योहान 20 - बारेली पावरी

ठारली कबर

¹ हाप्तान पेहले दाहळे मरीया मगदलीनी सोंदारे वेगीत आंदारो होतो ती मोळवाट्या पोर आवी, एने दोगळा काजे मोळवाट्या चा गोथू छेटू होयलु देखी.

² तेत्यार ची दोवळी एने शिमोन पतरस एने तीना दिसरा चेलानचा जीना पोर येसु मोंग कोरतु होतु, आवीन कोयी, “चे प्रभू काजे मोळवाट्यामा गोथा निकाव लीग्या, एने मेसेक नि मालूम कि तीनाक कां मेक देदा.”

³ तेत्यार पतरस एने चू दिसरू चेलू निकवीन मोळवाट्या भूनी जाणे बाज गोया.

⁴ चे दूय साते-साते दोवळता होता, बाकीन दिसरू चेलू पतरस गोथू ओगोव दोवळीन मोळवाट्यामा पेहले पुग गोयू,

⁵ एने वाकू वोवीन कापळा पोड रोयला देख्यू, ते बी चू माहाय नि गोयू.

⁶ तेत्यार शिमोन पतरस तेरे पोछोव पुग्यु, मोळवाट्या माहिय गोयू एने कापळा पोळ रोयला देख्यू;.

⁷ एने चू फेटू यु तेरे मुंडका काजे बांदलू होतु, कापळा पुठी पोळलु नि बाकीन ओलोग एक जागे गुंडाविन मेकलु देख्या.

⁸ तेत्यार दिसरू चेलू बी जू मोळवाट्यामा पेहले पुगलू होतु, माहाय गोयू एने देखीन भुरसू कोऱ्यु.

⁹ चे ते हिमी तोक पवित्र शास्त्रान ची वात नि सोमोजता होता कि तीना काजे मोरलामा गोथू जीव उठनो पोळसे.

¹⁰ तेत्यार जे चेला तिंदरे घोर पोछा जात रोया.

मारियान माग्दलिनीक देखायनो

¹¹ बाकीन मरीया रोड्ती जायीन मोळवाट्यान चांत बारथे उभरोय रोयी, एने रोडती-रोडती मोळवाट्या भूनी वाकी वोवीन,

¹² दुय सोरग दूतो काजे धोव्वा छिंदरा पेहेरला एक काजे मुंडीशा एने दिसरा काजे पायता बोस रोयला देखी, जा येसुन धोळ मेकायलो होतो, चे तिनी काजे कोया, “हे बाय, तू काहा रोडे?” ची तीनु काजे कोयी, “चे मारा प्रभू काजे चूटली गोया एने मी नि जानती कि हिना काजे कां मेक रोया.”

¹³ एने पेहेले हिना काजे हन्ना जुव ली आया, काहाकि चू तीना सालोन महायाजक क्लायपान सेसरुस होतु.

¹⁴ यो कोयीन ची पोछि फिरी एने येसु काजे उभू रोयलु देखी, बाकीन नि उवखी कि चू येसु छे.

¹⁵ येसु तिनी काजे कोयू, “हे बाय, तू काहा रोडे? कुणी काजे हेरे?” तिना काजे मावी सोमजीन तीना काजे कोयी, “हे माहाराज, कोबी तू हिना काजे लीगोयू होसे ती मेसे काजे कोयती हीना काजे कां मेक रोयू, एने मी तीना काजे ली जाश.”

¹⁶ येसु तिनी काजे कोयू, “मरीयम” ची पोछि फिरीन तीना काजे इब्रानिमा कोयी, “रब्बूनि” मतलब “हे गुरु.”

¹⁷ येसु तिनी काजे कोयू, “मेसेक मा छिमे, काहाकि मी हिमी तोक बासोनचा उपोर नि गोयू, बाकीन मारा भाशोनचा जायीन हिनु काजे कोय दे, कि मे मारा बास एने तुमरू बास, एने मारू परमेश्वर एने तुमरू परमेश्वर तेरेनचा जाम.”

¹⁸ मरीयम मगदलीनी जायीन चेला काजे कोयी, “मी प्रभू काजे देखी, एने चू मेसे काजे जे वाते कोयू.”

चेलान बिचमा येसुन होयनो

¹⁹ तिने दाहळे यु हाप्तान पेहेले दाहळू होतु, सांतेन टेमे जेतार चा वावा झोपला पोर जां चेला होता, यहुदियान बिकोन मारे बोंद होता, ती येसु आयु तिंदरे इचमा मा उभू रोयीण तीनु काजे कोयू, “तुमु काजे शांती जोळे.”

²⁰ एने यो कोयीन चू तेरु हात एने तेरी कुख तीनु काजे देखाळ्यू तेत्यार चेला प्रभू काजे देखीन खुशी होया.

²¹ येसु पोछु हिनु काजे कोयू, “तुमुक शांती जोळे; जोसू बास मेसेक मुकेललु छे, तोसुच मे बी तुमु काजे मुकलो.”

²² यो कोयीन चू तिंदरे पोर फुक्यू एने तीनु काजे कोयू, “पवित्र आत्मा लेवू.

²³ जिंदरा पाप तुमु माफ कोरे, चे तिंदरे कोरता माफ कोराय गोयला छे; जिनान तुमु राखसू चे राखाय गोयला छे.”

देखानो एने भुरसू करनो

²⁴ बाकीन बारामा गोथू एक मतलब थोमा जू दिदुमुस कोवायतलु छे, जेतार येसु आयु ती तिंदरे पुठी नि होतु.

²⁵ हिमी दिसरा चेला तीना काजे कोयने बाज गोया “आमु प्रभू काजे देखला छे,” तेतार चू तीनु काजे कोयू, “जेतार तोक मी तेरा हातोमा खिवान डूचा नि देखलोम, एने तीना डूचामा मारी आंगवी नि घाल दोम, तेत्यार तोक मे भुरसू नि कोरो.”

²⁶ आठ दाहळान ओवतेन तेरा चेला पोछा घोरोन माहिय होता, एने थोमा तिंदरे पुठी होतु; एने झोपला बोंद होता, तेत्यार येसु आयु एने तिंदरे इचमा मा उभू रोयीण कोयू, “तुमुक शांती जोळे.”

²⁷ तेत्यार चू थोमा काजे कोयू, “तारी आंगवी न्या लावीन मारा हातो काजे देख एने तारू हात लावीन मारा कुखीमा घाल, एने कोम भुरस्या नि बाकीन विस्वासी बोन.”

²⁸ यो सोमवीन थोमा जोवाब आप्यू, “हे मारा प्रभू, हे मारा परमेश्वर.”

²⁹ येसु तीना काजे कोयू, “तू मेसेक देखलू छे, काय इनान कोरता भुरसू मेकलु छे? सोयावा छे चे जे बिना देखे भुरसू कोऱ्या.”

³⁰ येसु ओवी बी घोणा सोवटा चमत्कार चेलान सामने देखाळ्यू, जे इना किताबमा लिखाय नि गोया;.

³¹ बाकीन जे इनान कोरता लिखाय गोयला छे कि तुमु भुरसू कोरे कि येसु परमेश्वरोन पुऱ्यु मसिह छे, एने भुरसू कोरीन हेरे नावोसी जीवन लेये.