इब्रानियो 8 - बारेली पावरी

सोरगोन पुढारी

¹ हिमी जी वाते आमु कोय देदला छे, तीनामा खास वात यी छे कि आमरू ओसलु महायाजक छे, जू सोरगोमा परम सोयावान सिहासनोन जेवळे धोळे जायीन बोठलु छे.

² चू तीना परमेश्वरोन घोर एने खोरला तंबून सेवक बोन्यू जीना काजे माणसे नी बाकीन प्रभू उबराख मेक्यू.

³ काहाकि होर एक महायाजक भेट एने बलिदान दुयू काजे बी चोळावनेन कोरता नेवळाय जातलु छे, आखरी, यो गोरोजोन छे कि चोळावनेन कोरता इना महायाजोक जुव बी काहीन रोयनो जुवे.

⁴ अगर चू धोरती पोर रोयतू ती कोदि नी पुजारू बोनतु एरेन कोरता कि शास्त्र नियममोन अनसारे भेट चोळावने वावा छे.

⁵ चे निसता सोरगोन चीजोन रुपमा एने सहवान सेवा कोरतेला; जिना रितीसी मुसा काजे जेतार चू तंबू उबराखने पोर होतु, परमेश्वर तोरोफसी चेतावनी जोळती होती कि “देखजू नमुना तुसे काजे बोयळा पोर देखाळलु होतु तिनान अनसारे आखो काहीन बोनावजी.”

⁶ बाकीन हिमी तीनु पुजारा गोथा बी बोढीन येसु मसिह काजे सेवकाईन जोळली छे, काहाकि चू तिनी वारली वायदान अगवू ठेऱ्यू एने जू ओवी बी वारली वायदान आधारोपोर बांदायली गोयली छे.

नवलू वायदु

⁷ अगर पेहेली वायदा निरदोष होती ती दिसरान कोरता टेम बि नी हेराय जातो.

⁸ बाकीन चे तीना पोर गुणू लागाळता जायीन कोयतेला, “प्रभू कोरतेलू छे, देखू चे दाहळा आव रोया जेतार मे इस्राईलोन घोरानो एने यहुदान घोरानो साते नोवली वायदान वाचा बांधिस.

⁹ यो तिनी वायदान सारखो नी होय जी मे तीनु डाह डाहा साते तिने दाहळे लेदलु होतु, जेतार तीनु काजे मिसर देसोमा गोथो निकवीन लावनेन कोरता तिंदरू हात धोरलु होतु, एने इनान कोरता कि चे मारा वचन पोर पाका नी रोया, प्रभू कोये कि मे तिंदरू विचार नी कोऱ्यु.

¹⁰ एने प्रभू कोये तीनु वायदा बाद इस्राईलोन घोराना साते मे जी वाचा बांधीस ची जी छे; मे मारी शास्त्रनियम काजे तिंदरा मोनोमा नाखीस, एने तीनु काजे तिंदरे मोनोपोर लिखीस एने मे तिंदरू परमेश्वर होयीस, एने चे मारा माणसे होयसे.

¹¹ तीनुमा गोथा कुदू आपनो देस वासी काजे जी शिक्षा नी आपे एने नी आपनो भाश काजे कोये ‘प्रभू काजे उवोख काहाकि नानला गोथा मोटला तोक आखा मेसे काजे उवखसे.’

¹² काहाकि मे तिंदरो अधोरमोन बारामा दयावंत बोनीस एने तिंदरा पापो काजे एने कोदि फोम नी कोरो.”

¹³ जेतार चू कोयू एक नोवली वायदा ते चे पेहेली वाचाकाजे जुनली ठेराव देदा; काहाकि जी जुनली एने जीर जातली छे ती तेरो नाश होयनो जोरुरी छे.