प्रेषित 25 - बारेली पावरी

फेसतूसोन सामने

¹ फेसतूस तीना प्रांतोमा पुगनेन तीन दाहळा बाद कैसरमा गोथू यरुशलेम गोयू.

² तेत्यार डाहालू पुजारू एने यहुदिन पुढारी माणसे पौलुस पोर यरुशलेम फिर्याद विनता कोऱ्या.

³ एने चो छुट मांग्या कि चू पौलुस काजे यरुशलेम मुकली देये काहाकि चे तीना काजे वाटेच मार देनेन कोरता होता.

⁴ ती फेसतूस जोवाब आप्यू “पौलुस कैसरिया बोंदीमा छे एने मे यहुदा चा साटू जाणे वावू छे.”

⁵ एने चू कोयू “तुमरेमा गोथा जे डाहला पुढारी छे चे मारे पुठी आवे एने अगर माणूस काहीन बुरो काम कोरलु होय ती चा तेरे पोर केस लागाळे.”

⁶ चू तिंदरेमा आठ दोस दाहळा रोयीण कैसरमा जात रोयू दिसरे दाहळे चू नियाव कोरनेन जागे बोसीन हुकुम आप्यू पौलुस काजे लीन आवे.

⁷ तेरेनचा चा पुगणे पोर यरुशलेममा गोथा आवला यहुदि तेरेनचा धोळे उबरोय गोया एने तीना पोर भुंडला गुणू लागाळने बाज गोया जेरो तिंदरे जुव काहनो सबूत नि होतु.

⁸ बाकीन पौलुस आपना बचावमा कोयू नि मंदीर नि यहुदिन नियम शास्त्रन एने नि केसरोन खिलापमा गुणू कोरलु छे.

⁹ बाकीन फेसतूस यहुदि काजे खुश कोरणेन कोरता पौलुस काजे जोवाब आप्यू, “काय तुसेक लागतलो कि मे इना फेसलोन नियाव यरुशलेममा कोरो?”

पौलुसोन कैसोरोन कोरता प्रार्थना करनो

¹⁰ बाकीन पौलुस कोयू, “मे केसरोन नियावोन गादी ओगोव उबरोय रोयू, मारू नीयाव न्यात होयनो जुवे, जोसो कि तुसेक बी वारू रितीसी मालूम छे मे यहुदिन काय नि गलत कोऱ्यु.

¹¹ अगर मे गुणावू छे, एने मे मार देणेन ओसो काहीन कोऱ्यु होसे, ती मे मोरणेन नाकार नि कोरतू बाकीन अगर इंदरे लारे लागाळ लाव गुणा मायलु एक बी खोरलो नि होसे ती कुदान मेसेक इंदरे हातोमा आप सोके, मे केसर जुव न्याय मांगो.”

¹² तेत्यार फेसतूस आपनी सभामा जोवाब आप्यू “तू कैसरन चा मांग कोरतेलू छे तू केसरोन सामने उबु रोयीस”.

अग्रिप्पान सामने पौलुस

¹³ थुलाक दाहळान बादमा अग्रिप्पा राजा एने बिरनीके कैसर आवीन फेसतूसोन नमस्कार भेट्या,

¹⁴ चू जादा दाहळा चा रोयनेन ओवतेन फेसतूस पौलुसोन बारामा राजा काजे कोयू “एक माणूस छे, जीनाक फेलिकस बोंदी छुळीन जात रोयू.”

¹⁵ मी यरुशलेम गोयलु होतु तीना पोर यहुदान पुढारी पुजारू फिर्याद कोरीन तीना पोर गुणू लागाळीन तेरो नियाव कोरणेन विनता कोरला होता एने तीनाक दोंड जोळे.

¹⁶ तेत्यार मे तीनाक जोवाब आप्यू रोमीन जी रिती नि होय कि दुसी काजे जेतार तोक गुणू लागाळने वावान सामने उबरोयीन बचावमा जोवाब आपनेन कोरता टेम नि जोळे ती तीना काजे शिक्षा देणे कोरता ठोराव कोरे.

¹⁷ आखरी; जेतार चे न्या एखठा होया ती टेम नि लागाळीन दिसरे दाहळे नियाव कोरनेन जागा पोर बोसीन तिना माणसो काजे आग्या आप्यू,

¹⁸ जेतार गुणू लागाळने वावा उबरोया ती चे तिना पोर काहीन ओसलो गुणू नि लागाळया कि मारामोनोमा होतो.

¹⁹ बाकीन तिंदरू विचार तिंदरे साते निस्तु घोरोन बारामा काहनास येसु नावोन एक माणसोन बारामा होतु जू मोर गोयलु होतु न्यायी पौलुस तेरो जीव उठनेन वात कोरतू.

²⁰ मारी सोमोजमा नि आव्यो कि इना वातोन विचार पुस कोसो कोरनो एने मे तीना काजे पुछु कि काय तू यरुशलेम जाणे तीयार छे कि तारू इना वातोन नियाव चा कोरसे?

²¹ बाकीन जेतार पौलुस एने विनता कोऱ्यु कि माहाराज अधिकारी ओगोवूत मारा नियाव कोरे एने जेतार तोक मे बंदीमा छे कि मे आग्या आप्यू कि जेतार तोक मे इना काजे केसर नि मुकली दोम चू न्यात बोंदीमा रोयसे.

²² तेत्यार अग्रिप्पा फेसतूस काजे कोयू “मे खुद तीना माणसोन सोमवने होय रोयू.”

²³ आखरी दिसरे दाहळे अग्रिप्पा एने बिरनीके घोणा धूम धाममा आव्या एने सेनापती एने राज्यान मानायला माणसे साते सभा भोवनमा पुग्या तेत्यार फेसतूस आग्या आप्यू कि पौलुस काजे लीन आवू.

²⁴ फेसतूस कोयू “हे राजा अग्रिप्पा ओवी आमरे साते आवला माणसो इना माणसो काजे देखू जिनान बारामा आखा यहुदि सोमाज यरुशलेममा एने न्या बी आयळीन-आयळीन मारेसी मांग कोऱ्या कि एरू हिमी जीवन वारू नि होय.

²⁵ बाकीन मे सोमजी गोयू कि यु मोरनेन लायक ओसो काय नि कोऱ्यु एने इनान कोरता कि खुद माहाराज अधिकारी जुव मे नियाव मांग्यू इना काजे मुकली देनेन फेसलू कोऱ्यु.

²⁶ ते बी मारे जुव इना बारामा आपना माहाराज काजे लिखने कोरीन काहीन जोरुरी वात नि होय इनान कोरता मे तुमरे आखा सामने अग्रिप्पा राजान सामने लाव रोयू जीनासी कि तपासणी सोर जासे ती काहीन लिखने जोळ जासे.

²⁷ काहाकि बंदी काजे मूकलनो एने जू गुणू लागाळाय जाय, तीनुक घोन कोयता, मेसेक वायबार जाणो पोळे.”