प्रेषित 6 - बारेली पावरी

सात सेवोक काजे नेवाळनो

¹ तीनु दाहळामा जेतार चेलान आकळू लोकेत बोढने बाज गोयू, तेत्यार युनानी भाषा बुलने वावा इब्रीन भाषा बुलने वावा पोर कुरकुर कोरणे बाज गोया, कि हर दाहळेन सेवकाईमा आमरी रोडायलान दाद नि कोरता होता.

² तेत्यार तीनु बारा चेलानुकाजे तेरे साते बुलावीन कोयु, “यो वारू नि होय कि आमु परमेश्वरोन वचन छुळीन खावाळनेन पिवाळनेण सेवाम रोयजे.”

³ इनान कोरता, हे भाशो, आपनेमा सात पुढारी माणसो काजे जे पवित्र आत्मा एने ग्यानसी भोरायला होसे नेवाळ लेसू, कि आपनु तीनु काजे इना कामोन कोरता नेम देजे.

⁴ बाकीन आपनु ते प्रार्थनामा एने वचनमा सेवा कोरता रोयसु.

⁵ जी वात आखा माणसोक वारू लागी, एने चे स्तेफन नावोन एक माणसो काजे भुरसामा एने पवित्र आत्मासी भोरायलू होतु, एने फिलीप, एने प्रुखुरुस, निकानुर, एने तीमोन, एने परमिनास, एने अन्ताकिया निकोलास काजे यु यहुदिन मोतानुसार आवलु होतु, नेवाळ लेदा.

⁶ तीनुक प्रेषितोन ओगोव उभराख्या एने चे प्रार्थना कोरीन तीनु पोर हात मेक्या.

⁷ एने परमेश्वरोन वचन फेलतो गोयो एने यरुशलेममा चेलान गिनती लोकेत बोढ गोयी; एने पुजारान मोटूत समाज इनी वातो काजे मानणेवावा बोन गोया.

स्तेफनुसोन धोरायनो

⁸ स्तेफन दया एने ताकतसी भोराईन मोटा-मोटा अदभूत काम एने चिन्ह देखाळतू होतु.

⁹ तेत्यार तिना प्रार्थना घोरमा जे लीबिर्तीनेन कोवायती होती एने कुरेनेकर एने सिकनदरिया एने किलिकिया एने आसियान माणसो मायला लोकेत माणसे उठीन स्तेफन पुठी जोखळायने बाज गोया;.

¹⁰ बाकीन तिनी ग्यान एने तीना आत्मान जीनासी चू वात कोरतू होतु लोळाय नि सोक्या.

¹¹ इनापोरसी चे लोकेत माणसो काजे उभा कोराया जे कोयने बाज गोया, आमु ते इना काजे मुसान एने परमेश्वरोन खिलापमा बुराईन वाते कोरतेलू सोमवला छे.

¹² एने माणसो काजे डाह-डाहा एने शास्त्री काजे भळकावीन चोळाव्या एने तीना काजे धोरीन महासभामा लीगोया.

¹³ एने झुटा गोवा उबराख्या, चे कोया, “यु माणूस इना चुखला जागा एने नियम शास्त्रान खिलाप बुलनो नि छुळतो.

¹⁴ काहाकि आमु इना काजे यो कोयतेला सोमवला छे कि येसु नासरी इना काजे पाळ देसे एने इनी रिती काजे बोदल देसे जो मुसा आपनु काजे सोपलू छे.”

¹⁵ तेत्यार आखा माणसे ये सभामा बोसला होता, तीना पोर नोजोर लागाळीन देख्या ती तेरो मुख सोरग दूतो सारखो देख्या.