प्रेषित 3 - बारेली पावरी

लेंगळा भिकारीक वारु कोरणो

¹ पतरस एने योहान सांतली टेमे तीन वाजता प्रार्थनान टेमे मंदीरमा जाता होता.

² एने माणसे एक लेंगळा माणसोक यु जन्मोन गोथू लेंगळू होतु तीनाक लावीन तिना झोपले जीना काजे सुंदर कोयतेला लावीन बोसाळ देदा कि मंदीरमा जायन तिंदरेनचा गोथू भिक मांगसे.

³ जेतार चू देख्यू कि पतरस एने योहान मंदीरमा जातला देख्यू ती चू भिक मांगने बाज गोयू.

⁴ तेत्यार पतरस, योहान साते तेरे भूनी एक टोक लागाळीन देख्यू, “आमरे भूनी देख.”

⁵ चू काहीन जोळसे इनी आसोमा तिंदरे भूनी नोजोर लागाळीन देखणे बाज गोयू.

⁶ ती पतरस कोयू “मारे जू सोनो चांदी ती नि होय बाकीन जो मारे जुव छे चो तुसेक आपो येसु मसिह नासरीन नावोमा उठ एने चाल.”

⁷ ओवतेन चू तेरा जेवळ्या हात धोरीन तीना काजे उभू कोऱ्यु एने तेत्यारुत तेरा पायोमा एने मांडामा ताकत आव गोयी.

⁸ चू उठीन उबरोय गोयू चालने फिरने बाज गोयू, चू कुदतु जाईन परमेश्वरोन स्तुती कोरतू जायन तिंदरे साते मंदीरमा जात गोयू.

⁹ आखा माणसे तीना काजे चालतो फिरतो एने परमेश्वरोन स्तुती कोरतो देखीन.

¹⁰ तीना काजे उवखी लेदा कि यु चू छे, यु मंदीरोन सुंदर नावोन झोपले बोसीन भिक मांग्या कोरलु, एने जो काहीन तेरे साते होयो तीनाक देखीन चे वाहराय एने धन्यवाद कोऱ्या.

मंदीरमा पतरसोन प्रचार

¹¹ जेतार चू पतरस एने योहानोन हात धोरलू होतु, ती आखा माणसे घोणा जुदा नोवलाय कोरता जायन तीना देवळी पोर जू सुलेमान कोवायतू होतु, तीनानचा दोवळीन आव्या.

¹² बाकीन पतरस जे देख्यू ती चू माणसो काजे कोयू, “हे इस्राईल तुमु काहा नोवलायी कोर रोया एने आमरे भूनी काहा ओसा एक सारखा देख रोया आमु आपनी प्रार्थनान ताकतसी एने ताकतसी इना माणसोक चालनेन लायक बोनाव देदा.

¹³ अब्राहाम इसाहाक एने याकुबोन परमेश्वर आमरे डाहा डाहान परमेश्वर आपना सेवक येसुन बोढाई कोऱ्यु जीना काजे तुमु धोराव देदा एने जेतार पिलात तीनाक छुळ देनेन ठेराव कोऱ्यु ती तुमु तेरे सामने तीनाक स्वीकार नि कोऱ्या.

¹⁴ तुमु तिना चुखला एने धोरमीक स्वीकार नि कोऱ्या एने एक गुणावा कोरता विनता कोऱ्या कि तीना काजे तुमरेन कोरता छुळ देये.

¹⁵ बाकीन जीवन आपनेवावा काजे मार देदा, जीना काजे परमेश्वर मोरलामा गोथू जीवाळ्यु जे आमु गोवा छे.

¹⁶ तेरेन नावोमा मतलब तिना विस्वासोन लारे जू येसुन नावो पोर छे, इना माणसो काजे जीना काजे तुमु उवखी रोया एने देखीरोया, ताकत जोळली छे तीना विस्वासमा जी तेरे लारे छे इनान आखान सामने पुरो आरगाई आपली छे.

¹⁷ हिमी हे भाशो मेसेक मालूम छे कि तुमु यो काम अनजानला मा कोऱ्या, एने तोसोत तुमरा अधिकारी बी कोऱ्या.

¹⁸ बाकीन जिना वातो काजे परमेश्वर आखा भविष्य कोरता मुखोसी पेहेले देखाळ देदलो होतो कि तेरु मसिहान दुख उठावसे चू इना रितीसी पुरो कोऱ्यु.

¹⁹ इनान कोरता पश्चताप कोरु एने पोसा फिरू कि तुमरा पापे ढाकाय जाय जीनासी कि प्रभू परमेश्वरोन सामने सुख आरामोन दाहळा आवसे.

²⁰ एने चू येसुक मुकले जू तुमरेन कोरता मसिहा ठेराय गोयलु छे.”

²¹ एने सोरगोम तिनी टेम तोक रोयनु छे जेतार तोक कि चू आखा चीजोन पोसला सुधारनेण वाते पेहेले गोथा परमेश्वर आपना चुखला भविष्य कोरतान मुखोसी कोयलु छे,

²² जोसू मुसा कोयलु “प्रभू परमेश्वर तुमरा भाश बेटामा गोयू तुमरे कोरीन मारे सारखू भविष्य कोरता उभू कोरसे जो काहीन तुमु काजे कोयसे तीना पोर ध्यान लागाळू तेरी सोमवू.”

²³ एने ओसो होयसे कि होर एक माणूस तिना भविष्य कोरता पोर ध्यान नि लागाळे माणसोन पुरो नाश कोराय जासे.

²⁴ एने तिनी रितीसी शमुवेल एने तेरा सारखा जोतरा आवने वावा भविष्य कोरता कोरला छे आखा इना दाहळान पुकारू कोऱ्या.

²⁵ तुमुत ते भविष्य कोरता पुऱ्या एने तिना वायदान भागीदार छे जीनाक परमेश्वर तुमरे एने तुमरा अब्राहाम काजे यो कोयतू जायन तुमरा डाहला इंदरे साते बांद्लू होतु; जेतार चू अब्राहाम काजे यु कोयतू जायन पिढीन लारे जोगोन आखा आशिषित होयसे.

²⁶ परमेश्वर तुमरेन कोरता सेवक काजे जीवाळीन तीनाक पेहेले तुमरेनचा मूकल्यु कि तुमरे माईन आखाक आशिष आपे एने बुराईमा गोथा वाचाडीन आशिष आपे.