कुलुस्सि 2 - बारेली पावरी

¹ मारी मोर्जी से कि तुमु सोमजी जावू कि तुमरे भूनी तिंदरेन कोरता जे लौदीकियामा छे, एने तीनु आखान कोरता जे मारा डीलोन मूय नि देख्यू मे कोसू मेहनत कोरतेलू.

² काहाकि तिंदरे मोनोमा शांती जोळे एने चे मोंगसी आपसामा जुळायीन रोये एने चो पुरा समाजोन आखो धोन ली लेये एने परमेश्वर बासोन भेद काजे, मतलब येसु मसिह काजे उवखी लेये.

³ जीनामा बुद्धी एने ग्यानोन आखो भोंडार डूकायलो छे.

⁴ यो मे इनान कोरता कोयो कि कहानुस माणूस तुमुक भडकावनेवावी वातोसी धोकू नि आपे.

⁵ अगर मे डीलोसी तुमरे गोथू नांबे छे, ते बी आत्मासी तुमरे सात छे, एने तुमरा वारला जीवन काजे एने तुमरा भुरसान, जो मसिहमा छे, पाकु भुरसू देखीन खुश होयतलु छे.

येसुमा बोनला रोयू

⁶ आखरी जोसा तुमु येसु मसिह काजे प्रभू कोरीन मान लेदा तोसोत तीनामा चालता रोयू.

⁷ ओवते तीनामा थुळ धोरीन बोढता जावू; एने जोसो तुमुक सिकाळलो होतो तोसोत भुरसामा पाका बोनता जावू, एने जादासी जादा धन्यवाद कोरता रोयू.

⁸ हुशारीमा रोयू कि कुदु तुमु काजे तीना तत्व ग्यान एने वायबार धोकान वजेसी आपनो अपमान नि कोराय लेये, जू माणसोन रिती रीवाज एने जोगोन पेहेली शिक्षान अनसारे ते छे, बाकीन मसिहन अनसारे नि.

⁹ काहाकि तीनामा परमेश्वर आखी पुरो एने पाको कायम रोयतली छे.

¹⁰ एने तुमु तीनामा घोनो सोवटा होय गोया जे आखी प्रधानता एने होकोन शिरोमणि छे.

¹¹ जीनामा तुमरी ओसी सुंता होयली छे जो हातोसी नि होयतला, मतलब मसिहमा सुंता, जेरेसी शारीरिक डील काजे निकाव देतला छे.

¹² एने तेरे साते बाप्तिस्मामा गाळाय गोया एने तीनामा परमेश्वरोन ताकत पोर भुरसू कोरीन जू तीनाक मोरलाम गोथू जीवाळ्यू तेरे साते जीव उठ्या.

¹³ चू तुमु काजे जे आपना पापे एने आपना डीलोन बिना सुंतान दशामा मोरला होता, परमेश्वर तीनु पुठी जीवाळ्यो एने आपना आखा पापो काजे माफ कोऱ्यु,

¹⁴ एने नियमोन चू लेख जू आपना नावो पोर एने आपसे दुष्मोन होतो मिटाव देदा एने तीनाक ख्रुस पोर खिवा ठुकीन ओगोव गोथू छेटो कोर देदू.

¹⁵ एने चू प्रधान एने अधिकारी काजे उपोर गोथो उतारीन तेरो आखा सामने तमाशा बोनाव्यू एने ख्रुसन लारे तीना पोर जय-जयकारोन ओवाज सोमवायी.

¹⁶ इनान कोरता खाणे पिणे, तीहीवार एने चांद एने दितवारोन बारामा तुमरू कुदू नियाव नी कोरे.

¹⁷ काहाकि चे आवने वावी वातोन साहावू छे, बाकीन खास चीजे मसिहन छे.

¹⁸ कुदू माणूस आत्माहीनता एने सोरग दूतोन पूजा कोरावीन तुमु काजे दोवोळनेन फोवोसी छेटा नि कोरे. ओसलु माणूस देखला वातोमा लागला रोयतला छे एने आपनी डीलोन समजपोर बिना वजहसी रीसवायतला.

¹⁹ एने तीना शिरोमणि काजे धोरीन नि मेलतला जीनासी आखा डील जुळायला एने पोट्टान लारे पालन पोषण लीन एने एखठो परमेश्वर भूनी बोळतो जातला.

मसिही साते जीवन एने मरणो

²⁰ जेतार कि तुमु मसिह साते जोगो काजे पेहेलेन शिक्षा भूनी गोथा मोर गोया, ओवतेन काहा तिंदरे सारखा जे जोगोमा छे जीवन जोगतला छे? तुमु ओसली विधीन ताबामा काहा रोयतला.

²¹ कि इनाक छिमता घोना, तीनाक मा चाखु एने तिना काजे हात मा लागाळू?

²² (काहाकि ये चीजे काममा लावता-लावता नाश होय जासे) काहाकि ये माणसोन आग्या एने शिक्षान अनसारे छे.

²³ इना विधीमा आपनी मोर्जीन अनसारे बोनावली आराधना काजे रिती एने आत्म-हिनता एने डीलोन योगाभ्यासन भावोसी ग्यानोन नाव ते छे, बाकीन डीलोन लालच काजे रुकनेमा कायबी लाभ नि होए.