इब्रानियो 4 - बारेली पावरी

आराममा जाणो

¹ इनान कोरता जेतार कि तेरा आरामोमा जाणेन वायदू हिमी तोक बोनली छे, ती आपुक बिहीन रोयनो जुवे, कोदि ओसो नी मालूम होय कि तुमरेमा गोथू कुदू तीनासी रोय जाय.

² काहाकि आमुक तिंदरेन तोसा वारली खोबर सोमवाळ देदा, बाकीन तीना सोमवला वचनोसी तीनु काजे काहीन फायदू नी होयो, काहाकि सोमवने वावा मोनोमा भुरसासी नि बोठ्या.

³ ती हिमी आपु जे भुरसू कोरला छे आरामोमा भोराय जातला जिना रितीसी चू कोयलु होतु, “जोसो कि मे आपना रीसोमा कोसोम खादु चे मारा आराममा नी भोराये, भोले तिंदरा कामे जोगोन बोननेन टेमे पुरो होय गोयलो होतो.”

⁴ काहाकि चू सातवे दाहळान बारामा जुदो काय इना रितीसी कोयलु होतु “परमेश्वर सातवे दाहळे आपना आखा काम काजे पुरो कोरीन आराम कोऱ्यु.”

⁵ एने ओवी इने जागे एने यो कोये, “चे मारा आरामोमा भोराय नी सोके.”

⁶ ती जेतार यी वात बाकी छे कि कोतरा ओवी छे जे आराममा जाय सोके, एने जे पेहेले वारली खोबर सोमवला होता, चे आग्या नी माननेसी भोराय नी सोक्या.

⁷ इनान कोरता चू ओवी एक दाहळे मतलब “आजून दाहळे” पाको कोरलु कि जोसो कि पेहेले कोवाय गोयलो छे, चू दाऊदन लारे जुदी टेम वीत जानेपोर एने कोये, “अगर आज तुमु तेरी आवाज सोमवे ती आपना मोनो काजे कोठोर मा कोरु.”

⁸ काहाकि ओगर योहोशू तीनु काजे आराम आपलु होतु ती चू तेरो परमेश्वर तेरो ओवतेन आवने वावा काहना एने दाहळान वाते नी कोरतू.

⁹ इनान कोरता परमेश्वरोन माणसोन कोरता शब्बाथोन आराम राखलु छे.

¹⁰ काहाकि जू तेरा आरामोमा भोराय गोयलु छे, चू बी आपना कामोसी आराम कोर लेदलु छे जोसो कि परमेश्वर कोरतु होतु.

¹¹ इनान कोरता आपनु तिना आरामोन भोरायने कोरता कोशिश कोरु, कोदि ओसो नी होयो कि तीना रितीसी आग्या नी मानणेन वजेसी काहनास माणसोन नाश होय जाय.

¹² काहाकि परमेश्वरोन वचन जीवतलो, ताकत एने काहनाबी दुय धारवावा तोलवार गोथो तीखलो छे, चो जीव एने आत्मा, सांधा एने गुरदा काजे आरपार भोराईन एने मोनोन विचार एने भावना काजे पारखतलो छे.

¹³ जेरो आमु काजे हिसाब आपनु छे, तेरी नोजोरमा काहनुस जोनावर डीकायलु नी होय तेरा डूवा ओगोव आखो काहीन उगाळलो एने देखायलो छे.

आपनो मोटला पुढारी

¹⁴ जेतार कि आपनु ओसू मोटलु महायाजक छे, जू सोरगोमा गोथू होयीन गोयू, मतलब परमेश्वरोन पुऱ्यु येसु, ती आवू आपनु आपना स्वीकारला काजे मजबूत धोरीन रोयसू.

¹⁵ काहाकि आपनु ओसलु महायाजक नी होय जू आपना कोमजूरीमा आपनेपोर दया नी राख सोके, होयु आखा वातोमा आपनेन सारखू पारखाय गोयलु ते बी बिना दोषोन निकव्यू.

¹⁶ आखरी, आपनु हिंमतसी दयान सिहासनोन साते आवू कि आपनेपोर दया होये एने दया ली लेये काहाकि गोरोजोन टेमे आपनी मदत होये जाय.