Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

इफिसीयो 2 - बारेली पावरी


मोरलाम गोथा जीवन वोखे

1 चू तुमु काजे बी जीवाळ्यु, जे आपना गुणा एने पापोन कोरता मोरला होता.

2 जीनामा तुमु पेहेले इना संसारन रिती पोर एने वादवा मायला मालकोन राज मतलब तिना आत्मान अनसारे चालता होता, जे हीमी बी आग्या नि मानने वावामा काम कोरतेलू छे.

3 इनामा आमु बी आखान आखा पेहेले आपना डीलोन मोर्जीमा दाहळा जावाळता होता एने मोनोन मोर्जी पुरी कोरता होता एने दिसरा माणसो सारखो स्वभाव सी रीसोन पुऱ्या होता.

4 बाकीन परमेश्वर जू दयान मालिक छे, आपना तिना मोटला मोंगोन वजेसी जीनामा चू आमरेपोर मोंग कोऱ्यु.

5 जेतार आपनु गुणान वजेसी मोरला होता ती आपनुक मसिह साते जीवाळ्यु (मोंगसी तुमरो छुटकारू होयलो छे).

6 एने मसिह येसुमा तेरे साते जीव उठाळयु एने सोरगोन जागे तेरे साते बोसाळयु.

7 कि चू आपनी तिना दयासी जू मसिह येसुमा आमरेपोर छे आवने वावा टेमोन आपना दयान घोन सोवटो धोन देखाळे.

8 काहाकि भुरसान लारे दयासी तुमरो छुटकारू होयलो छे; एने यो तुमरे भूनी गोथा नी बाकीन परमेश्वरोन दान छे.

9 एने नी फर्मान वोजेसी ओसो नी होयो कि कुदू मोटाय कोरे.

10 काहाकि आपनु तेरा बोनावला एने मसिह येसुमा तिना वारला कामोन कोरता बोनवाय गोयला जीनु काजे परमेश्वर पेहेले गोथो आपना काजे कोरणेन कोरता तीयार कोऱ्यु.


येसु मसिहमा एक

11 इना वजेसी फोम कोरु कि तुमु जे डीलोन रितीमा दिसरा जातीन छे एने जे माणसे डीलोन हातोसी कोरला सुंतान सुंता वावा कोवायता होता चे तुमु काजे बिगर सुंता वावा कोयतेला.

12 तुमु माणसे तिनी टेमे मसिहसी ओलोग एने इस्राईलोन माणसोन पोदसी ओलोग कोरायला एने वायदान भागीदार नी होता एने बिन आसोन एने जोगोमा बिना परमेश्वरोन होता.

13 बाकीन हिमी येसु मसिहमा तुमु जे पेहेले नांबे होता मसिहन लुयोन लारे साते होय गोयला छे.

14 काहाकि चू आमरो मेव छे जू दुयू काजे एक कोर देदु एने ओलोग कोरणे वावा भीतळा काजे जी इचमा होती पाळ देदु.

15 एने आपना डीलोमा दुष्मोनी मतलब चे नियम शास्त्र जेरी आग्या नियमोपोर होती मिटाळ देदु कि दुयोसी आपनेमा एने नोवलु माणूस पोयदा कोरीन मेवाळ देदु.

16 एने ख्रुस पोर दुष्मोनी काजे नाश कोरीन तेरे लारे दुयो काजे एक डील बोनावीन परमेश्वर काजे मेवाळयु.

17 चू आवीन तुमु काजे जे नांबे होता एने तीनु काजे जे साते होता दुयू काजे हिव मेवीन वारली खोबर कोयू.

18 काहाकि तिनान लारे आमु दुयू एक आत्मामा बासोनचा पुगाळतलो.


मसिही आपना कोपरान दोगळू

19 इनान कोरता तुमु हिमी दिसरा एने भोटकने वावा नी होय बाकीन चुखला माणसोन साते आपना देसोन एने परमेश्वरोन घोरानान होय गोया.

20 एने प्रेषितोन एने भविष्य कोरतान पायो पोर जिनान कुपरान दोगळू येसु मसिह खुद छे, बोनाव गोयलो छे.

21 जीनामा बोनावलो एक सात मेवीन प्रभूमा एक चुखला मंदीर बोनतेला जातलो छे.

22 जीनामा तुमु बी आत्मान लारे परमेश्वरोन रोयनेन जागा कोसा एखठा बोनावला होता.

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

Beyond Translation
ကြှနျုပျတို့နောကျလိုကျပါ:



ကြော်ငြာတွေ