मारा डूवा पोर धुवू कालवलु धुवू लागाळयु, ओवतेन ते धुव लेदू एने हिमी देखने बाज गोयू.”

¹⁶ इनापोरसी कहाना फरुशी कोयने बाज गोया, “यु माणूस परमेश्वर तोरोफसी नि होय, काहाकि चू शब्बाथोन दाहळू नि मानतलु” दिसरा कोया, “पापी माणूस ओसला चमत्कार कोसु देखाळसोके?” आखरी तीनुमा फुट पोड गोयी.

¹⁷ चे तीना आंदवा काजे एने कोया, चू तारा डूवा उगाळलु छे तू तेरे बारामा काय कोये? चू कोयू, “चू ते भविष्य कोरता छे.”

¹⁸ बाकीन यहुदि काजे भुरसू नि होयू, कि चू आंदवू होतु एने हिमी देख रोयू, जेतार चे तीनाक जेरा डूवा उगळी गोया होता, तेरा आसी बासाक बुलावीन.

¹⁹ तीनु काजे नि पुछ्या, “काय यु तुमरु पुऱ्यु छे, जीनाक तुमु कोयतेला कि आंदवू पोयदासी आवलु होतु? ती हिमी यु कोसू देखे?”

²⁰ तेरा आसी-बासा जोवाब आप्या, आमु ते जानता होता कि यु आमरू पुऱ्यु छे, एने आंदवू पोयदा होयलु;.

²¹ बाकीन आमु यो नी जानता कि हिमी कोसु देखे, एने नि यो जानता कि हिमी कोसू काय देखे, एने यो नि जानता कि कुन एरा डूवा उगाळ्यु यु सोमजदार छे, हीना काजे पुछ लेयू; यु आपना बारामा खुद कोय देसे.

²² जे वाते हेरा आसी बासा एरेन कोरता कोया कि चे यहुदि काजे बिहता होता, काहाकि यहुदि एक मोन होय रोया होता कि कोदि कुदू कोये कि यु मसिह छे, ती प्रार्थना घोरोमा गोथा निकाव देसे.

²³ इनान कोरता तेरा आसी-बासा कोया, यु सोमोजदार छे, हिना काजे पुछ लेयू.

²⁴ तेत्यार चे जिना माणसो काजे जू आधवू होतु, दुसरी कावार बुलाविन हिना काजे कोया, “परमेश्वरोन महिमा कोर आमु ते जानतेला छे कि होयू माणूस पापी छे.”

²⁵ चू जोवाब आप्यू, “मे नि जानतू कि यु पापी छे कि नि; मे एक वात जानतलु छे कि मे आंदवू होतु एने हिमी देखणे बाज रोयू.”

²⁶ चे तिना काजे ओवी कोया, “होयु तारे साते काय कोऱ्यु? एने काहनला रितीसी तारा डूवा उगाळ्यु?”

²⁷ चू तीनु काजे कोयू, “मे ते तुमु काजे कोयलु होतु, एने तुमु नि सोमव्या; हिमी दिसरे कावार काहा सोमवने हिंड रोया? काय तुमु बी तेरा चेला बोनने हिंड रोया?”

²⁸ तेत्यार चे तीनाक वारलो भुंडलो कोयीन बुल्या, “तू बी तेरु चेलु छे, आमु ते मुसान चेला छे.

²⁹ आमु जानतला छे कि परमेश्वर मुसा साते वाते कोरलु; बाकीन इना माणसो काजे नी जानतला कि चू का वावू छे.”

³⁰ चू तीनुक जोवाब आप्यू, “जी ते नेवलायन वाट छे कि तुमु नि जानतला कि चू का वावू छे, ते बी चू मारा डूवा उगाळ देदु.

³¹ आमु जानतला चे कि परमेश्वर पापीन नि सोमवतलु बाकीन कोदि कुदू परमेश्वरोन भोक्त छे एने तेरी मोर्जी पोर चालतलु छे, ती चु हेरी सोमवतलु छे.

³² जोगोन पेहेले गोथो यो कोबी सोमवनेमा नि आव्यो कि कुदुबी पोयदावारीसी आंदवान डूवा उगाळ देदा.

³³ कोदि यु माणूस परमेश्वर जूव गोथू नि रोयतु, ती कायबी नि कोर सोकतू.”

³⁴ चे तीनाक जोवाब आप्या, “तुते निसतू पापोमा पोयदा होयलु छे, तू आमु काजे काय सिकाळतलु छे?” एने चे तीना काजे बारथे निकाव देदा.

आत्मिक आंदवा

³⁵ येसु सोमव्यू कि चे तीनाक बारथे निकाव देदलु छे, एने जेतार तेरेसी भेट होई ती कोयू, “काय तू माणसोन पुऱ्या पोर भुरसू कोरतेलू छे?”

³⁶ चू जोवाब आप्या, “हे प्रभू, चू कून छे, कि मे तेरे पोर भुरसू कोरो?”

³⁷ येसु तीना काजे कोयू, “तू तीना काजे देखलू बी छे, एने जू तारे साते वाते कोर रोयू चू यु छे.”

³⁸ चू कोयू, “हे प्रभू मे भुरसू कोरो” एने चू तीना काजे नमस्कार कोऱ्यु.

³⁹ तेत्यार येसु कोयू, “मे इना जोगोमा नियाव कोरणे कोरीन आव रोयू, काहाकि जे नि देखतला चे देखे, एने जे देखतला चे आंदवा होय जाय.”

⁴⁰ जे फरुशी तेरे साते होता चे जे वाते सोमवीन तीना काजे कोया, “काय आमु बी आंदवा छे?”

⁴¹ येसु तीनु काजे कोयू, “कोदि तुमु आंदवा छे ती पापी नि ठेराये; बाकीन जेतार कोयतेला कि आमु देखतला छे, इनान कोरता तुमरो पाप बोनला रोयतलो छे.”