योहान 18 - बारेली पावरी

बगीचामा येसुक धोरणो

¹ येसु जे वाते कोयीन आपना चेला काजे किंद्रेन खुद्राण पोरले धोळे गोया चा एक वाडी होती तीनामा चू एने तेरा चेला गोया.

² तीनाक धोरावने वावू यहुदा भी तीना जागाक जानतू होतु, काहाकि येसु आपना चेला साते चा जाया कोरतू होतु.

³ तेत्यार यहुदा, सिपायळान एक टूवा काजे एने प्रधान पुजारू एने फरुशीनचा गोथो तिंदरा कामगार काजे लीन, दिवा काजे एने चिमण्या एने हत्यार काजे लीन चा आव्यु.

⁴ तेत्यार येसु, तिनी आखा वातो काजे जी तेरे पोर आवने वावी होती जानीन, नीकाव्यू एने तीनु काजे कोयू, “कुणीक हेरने बाज रोयू?”

⁵ चे तीनु काजे जोवाब आप्या, “येसु नासरी काजे” येसु तीनु काजे कोयू, “मे छे” तीनाक धोरणे वावू यहुदा बी तेरे साते उभू होतु.

⁶ तेरो यो कोयतात, “मे छे” चे पोछा सोरकिन धोरती पोर पोड गोया.

⁷ तेत्यार चे पोछा तीनाक पुछ्या, “तुमु कुणीक हेर रोया” चे बुल्या, “येसु नासरी काजे.”

⁸ येसु जोवाब आप्यू, “मे ते तुमु काजे कोय देदलु छे कि मे छे, कोदि मेसेक हेरे ती इनुक जाणे देवू.”

⁹ यो एरेन कोरता होयो कि चो वचन पुरो होय जाय यो चू कोयलु होतु “जीनुक तू मेसेक आपलु तीनुमा गोथू मे एकाक बि नी खुव्यू.”

¹⁰ तेत्यार शिमोन पतरस तोलवार, जी तेरे जुव होती, हापक्यू एने महायाजकोन दास पोर चालाळीन तेरो डाखऱ्यो कानटो काटनी देदू तिना दासोन नाव मलखुस होतो.

¹¹ तेत्यार येसु पतरस काजे कोयू, “आपनी तलवार जागामा मेक दे जो प्यालू बास मेसेक आपलु छे, काय मी हिनाक नी पियो”?

हन्नान सामने येसु

¹² तेत्यार सिपायळा एने तेरा सुभेदार एने यहुदिन कामदार येसु काजे धोरावीन बांध लेदा,

¹³ एने पेहेले हिना काजे हन्ना जुव ली आया, काहाकि चू तीना सालोन महायाजक कैफान सेसरुस होतु.

¹⁴ यु चू कैफा होतु, जू यहुदिया काजे सोहलानी आपलु होतु कि आमरा माणसोन कोरता एक माणसोन मोरनो वारलो छे.

पतरसोन येसुक मना कोरनो

¹⁵ शिमोन पतरस एने एक दिसरू चेलु भी येसुन पोछोव चाल पोळ्या. यु चेलु महायाजकोन उखायतू होतु, इनान कोरता चू येसुन साते महायाजकोन आंगनाम गोयू,

¹⁶ बाकीन पतरस बारथे झोपला पोर उभू रोयू तेत्यार चू दिसरू चेलू यु महायाजकोन उखायतू होतु, बारथे निकव्यू एने झोपले राखवावी कोरणे वावाक कोयीन पतरस काजे माही लीन आव्यु.

¹⁷ ची दासी जी झोपले राखवावी होती, पतरस काजे कोयी, “कोदि तू इना माणसोन चेला मायलु ते नि होय?” चू कोयू, “मे नि होय.”

¹⁸ दास एने महायाजक सेवान वोजेसी कुयला आखठो धोपाळीन उबला ताप रोया होता, एने पतरस बी तिंदरे पुठी उबलू आगठो तापतू होतु.

पुढाऱ्यान सामने येसु

¹⁹ तेत्यार महायाजक येसु काजे तेरा चेलान बारामा एने तेरा उपदेशोन बारामा पुस पास कोऱ्यु.

²⁰ येसु तीनुक जोवाब आप्यू, “मी जोगोमा खुलीन वाते कोयू; मी प्रार्थना घोरोमा एने मंदीरमा, जा आखा यहुदि एखठा होयता-होयता होता, कायम प्रचारुत कोऱ्यु एने डूकायली ओसी कायबी नि कोयू.

²¹ तू मेसे काजे काहा पुछे? सोमवने वावा काजे पूछ कि मे तीनु काजे काय कोयू देख, चे जानतला छे कि मे काय कोयू.”

²² जेतार चू जो कोयू, ती कामदार मा गोथू एक यु साते उभू होतु, येसु काजे थापुळ दिन कोयू, “काय तू महायाजक काजे इना रितीसी जोवाब आपे?”

²³ येसु तीनाक जोवाब आप्यू, “कोदि मे बुरो कोयू, ती बुरायीन गोवायी आप; बाकीन कोदि भोलो कोयू, ती मेसे काजे काहा देदू?”

²⁴ हन्ना हिना काजे बांधलूत कैफा महायाजकनचा मुकली देदु.

पतरसोन येसुक एने मना कोरनो

²⁵ शिमोन पतरस उभरोयीन आगठो तापतो होतो तेत्यार चे तीना काजे कोया, “कोदि तू बी तेरा चेला मायलु ते नि होय?” चू इनकार कोरीन कोयू, “मी नि होय.”

²⁶ महायाजकोन दासोमा गोथू एक, जो तेरा घोरल्यामा गोथू होतु जेरो कानटो पतरस काटनी नाखलु होतु, कोयू “काय मे तुसेक हेरे पुठी बोगीचा मा नि दाखलू होतु?”

²⁷ पतरस एने इनकार कोर देदु, एने तेत्यारुत कुकळू वास देदू.

येसुक पिलातोन साने लावनो

²⁸ तेत्यार चे येसु काजे कैफान चा गोथा किल्लामा लीगोया, एने सोंदारेन टेम होती, बाकीन चे आपसात वाळामा नि गोया काहाकि विटोव नि होये बाकीन वोलांडोनोन खाणो खाता आवडनो जुवे.

²⁹ तेत्यार पिलात तिंदरे साते बारथे निकवीन आयु एने कोयू, “तुमु इना माणसो पोर काहनला वातोन गुणू लागाळ रोया?”

³⁰ चे तीनाक जोवाब आप्या, “कोदि यु गुणावू नि रोयतू ती आमु हिनाक तारे हाते नि सोपता.”

³¹ पिलात तीनु काजे कोयू, “तुमु इना काजे लीजायीन आपना नियम शास्त्रान नुसार येरु नियाव कोरु” यहुदि तीना काजे कोया, “आमु काजे होक नि होय कि कुदान जीव लेजे.”

³² यो इनान कोरता होयो कि येसुन ची वाट पुरी होय जाय जी चू यो इशारू आपतू जायीन कोयलु होतु कि हेरो मोरोन कोसो होयसे.

³³ तेत्यार पिलात पोछु किल्ला माही गोयू, एने येसु काजे बुलावीन तीना काजे पुछु, “काय तू यहुदियान राजा छे?”

³⁴ येसु जोवाब आप्यू, “काय तू जी वात खुद कोयने बाज रोयू कि दिसरा मारा बारामा तुसे काजे यो कोयला छे?”

³⁵ पिलात जोवाब आप्यू, “काय मी यहुदि छे? तारीत जाती एने प्रधान पुजारू तुसेक मारा हातोमा सोपला छे, तू काय कोरलु छे?”

³⁶ येसु जोवाब आप्यू, “मारो राज इना जोगोम नि होय; अगर मारो राज इना जोगोम रोयतो, ती मारा सेवक लोळायता कि मी यहुदान हातोमा सोपाय नि जातु बाकीन मारो राज न्या वावो नि होय.”

³⁷ पिलात तीना काजे कोयू, “तू काय राजा छे?” येसु जोवाब आप्यू, “तू कोये कि मी राजा छे मे इनान कोरता पोयदा होयू एने इनान कोरता जोगोमा आव रोयू कि खोरलायीन गोवायी आपो जो कुदू खोरलायीन छे, चू मारू बुल सोमवतलु छे.”

³⁸ पिलात हीना काजे कोयू, “खोरलो काय छे?” यो कोयीन चू पोछु यहुदिया साते जात रोयू एने तीनु काजे कोयू, “मे ते हेरेमा काय गुणू नि देख्यू”.

येसु नीती बरब्बा

³⁹ बाकीन तुमरी जी रिती छे कि मे वोलांडोनोन तीहीवारोमा तुमरेन कोरीन एक माणसोक छुळ दोम आखरी “काय तुमुक लागे कि मी तुमरेन कोरता यहुदान राजा काजे छुळ दोम?”

⁴⁰ तेत्यार चे पोछा आयळीन कोया, “इनाक नि, बाकीन आमरेन कोरीन बरब्बा काजे छुळ दे” एने बरब्बा डाखू होतु.