प्रेषित 4 - बारेली पावरी

पतरस एने योहान धोरायनो

¹ जेतार पतरस एने योहान माणसो साते कोयने बाज रोया होता, ती पुजारू एने मंदीरोन सिपायळान सरदार एने सदुकी तिंदरेनचा आव्या.

² एने इनी वातोसी जुदा काम रीसवाईरोया होता कि, चे माणसो काजे प्रचार आपता होता एने येसुन उदाहरण आपीन मोरलान पोछु जीव उठनेन प्रचार कोरता होता.

³ चे तीनु काजे धोऱ्या एने ओगले दाहळे तोक जेलमा मेक्या काहाकि सांतो होय गोयो होतो.

⁴ ते बी वचन सोमवावने वावान गोथा घोणा सोवटा भुरसू कोऱ्या एने तिंदरू आकळू लगभग पाच होजार होय गोयी.

पतरस एने योहान यहुदि माणसो सामने

⁵ दिसरे दाहळे ओसो होयो कि तिंदरा अधिकारी, पुढारी एने शास्त्री यरुशलेममा एखठा होता.

⁶ महायाजक एने हन्ना, एने कैफा, एने योहान, सिकनदर एने महायाजोकोन घोरानान होता.

⁷ ओवतेन चे इचमा उबराखीन पुछने बाज गोया; “तुमु माणसे यो काम कुनीन ताकतसी मतलब कुनीन नावोसी कोरतेला छे?”

⁸ तेत्यार पतरस पवित्र आत्मासी पुरो भोरायीन तीनु काजे कोयू तेतार आखा यरुशलेममा प्रधान अधिकारी एने डाह-डाहा.

⁹ अगर एक कोमजुर माणसोन कोरली भोलाई बारामा आज आमु काजे चौकसी कोरतेला कि यु माणूस कोसू वारू कोराय गोयू.

¹⁰ ती तुमु आखा काजे एने आखान इस्राईलोन माणसो काजे मालूम होय गोयो कि नासरी येसु मसिहन नावोसी जीना काजे तुमु ख्रुस पोर चोळाव्या एने जीना काजे परमेश्वर मोरलामा गोथू जीवाळीन उठाळ्यु इना नावोसी माणसे तुमरे सामने वारला उबरोयू.

¹¹ यु चू दोगळू छे जीनाक तुमु राजनीतीसी विटोव कोर देदला बाकीन युत कुपरान दोगळू बोन्यू.

¹² काहनास दिसरान लारे छुटकारू नी होय काहाकि सोरगोन तोवे एने माणसोमा दिसरो नाव नी आपायलो छे जिनान लारे आमुक छुटकारू जोळे.

येसुन चेला काजे धमकी

¹³ जेतार चे पतरस एने योहानोन हिंमत देख्या एने यो सोमज्या कि जे आशीर्वादीत एने साधा माणसे छे ती चे नोवलाय कोऱ्या एने सोमजी गोया कि जे येसुन साते रोयला छे.

¹⁴ तेत्यार तिना माणसो काजे जू वारू होय गोयलु होतु तिंदरे साते उतेरलु देखीन तिंदरे बारामा काय नि बुलतो आवळ्यो.

¹⁵ बाकीन तीनु काजे मोटली सभामा गोथा बारथे जाणेन कोरीन कोया, एने आपसामा विचार विनिमय कोरणे बाज गोया.

¹⁶ एने कोयने बाज गोया “आपु इना माणसोन काय कोरजे? काहाकि इंदरेन लारे एक चमत्कार होयलू छे, जो यरुशलेम मायला आखा काजे मालूम छे, एने आपु इनाक पाको निशाणी.”

¹⁷ बाकीन आपु इना काजे धोमकावजे कि तुमु काहना माणसो काजे इना नाव लीन एने वात कोरता झुनी इनान कोरता कि जी वात माणसोमा पसरनु नि जुवे.

¹⁸ चे तीनुक बुलावीन आग्या आप्या कि, येसुन नाव लीन वात कोरता झुनी एने नि प्रचार कोरजू.

¹⁹ बाकीन पतरस एने योहान तीनु काजे जोवाब आप्या “तुमुत नियाव कोरु काय परमेश्वरोन नोजोर यो वारलो छे कि आमु परमेश्वरोन आग्यासी बोढीन तुमरी वात मानजे.

²⁰ काहाकि यो ते आमरेसी नि होये कि आमु जो देखला छे एने सोमवला छे, तीनाक नि कोयो.”

²¹ तेत्यार चे एने तीना काजे धोमकी आपीन छुळ देदा एने काहाकि माणसोन तीनु काजे दोंड आपनेन काय मोकू नि जोळ्यू, एरेन कोरता कि जी वात होयली तेरे वोजेह आखा माणसे परमेश्वरोन बोढाई कोरता होता.

²² जिना माणसो पोर आरगाई चिन्ह होयलु होतु, तेरी उमोर चावीस साल गोथी जादा होती.

चेलान प्रार्थना

²³ जेतार तीनु काजे चा गोथा छुळ देदा ती चे आपना खजिनदारोनचा गोया एने जो काहीन मुख्य पुजारू एने पुढारी कोयला होता चो सोमवाळ देदला.

²⁴ जेतार चे सोमव्या ती एक मोनोसी मोटोत बुलोमा परमेश्वरोन नाव लेदा, “हे प्रभू तुत सोरगोन एने धोरतीन एने दोरीयान एने आखो काहीन जो तेरेमा छे, बोनाव्यू.

²⁵ तुत पवित्र आत्मान लारे आपना सेवक आमरू बास दाऊदन मुखोसी कोयलु, दिसरा जातीन माणसे काहा बडबडकोर रोया?”

²⁶ प्रभू एने तेरा मसिही खिलापमा धोरतीन राजा उबरोय गोया एने सुभेदारोन साते एखठा होय गोया.

²⁷ काहाकि छाचलीन तारू चुखलु सेवक येसुन खिलापमा, जेरु तू अभिषेक कोऱ्यु हेरोद एने पुन्तियुस पिलातुसोन दिसरा जाती एने इस्राईल साते इना देसोमा एखठा होया.

²⁸ कि जो काय पेहेले गोथो तारा ताकत एने योजनामा ठेरावलो होतो.

²⁹ हिमी हे प्रभू तिंदरी धोमकी काजे देख; एने आपना दासो काजे यो वरदान आप कि तारो वचन बोढे, हिंमतसी सोमवाळे.

³⁰ वारू कोरनेन कोरता तू आपनु हात बोढाव कि चिन्ह चमत्कार अदभूत काम तारा चुखला सेवक येसुन नावोसी कोराय जाय.

³¹ जेतार चे प्रार्थना कोर लेदा, ती तिने जागे जां चे एखठा होता हाल गोया एने चे आखा पवित्र आत्मासी भोराय गोया एने परमेश्वरोन वचन मन लागाळीन सोमवता गोया.

विस्वास्यान संगती

³² भुरसू कोरणे वावान मंडवी एक मोन लागाळीन एक विचारोन होती न्या तोक कि घोरल्या आपनो धोन मारो नि कोवायतेला बाकीन आखो गोवानदिमा होतो.

³³ प्रेषितोन ताकतसी प्रभू येसुन जीव उठनेन बारामा गोवायी देता रोया, एने तीनु आखापोर मिवीन मोंग कोऱ्या.

³⁴ तीनु घोरल्यामा गोरीब नि होतो; काहाकि जिंदरे जुव खेत नीती घोरे होता, चे तीनु काजे वेचीन-वेचीन वेचायला चीजोन दान लावीन प्रेषितोन पायोनचा जायीन मेक देता होता.

³⁵ एने जोबी जीनाक गोरोज पोळती होती तेरे अनसारे आखा काजे प्रेषित वाट देता होता.

³⁶ युसूफ नावोन, साइप्रसोन एक लेवी होतु जेरो नाव जे प्रेषित होता बरनाबास (मतलब शांतीन पुऱ्यु) मेकला होता.

³⁷ तेरु जागू होतु जीना काजे चू वेच्यू एने दामोन रुप्या लीन प्रेषितोन पायोमा लावीन मेक देदु.